[fadil]

Institucionet e Republikës së Kosovës dënojnë ashpër sulmin në shtëpinë e kryeministrit Hashim Thaçi Presidenti i Republikës së Kosovës, dr. Fatmir Sejdiu, Kryetari i Kuvendit të Kosovës, Jakup Krasniqi dhe Qeveria e Republikës së Kosovës e kanë dënuar ashpër sulmin e mbrëmshëm në shtëpinë e Kryeministrit Hashim Thaçi, duke e cilësuar atë si akt qyqar e kriminal dhe sulm të drejtpërdrejtë ndaj institucioneve të Kosovës. Presidenti i Republikës së Kosovës e dënoi ashpër sulmin ndaj shtëpisë së Kryeministrit Thaçi, duke e cilësuar këtë akt si një sulm të drejtpërdrejtë jo vetëm ndaj z. Thaçi dhe familjes së tij, por edhe ndaj vetë institucioneve të Republikës.

Presidenti Sejdiu i ka telefonuar z. Thaçit me të marrë lajmin dhe i ka shprehur atij keqardhjen e thellë për këtë akt të pashembullt. Ai, po ashtu, ka kërkuar nga Kryeministri që shqetësimin e tij t’ia përcjellë edhe familjes Thaçi.

“Kërkojmë nga organet e rendit dhe të ligjit që t’i ndërmarrin të gjitha masat e nevojshme, me qëllim që ky rast të zbardhet sa më parë, kurse personat e përfshirë në këtë akt të shëmtuar të vihen para organeve drejtësisë”, theksoi Presidenti Sejdiu, thuhet në kumtesën për opinion të lëshuar sot nga Zyra për informim publik pranë Presidentit të Kosovës.


Kryetari i Kuvendit të Republikës së Kosovës Jakup Krasniqi ka dënuar në shtëpinë e Kryeministrit të republikës së Kosovës, Hashim Thaçi në Prishtinë.

Ky sulm kriminal e qyqar me armë në shtëpinë e zotit Thaçi dhe të familjes së tij është edhe një përpjekje e shqetësuar dhe e kotë për të shantazhuar e penguar Qeverinë e institucionet tjera të Kosovës në përmbushjen e misionit historik të tyre.

Në kohën kur Republika e Kosovës dhe populli i saj po përgatiten për ta inauguruar Kushtetutën e Pavarësisë dhe kur institucionet tona do t’i marrin kompetencat e shtetësisë e të sovranitetit të vendit, në vigjilje të shënimit solemn të nëntëvjetorit të lirisë dhe të paqes në Kosovë, sulmi mbi Kryeministrin Thaçi dhe familjen e tij, vjen si një mesazh kundër Kosovës, institucioneve të saj e zhvillimeve historike nëpër të cilat po kalojmë.

Kërkojmë që organet kompetente vendore dhe ndërkombëtare, ta hetojnë këtë ngjarje kriminale, duke i identifikuar dhe sjellë para drejtësisë aktorët e saj, thuhet në reagimin e kryeparlamentarit të Kosovës, Jakup Krasniqi.


Pas sulmit të mbrëmshëm në shtëpinë e kryeministrit Thaçi, sot përmes një deklarate ka reaguar edhe zv/kryeministri i Qeverisë së Kosovës, Hajredin Kuçi.

Ashtu siç jeni njoftuar nga Shërbimi Policor i Kosovës (SHPK), mbrëmë është sulmuar shtëpia e Kryeministrit të Qeverisë së Republikës së Kosovës, z. Hashim Thaçi, në lagjen “Arbëria” të Prishtinës. Ende nuk janë të njohura të gjitha detajet dhe kush është i përfshirë në sulmin kriminal.

Në kohën e sulmit kryeministri nuk gjendej në shtëpi, por aty ishin bashkëshortja dhe djali i tij, të cilët nuk kanë pësuar lëndime, thuhet në deklaratën e zv/kryeministrit Hajredin Kuçi.

Fakti se dikush ka dashur ta lëndojë kryeministrin dhe familjen e tij, për çfarëdo motivi, nuk është vetëm veprim kriminal që kalon çfarëdo kufiri të urrejtjeve, qoftë pa durimin apo urrejtjen politike. Si rrjedhojë e kësaj situate të rëndë, Qeveria e Republikës së Kosovës ka urdhëruar ngritjen e masave të sigurisë për shumë nga zyrtarët e Qeverisë dhe bartësit e institucioneve të lira dhe për qytetarët e Republikës së Kosovës. Kjo ngjarje është shumë serioze dhe dëshmon se ende ka të atillë të cilët nuk e duan shtetin tonë të ri, ndërtimin e një shoqërie të lirë moderne e demokratike në të cilën sundon rendi dhe ligji. Por askush mos të ketë iluzion se ne do të nënshtrohemi përballë kërcimeve dhe përpjekjeve të tilla kriminale. Në Kosovë nuk ka vend për dhunë dhe nxitje të dhunës. Ata që shkaktojnë dhunë do të përgjigjen para ligjit. Qeveria e Kosovës nuk do të lëkundet nga rruga e saj e drejtë. Do të punojë me përgjegjësi që të përmbush misionin e saj për çfarë është zgjedhur nga populli, për qeverisje të mirë për sundimin e rendit dhe ligjit, vazhdimin e pakompromis të luftës kundër korrupsionit dhe krimit të organizuar, kudo dhe kurdo paraqitet ai. Kërkojmë nga qytetarët e Republikës së Kosovës të mos bien pre e thirrjeve dhe deklarimeve destabilizuese. Qeveria fton popullin e Republikës së Kosovës që ta ruajë unitetin dhe besimin në institucionet tona në kohën historike të shtet ndërtimit të vendit tonë, thuhet në deklaratën e zv/kryeministrit të Qeverisë së Republikës së Kosovës, Hajredin Kuçi, lëshuar sot me rastin e sulmit të mbrëmshëm, të armatosur, në shtëpinë e Kryeministrit të Republikës së Kosovës, Hashim Thaçi.
<FONT style=""FONT-SIZE: " color=#006699 10px\?>| s.b & RTK staff |