[Zero Cool]

Task Force do t’i koordinojë hetimet rreth sulmit ndaj familjes së kryeministrit Thaçi

Me qëllim të koordinimit sa më efektiv si dhe ndriçimit sa më të shpejtë të rastit të sulmit ndaj familjes së Kryeministrit të Republikës së Kosovës Hashim Thaçi, ministri i Punëve të Brendshme Zenun Pajaziti, ka marrë vendim që të themelohet në Task Force e cila do t’i raportojë atij personalisht lidhur me ndriçimin e rrethanave të sulmit ndaj familjes së kryeministrit Thaçi


Në një kumtesë për opinion të nënshkruar sot nga ministri i Brendshëm Zenun Pajaziti, thuhet se nga rrethanave të krijuara pas sulmit ndaj familjes së Kryeministrit të Republikës së Kosovës, Hashim Thaçi, ai merr këtë vendim :

1. Të themelohet një Task Forcë në përbërje të së cilës do të jenë përfaqësues të organeve relevante që merren me rastin;

2. Në krye të kësaj Task Force emërohet zv/Komesari i SHPK-së Gjeneral Sheremet Ahmeti;


3. Për punën dhe rezultatet e arritura në drejtim të ndriçimit të rastit, Task Forca do t’i raportojë Ministrit të Punëve të Brendshme, thuhet në një komunikatë për opinion të nënshkruar sot nga Zenun Pajaziti, ministër i Punëve të Brendshme.


Qeveria përshëndetë angazhimin efikas të SHPK-së në rastin e sulmit mbi familjen e kryeministrit Thaçi


Përmes një komunikate për opinion, të lëshuar paraditen e sotme, Qeveria e Republikës së Kosovës përshëndetë angazhimin efektiv të Shërbimit Policor të Kosovës në rastin e sulmit mbi familjen e kryeministrit të Qeverisë së Republikës së Kosovës z. Hashim Thaçi.

Qeveria vlerëson se ky përkushtim i Shërbimit Policor të Kosovës, garanton që vlerat themelore të shoqërisë dhe shtetit që po ndërtojmë, liria, siguria dhe prona e qytetarëve, janë të paprekshme dhe nuk mund t’i cenojë askush. Qeveria mbështetë hetimet e mëtejmë në zbardhjen e tërësishme të sulmit mbi familjen e kryeministrit Thaçi. Qeveria e Republikës së Kosovës është e vendosur të vazhdojë betejën kundër të keqes, për të mirën e vendit dhe gjithë qytetarëve, thuhet në një komunikatë për opinion të lëshuar sot nga Zyra për informim pranë Qeverisë së Republikës së Kosovës.


Policia do t’i ndërmarrë të gjitha veprimet e nevojshme për ndriçimin e plotë të sulmit në shtëpinë e kryeministrit Thaçi

Policia ka arrestuar të dyshuarin F. S., 19 vjeçar, i cili parmbrëmë rreth orës 23:15 ka tentuar të hyjë në shtëpinë e kryeministrit Hashim Thaçi. I arrestuari ende është duke u trajtuar nga institucionet shëndetësore. Ndërkohë, SHPK thotë se do t’i analizojë provat materiale të mbledhura nga vendi i ngjarjes, në mënyrë që të vërtetohen rrethanat në të cilat ka ndodhur ky rast.

“Ne tashmë e kemi një të dyshimtë të plagosur, për rastin e sulmit ndaj familjes së kryeministrit, i cili ende është duke u trajtuar nga institucionet shëndetësore. Shërbimi Policor i Kosovës është duke i vazhduar hetimet në lidhje me rastin në fjalë”, thuhet në një informatë shtesë, të lëshuar sot nga ana e policisë. Shërbimi Policor i Kosovës do të analizojë provat materiale të mbledhura nga vendi i ngjarjes, si gjaku, shenjat e gishtërinjve dhe provat e tjera që mblidhen nga hetuesit, në mënyrë që të vërtetohen rrethanat në të cilat ka ndodhur ky rast. Po ashtu, policia do të ndërmarrë të gjitha veprimet e tjera të nevojshme të cilat dërgojnë tek ndriçimi i plotë i sulmit në shtëpinë e kryeministrit Thaçi, thuhet në informatën shtesë të policisë, dërguar sot opinionit nga zëdhënësi i SHPK-së, Veton Elshani.

Mësohet se policia është duke vazhduar hetimet për të sqaruar qëllimin e vërtetë të tentim sulmit ndaj familjes së kryeministrit Thaçi, të bërë nga i dyshuari 19 vjeçar Fazli Sejdiu.
Megjithatë hetimet po vazhdojnë për të vërtetuar praninë ose jo edhe të personave të tjerë në këtë tentim sulm, si dhe për të dhënë përgjigje nëse sulmi ka qenë i organizuar ose jo.

I arrestuari është deklaruar në polici si hajn dhe narkoman derisa në natën e së premtes është plagosur derisa po tentonte të hynte dhunshëm në shtëpinë e kryeministrit.


Huazuar nga RTK08 qershor 2008 - 16:00:01