[Zero Cool]

SHBA urojnë Kosovën për Kushtetutën e re

New York, 16 qershor. Shtetet e Bashkuara të Amerikës e kanë përshëndetur hyrjen në fuqi te Kushtetutës së Republikës së Kosovës duke ritheksuar edhe njëherë gatishmërinë që si mik do të vazhdojnë të ndihmojnë ndërtimin dhe prosperitetin e saj. "SHBA urojnë popullin e Kosovës me rastin e hyrjes sot në fuqi të Kushtetutës së tyre të re", thuhej në kumtesën për shtyp të Departamenti të Shtetit që e dha drejtori për marrëdhënie me shtypin, Gonzalo Gallegos. "Kushtetuta përjetëson aspiratën dhe përcaktimin e qytetarëve të Kosovës që të krijojnë një shtet demokratik dhe shumetnik, që është plotësisht i integruar në komunitetin Euro-Atlantik. Shtetet e Bashkuara në veçanti përshëndesin përfshirjen në Kushtetutë të një
mbrojtje të gjerë të drejtash të pakicave që janë propozuar nga i dërguari i Posaçëm i Kombeve të Bashkuara, Maartti Ahtisaari", thuhej në kumtesë.


Deklarata e qeverisë amerikane ka edhe një mesazh për 'udhëheqësit e Kosovës të cilët tani duhet të punojnë që të vënë në jetë principet më të larta të kushtetutës së tyre në ndryshime konkrete pozitive në jetët e të gjithë qytetarëve të saj'.

"Shtetet e Bashkuara të Amerikës si një mik dhe partner do të vazhdojnë të mbështesin përpjekjet e Kosovës që të ndërtojnë një të ardhme më të mirë për qytetarët e saj" thekson urimi i qeverisë amerikane me rastin e hyrjes në fuqi të kushtetutës së Kosovës. /s.gashi/






RTK 16 qershor 2008 - 09:05:59