[Zero Cool]

Ministri Pajaziti po merr pjesë në Konferencën e Asamblesë Parlamentare të NATO-s, në Shën Stefan

Ministri i Punëve të Brendshme, Zenun Pajaziti, po merr pjesë në Konferencën e organizuar nga Asambleja Parlamentare e NATO-s me temën: "Evropa Juglindore drejtë integrimeve euroatlantike", e cila po mbahet në Shën Stefan të Republikës së Malit të Zi, ku ka prezantuar të arriturat gjatë muajve të fundit në Kosovë, që nga shpallja e pavarësisë dhe hyrja në fuqi e Kushtetutës së Republikës së Kosovës.



Në Sesionin e sotëm gjatë orëve të paradites u diskutua për Kosovën, ndërsa ministri i Punëve të Brendshme, Zenun Pajaziti i prezantoi të arriturat gjatë muajve të fundit në Kosovë, që nga shpallja e pavarësisë dhe hyrja në fuqi e Kushtetutës së Republikës së Kosovës. Ministri Pajaziti në fjalën e tij theksoi se "institucionet e Republikës së Kosovës po demonstrojnë përkushtim për ndërtimin e vendit dhe të shoqërisë demokratike të prosperuar".

Para të pranishmëve ministri Pajaziti shpalosi orientimin dhe gatishmërinë e institucioneve të Republikës së Kosovës për bashkëpunim rajonal dhe integrim në strukturat e Bashkimit Evropian dhe në NATO.

Përveç pjesëmarrjes në punimet e kësaj konference, ministri Pajaziti ka realizuar takime të shumta me pjesëmarrës nga vende te ndryshme të rajonit, vendet anëtare të Bashkimit Evropian dhe të NATO-s, ku është diskutuar lidhur me nevojën e forcimit të bashkëpunimit rajonal, sidomos në fushën e sundimit të ligjit, si parakusht për anëtarësim në strukturat euroatlantike.

Në Konferencën e Asamblesë Parlamentare të NATO-s, e cila po mbahet në Shën Stefan, përveç ministrit Pajaziti, nga Kosova në këtë Konferencë po marrin pjesë edhe z. Lutfi Haziri dh z. Ibrahim Gashi, deputetë të Kuvendit të Republikës së Kosovës, si edhe z. Pieter Feith, përfaqësues civil ndërkombëtar në Kosovë, njofton Zyra për marrëdhënie me publikun e Ministrisë së Punëve të Brendshme të Kosovës.




RTK 25 qershor 2008 - 15:52:46