[jonuzi]

Papunësia në Kosovë arrin në 50 për qind
Nga Përparim Isufi
Publikuar : Mars 30, 2008
Printo Email


Kosova me gjasë po jeton momentet e fundit të një paqeje të blerë sociale e cila e ka shoqëruar në nëntë vitet e funksionimit me institucione legjitime por pa status të zgjidhur.

Shpallja e pavarësisë së vendit më 17 shkurt tashmë i ka hapur rrugën veprimit sindikal të punëtorëve dhe të papunëve në Kosovë që të kërkojnë të drejtat e tyre. Në këtë mënyrë, organi kryesor sindikal, Bashkimi i Sindikatave të Pavarura të Kosovës, ka paralajmëruar një protestë për muajin e ardhshëm. Institucionet e Kosovës, të frikësuara nga trazirat e mundshme sociale, kërkojnë edhe më tepër durim qytetar.
"Ne jemi duke u përgatitur për një protestë të të gjithë punëtorëve kosovarë. Është kërkesë e punëtorëve dhe unë dua t'i falënderoj ata që kanë qenë aq të durueshëm dhe tani ka filluar të na dalë nga dora organizimi që e kemi. Njerëzit janë mbështetur për muri dhe nuk kanë ku të shkojnë. Ne dëshirojmë që në mënyrë të organizuar t'i bëjmë këto protesta, në mënyrë të qetë për momentin. Ne do ta kemi edhe hapin tjetër. Dhashtë Zoti të mos ta ndërmarrim hapin tjetër më radikal, sepse njerëzit nuk kanë ku të shkojnë më tutje kur nuk e kanë ekzistencën për familjet e tyre", tha Haxhi Arifi, kryetar i Bashkimit të Sindikatave të Pavarura të Kosovës.
Në Odën Ekonomike të Kosovës, Flamur Keqa vlerëson se Kosova po kalon një situatë jo të favorshme sociale dhe kjo, sipas tij, e bën potencial rrezikun e trazirave në të ardhmen. Megjithatë ai kërkon që qeverisë së Kosovës t'i jepet edhe pak kohë për ta treguar veten.
"Problemet sociale janë amortizuar për shkak të statusit të pazgjidhur të Kosovës. Tani kemi pavarësinë dhe mundësitë që të shfaqen protesta të ndryshme sociale janë më të mëdha, mirëpo unë mendoj që qeverisë aktuale duhet t'i jepet edhe pak kohë në mënyrë që të shihet se a është duke punuar ashtu siç është deklaruar dhe ashtu siç presin qytetarët e Kosovës", deklaroi Flamur Keqa nga Oda Ekonomike e Kosovës.
Gjergj Dedaj është zëvendësministër në njërin ndër dikasterët më të ndjeshëm në Kosovë, në Ministrinë e Punës dhe Mirëqenies Sociale. Ai thotë se rezultatet e para për krijimin e vendeve të reja të punës duhet pritur edhe pak muaj deri te Konferenca e Donatorëve për Kosovën, e cila parashikohet të mbahet gjatë verës. Idenë për të protestuar, politikisht ai e vlerëson si të pavend.
"Në këtë fazë unë nuk besoj se Kosovës i duhen trazirat. Kosovës i duhet qetësia dhe krijimi i një shteti ligjor. Për një muaj të zgjidhjes së statusit, është vështirë të përballemi dhe të ofrojmë zgjidhje të kënaqshme. Një pakënaqësi apo një dalje e situatës jashtë kontrollit ndoshta do t'i pengonte këto procese", vlerëson Gjergj Dedaj, zv.ministër i Punës dhe Mirëqenies Sociale.
Në mungesë të një vlerësimi zyrtar, hulumtimet e ndryshme kanë treguar se papunësia në Kosovë sillet mes 40- 50 % që në numra nënkupton se janë 335 mijë njerëz të aftë për punë të cilët presin të punësohen.