[niemand]

Rikthehen grabitjet me maska pas 6 vjetësh në rrugën nacionale Kukës-Pukë. Në orët e para të mëngjesit të djeshëm, katër autovetura me targa të Kosovës, janë gjetur përballë disa personave të maskuar dhe të armatosur në vendin e ish-magazinave të grurit, në afërsi të fshatit Lajthizë të rrethit të Pukës. Burime zyrtare nga Policia e Kukësit dhe Komisariati i Pukës, bëjnë me dije se rreth orës 01:00, një bandë prej 7 grabitësish, katër prej të cilëve të armatosur, iu kanë prerë rrugën në segmentin rrugor të Qafë-Malit katër mjeteve, ku po udhëtonin kosovarët që po ktheheshin nga plazhi i Vlorës. Duke përfituar nga errësira e natës, grabitësit kanë urdhëruar pasagjerët që t'u jepnin eurot dhe sendet me vlerë që kishin me vete. "Na jepni shpejt paratë dhe bizhuteritë, ndryshe do iu vrasim", janë shprehur maskat. Mësohet se banda e grabitësve u ka marrë pushuesve kosovarë një sasi të vogël eurosh (ata i kishin shpenzuar shumën tjetër që kishin marrë me vete gjatë kohës së pushimeve në bregdetin e Vlorës). Të terrorizuar, pasagjerët kosovarë kanë dorëzuar varëset prej floriri si dhe ato pak euro që kishim me vete). Këta të fundit kanë deklaruar gjatë marrjes në pyetje, se tre prej maskave iu kanë marrë gjërat me vlerë e eurot, kurse katër të tjerë i kërcënonin vazhdimisht të shpejtonin, duke i trembur nën forcën e kallashnikovëve. Burime të policisë së Kukësit thanë për "Gazetën", se një efektiv i shërbimit të Komisariatit të Kukësit ka diktuar se në luginë po bëhet një grabitje dhe u ka shkuar udhëtarëve menjëherë në ndihmë duke njoftuar Drejtorinë e Policisë së Kukësit dhe kjo e fundit atë të Pukës, në territorin e së cilës po bëhej krimi. Menjëherë nga Puka dhe Kukësi janë nisur dhjetëra forca policie, të cilave, respektivisht për shkak të distancës ku kishin marrë njoftimin se po ndodhte grabitja e kosovarëve, u duhej të paktën një orë rrugë me makinë. Nga burime të tjera mësohet se policia e Pukës ka ngritur menjëherë një grup pune, i cili po punon për zbardhjen e ngjarjes së rëndë, por ende nuk ka të dhëna për identifikimin e autorëve të krimit. Disa orë pas ngjarjes kanë mbërritur forcat e FNSH-së së Shkodrës. Mësohet se janë shoqëruar 5 persona të dyshuar si të përfshirë në këtë grabitje me maska e armë.