[Llapjani_HH]

Sylejman Selimi, në krye të Forcës së Sigurisë

Komandanti i tanishëm i Trupave Mbrojtëse të Kosovës, gjeneral lejtnant Sylejman Selimi, është përzgjedhur për drejtimin e Forcës së Sigurisë, e cila është në themelim e sipër.

Emërimi i tij formal u bë sot nga ana e presidentit Fatmir Sejdiu, një ditë pas propozimit të bërë nga kryeministri Hashim Thaci.

Gjenerali 38 vjecar, njëri nga themeluesit e ish Ushtrisë Clirimtare të Kosovës, ka qenë kandidati i vetëm I propozuar për komandantin e Forcës së Sigurisë.

Zgjedhja e tij në këtë post është zvarritur për disa javë për shkak të sic thuhej "nevojës për konsultime shtesë ndërmjet krerëve të institucioneve të Kosovës".

Dy ditë më parë, zyrtarë të NATO-s në Bruksel kritikuan udhëheqësit kosovarë për zvarrijet për formimin e Forcës së Sigurisë së Kosovës dhe emërimin e komandantit të saj.

Shefi i Komitetit Ushtarak të NATO-s, admirali Gaimpaolo di Paola, tha se përkundër përgatitjeve që ka bërë NATO për fillimin e rektrutimit të pjesëtarëve të Forcës së Sigurisë, procesi po vonohet për shkak të mosemërimit të komandantit të kësaj force nga ana e institucioneve të Kosovës.

Lidhur me vonesat për përzgjedhjen e kreut të FSK-së janë bërë kritika edhe nga opozita.

Kryetari i Aleancës për Ardhmërinë e Kosovës, Ramush Haradinaj, ka vlerësuar se këto vonesa po ndikojnë negativisht në sigurinë e qytetarëve.
BBC


Trenat e Serbisë vazhdojnë të qarkullojnë lirshëm në Zveçan

Pavarësisht kërkesës së institucioneve të Kosovës së Serbia të mos shkelë sovranitetin e Kosovës, Beogradi vazhdon ta bëjë këtë gjë duke lëshuar në qarkullim trenat për në Zveçan, pa marrë leje nga autoritetet në Kosovë. Kohavisioni sot ka qëndruar në Zveçan, ku ka qenë dëshmitar i hyrjes dhe daljes së tre trenave në Kosovë nga Beogradi dhe Kraleva. Pa marrë leje nga askush, trenat e Hekurudhave të Republikës së Serbisë qarkullojnë tri herë në ditë në territorin e Kosovës, duke cenuar haptas sovranitetin e Republikës së Kosovës. Nën llogon “Hekurudhat e Serbisë”, stacioni i trenit në Zveçan punon për çdo ditë dhe pret trenat në mëngjes dhe në mbrëmje që vijnë nga shteti serb. Një linjë e trenit vjen nga Beogradi dhe dy nga Kraleva. Autoritetet e stacionit të trenit në Zveçan thonë se qarkullimi ndodh normalisht. Institucionet e Kosovës, të cilat ende nuk e kanë shtrirë autoritetin e Kosovës në asnjë segment të jetës në veri, paralajmërojnë shtrirjen dhe funksionimit të ligjit në këtë pjesë ku mungon dora e shtetit. Megjithatë, zyrtarët e stacionit në Zveçan, mbase për herë të parë janë përballur me një argument që atyre ua ka ofruar deputeti i LDD-së, Gani Geci, duke u thënë atyre se këto hekurudha, por edhe Zveçani, është Kosovë dhe ata duhet t’i respektojnë institucionet e saj. Geci, anëtar i Komisionit për Siguri, ka qenë i vetmi nga zyrtarët e institucioneve qendrore të shtetit që ka parë nga afër zhvillimet në hekurudhat që shfrytëzohen ilegalisht nga Serbia. Në zyrat e EULEX-it dhe në Ministrinë e Punëve të Brendshme tashmë ekziston një letër e ministrit Fatmir Limaj, i cili u ka bërë ftesë këtyre dy institucioneve që të ndërmarrin hapa konkretë në kthimin e normalitetit në veriun e Kosovës. Hekurudhat e Kosovës janë njëra ndër 6 pikat e raportit të Ban Ki Moonit, të cilat janë përshendetur në Deklaratën presidenciale pas mbledhjes së Këshillit të Sigurimit.
KTV