[Llapjani_HH]

OEK: Bizneset të përgatiten për bllokimin e importit të mallrave nga Serbia dhe B e H

Prishtinë, 22 dhjetor - Oda Ekonomike e Kosovës i fton bizneset në Kosovë të cilat importojnë mallra nga Serbia dhe Bosnja e Hercegovina që të përgatiten për bllokimin e mundshëm të importit të mallrave nga Serbia, si pasojë e marrjes së masave reciproke për problemet të cilat institucionet e Serbisë dhe Bosnjës dhe Hercegovinës i bëjnë importit të mallit nga Kosova. Prej 3 dhjetori të këtij viti institucionet e Serbisë dhe Bosnjës dhe Hercegovinës nuk lejojnë që mallrat të cilat eksportohen nga Kosova për në Serbi dhe B e H dhe kalojnë transit nëpër këto vende të kalojnë vendkalimet kufitare pasi që dokumentacioni përcjellës është i vërtetuar nga Doganat e Kosovës e jo sikurse deri më tash nga Doganat e UNMIK ut. Nëse kërkesat e institucioneve të Kosovës dërguar sekretariati të Marrëveshjes CEFTA nuk sjellin rezultate dhe nëse Serbia dhe B e H vazhdojnë me praktikën e tanishme, atëherë institucionet e Kosovës do të janë të detyruara të ndërmarrin masa reciproke, deri të ndalimi i importit të mallrave të prodhuara në Serbi dhe B e H. Oda Ekonomike e Kosovës fton të gjithë bizneset kosovare të cilat importojnë mallra nga këto shtete që seriozisht të fillojnë të mendojnë që të gjejnë zëvendësim për mallrat nga këto shtete, në mënyrë që bizneset e tyre të mos pësojnë nga masat që Kosova do të jetë e detyruar të ndërmerr për të siguruar reciprocitet në marrëdhëniet me Serbinë dhe B e H , si shtete të pavarura.
QIK


Thaçi: Kushtetuta dhe Plani Ahtisari dokumentet e vetme që do të implementohen në Kosovë

“Kushtetuta e vendit dhe Plani i presidentit Ahtisari janë dokumentet e vetme që do të implementohen në Kosovë”, tha sot kryeministri Hashim Thaçi, duke reaguar ndaj kërkesës së Serbisë drejtuar OKB-së për fillimin e zbatimit të planit 6 pikësh në Kosovë. “Raporti i Ban Ki Munit që u diskutua në Këshillin e Sigurimit nuk ka karakter obligues”, tha kryeministri.
Sipas tij, e rëndësishme në këtë proces është shtrirja e EULEX-it në tërë territorin e Kosovës, me fillimin e funksionimit të të cilit ka filluar një ndryshim pozitiv për Kosovën.
RTK


Në Graçanicë hapet solemnisht zyra e Postës së Serbisë

Ministri për Kosovën në qeverinë serbe, Goran Bogdanoviq, ai për pushtetin lokal, Millan Markoviq, këshilltari i presidentit të Serbisë, Mllagja Gjorgjeviq dhe drejtori i Postës dhe Telekomit të Serbisë, Goran Qiriq janë duke qëndruar sot në Graçanicë. Ata do të marrin pjesë në ceremoninë e rihapjes së zyrës së Post-Telekomit të Serbisë në Graçanicë dhe do të zhvillojnë takime me, siç thuhet, kryetarët e komunave të Kosovës qendrore.
Këto struktura komunale nuk njihen nga autoritetet ndërkombëtare dhe ato kosovare. Rangjell Nojkiq, drejtor i PTT-së së Serbisë për Kosovën, ka thënë se qeverisë serbe, renovimi i zyrës së postës në Graçanicë i ka kushtuar rreth 90 mijë euro.
RTK


Protestë në Debellde - shkulen gurët e kufirit‏

Banorët e fshatit Debellde të Vitisë, të pakënaqur me vendosjen e vijës kufitare në vendin e quajtur Kodra e Furrës, kanë thyer sot gurët që përcaktojnë vijën kufitare, të vendosur nga komisionet ndërkufitare të Kosovës dhe Maqedonisë.Ata shprehen se komisioni i Maqedonisë për kufirin, nuk po respekton marrëveshjen që pronat e banorëve të mos cenohen dhe apelojnë institucionet kosovare se çdo marrëveshje pa definimin e kësaj zone, për ta është e papranueshme.
Banorët e fshatit Debellde të Vitisë, në shenjë revolte për vendosjen e pikës kufitare në vendin e quajtur Kodra e Furrës, kanë protestuar sot dhe kanë nxjerrë pikat e vendosura ditë më parë që përcaktojnë kufirin Kosovë-Maqedoni nga komisionet ndërkufitare të dy shteteve.

Sipas kryetarit të fshatit Zymri Ilazi, pala maqedonase nuk e ka qëndrimin sikur që edhe është bërë marrëveshja që prona private e banorëve të mos cenohet.

Ai shprehet se problemi qëndron kryesisht tek definimi i vijës tek Kodra e Furrës, ku vendosja e një pike aty cenon një pjesë të konsiderueshme të banorëve prej 12 deri 15 hektar.

“Pala maqedonase ka kërkuar që te kodra e Furrës të vendoset pika që do të thotë të implementohet marrëveshja e vitit 2001 mes Shkupit dhe Beogradit pa u pyetur pala kosovare. Ne kemi kërkuar vazhdimisht të na kthehet prona jonë dhe të mos cenohet asnjë hektar, mirëpo tani dalin probleme sërish. Gjithashtu për këto 8 vite sa nuk e kemi shfrytëzuar pronën tonë kemi kërkuar kompenzim, mirëpo kjo po hasë në vesh të shurdhër”, tha Ilazi.

Edhe Shemsedin Murseli banor i këtij fshati, rreth 6 hektarë pronë e te cilit gjendet tek kodra e Furrës, kundërshton vendosjen e pikës kufitare në këtë zonë.



Derisa debelldeasit i apelojnë institucioneve kosovare që të mos nënshkruajnë ndonjë marrëveshje me Maqedoninë pa u definuar çështja e problemit tek Kodra e Furrës, zv.kryetari i Komisionit për kufirin të Republikës së Kosovës prof. Murat Meha, ka thënë se të dy komisionet në bashkëpunim me ICO janë duke punuar maksimalisht që të gjendet një zgjidhje në këtë pjesë më të ndejshme, që shpresojmë të është e pëlqyeshme dhe e pranueshme për ty palët , veçanërisht edhe për banorët e Debelldeut.

Meha ka premtuar se banorët e fshatit Debellde janë pjesë e komisionit dhe zgjidhja e këtij problemi do të bëhet në bashkëpunim me ta.
RTK


Thaçi jo bisedimeve teknike me Serbinë

Kryeministri i Kosovës, Hashim Thaçi, ka hedhur poshtë paralajmërimet e shefit të UNMIK-ut, Lamberto Zannier, për bisedime teknike në mes të Kosovës dhe Serbisë rreth aranzhmaneve të pikave të Ban Ki Mooni-it. Thaçi ka shtuar se Kosova dhe Serbia mund të diskutojnë vetëm si dy shtete të pavarura dhe të barabarta. “Në Kosovë, institucionet do ta respektojnë vetëm kushtetutën e vendit”. Komentet janë bërë pas takimit me kryetarin e partisë shqiptare nga Maqedonia “Demokracia e Re”, Imer Selmani. Megjithatë, kryeministri nuk ka dashur të flasë rreth vizitës së delegacionit të lartë shtetëror serb në Kosovë, pavarësisht se kohë më parë kishte deklaruar se asnjë zyrtar serb nuk do të shkelë më në Kosovë pa lejen e institucioneve.
KTV