[Lona]

Reagime qyqare dhe të stërvonuara
Fejzi HAJDARI


Pas shkrimeve të njëpasnjëshme të gazetës “Lajm”, tanimë një muaj me radhë, për sjelljen dhe keqtrajtimin e qytetarëve të pafajshëm nga njësiti special policor “Alfa”, reagimet e vonuara të partive shqiptare, BDI dhe PDSH-së, tamam kanë ngjyrimin qyqar dhe të pakuptimtë.
Të reagosh me një muaj vonesë apo më tepër, rreth maltretimit që iu bë qytetarëve dhe demonstrimit të muskujve e triumfalizimit të çoroditur nga Alfa-të, është tamam tallje me qytetarët. Dhe, jo vetëm kaq, por aventurat e Alfa”-ve kishin për qëllim edhe uljen e dinjitetit të shqiptarëve, disiplinimin, si dhe kthimin e dinjitetit të humbur të forcave ushtarako-policore maqedonase që nga përfundimi i konfliktit të vitit 2001 në Maqedoni.
Pra, me fjalë tjera, BDI dhe PDSH, janë tall me dinjitetin e shqiptarëve. Vonesa e reagimeve ndaj brutalitetit të paparë të Alfa-ve, paraqet mungesë vizioni ose mungesë potence politike në vendimmarrjeje, tek të dy estabilishmentet politike. Përgjigja më e mirë për gjithë këtë sjellje të politikës shqiptare në Maqedoni është: Turp!
Përgjegjësia është e njëllojtë, si për BDI-në, po ashtu edhe për PDSH-në. Të mos mundohen tani, të djeshmit t’i akuzojnë këta të sotmit, sepse gjynahu i sotëm, është identikë me atë të djeshmin. Nuk ha më barë, as popullata!. Tani shqiptarët e kanë mësuar leksionin, partitë kërkojnë votën për tu pasuruar politikanët, për t’i shijuar privilegjet dhe benificionet, dhe jo për tu mbrojtur interesi i popullatës, ashtu siç premtohet gjatë fushatave.
Cilin interes e mbrojtën deputetët e rajonit të Kumanovës dhe Shkupit (pa dallim BDI dhe PDSH), derisa “Alfa”-të po bënin kërdi duke bastisur nëpër shtëpi, pa bërë dallimin strikt ndërmjet kriminelëve dhe qytetarëve të pafajshëm. Le të na tregojnë një argument se ata gjatë këtyre ditëve kishin bërë një hap konkret për të parandaluar “masturbimin” policor të kryepolices Jankullovska, me qëllim të vetëm – ruajtjen e rejtingomanisë së padronit të saj kryeministrit Nikolla Gruevski. Apo, a ishte ndonjëri nga ata në shtëpitë e familjeve që u bastisën për të mësuar shkallën e dhunës dhe tejkalimin eventual të autorizimeve ligjore.
Por, ata, si duket nuk kanë faj, sepse në listat e deputetëve i kishte radhit partia nënë, dhe kështu fituan mandatin: PËRFAQËSUES TË POPULLIT. A thua me nocionin popull, ata kuptojnë vetveten!.
Mu kujtua një shkrimi i publicistit Kim Mehmeti, “politikanë me pantallona të rëna”, unë desha të shtojë “…edhe pa bythë”, sepse pantallonat ndalen tek b…, po kur nuk ke b…, pantallonat bien. Kjo u mungon, gjithsesi. Sepse, deputetët tanë ende rrojnë nga fama dhe nami i kaluar dhe i tejkonsumuar, si dhe retorika “patriotike”.
Sot patriotizmi ka marrë dimensionin dhe definicionin autentikë, të vërtetë. Patriotizëm është t’i ndihmosh qytetarëve në ditë të vështira, sidomos kur ata diskriminohen nga aparati shtetërorë. Por, për veprime të tilla duhet në radhë të parë potencë intelektuale dhe kapacitet politikë. Eh, ku ta gjesh këtë tek deputetët tanë të shkretë, kur ata për ta mbuluar deficitin intelektualë, krekosen me të kaluarën tanimë të perënduar. Tani nevojiten veprime konkrete të cilat kërkojnë potencial dhe kapacitetet intelektualo-politikë.
S’ka faj ministrja e brendshme Gordana Jankullovska!? Po kush nga deputetët shqiptarë të këtij rajoni, do ta marrë guximin intelektualë t’i dalë përpara kryepolices.
Për dallim nga deputetët dhe partitë qyqare shqiptare, Gruevski dhe Jankullovska, e kanë mësuar mirë leksionin: shtoni presionin ndaj shqiptarëve, që të keni rejting dhe mbështetje të lartë.
Rejtongomania, sikur e ka verbëruar “dyshin” në fjalë Gruevski-Jankullovska. Ata nuk çajnë kokën për konsekuencat eventuale në këtë situate tepër fragjile dhe delikate. Të dhënë shumë pas rejtingut, ata situatën në terren po e nënçmojnë duke anashkaluar rritjen permanente të tensionit, gjendje kjo që i ngjason, megjithëse nuk dua ta them, periudhës para 2001-shit. I ruajt Zoti nga kapriçoja, Gruevskin dhe Jankullovskën, kurse deputetëve shqiptarë të këtij rajoni, Zoti i dhashtë guxim dhe mend.

Debëlldeasit e revoltuar shkulin gurët e kufirit

Banorët e fshatit Debëllde të Vitisë kanë thyer gurët që përcaktojnë vijën kufitare, të vendosur nga komisionet ndërkufitare të Kosovës dhe Maqedonisë. Ata për Radio Televizionin e Kosovës (RTK), kanë shprehur pakënaqësinë e tyre lidhur me vendosjen e vijës kufitare në vendin e quajtur “Kodra e Furrës”. Sipas banorëve lokalë, komisioni i Maqedonisë për kufirin, nuk po respekton marrëveshjen që pronat e banorëve të mos cenohen dhe i bëjnë apel institucioneve të Kosovës se për ta është e papranueshme çdo marrëveshje pa përcaktimin e kësaj zone. Banorët e fshatit Debëllde të Vitisë, në shenjë revolte për vendosjen e pikës kufitare në vendin e quajtur “Kodra e Furrës”, kanë protestuar të hënën dhe kanë nxjerrë pikat e vendosura ditë më parë që përcaktojnë kufirin Kosovë-Maqedoni nga komisionet ndërkufitare të dy shteteve. Sipas kryetarit të fshatit Zymri Iljazi, pala maqedonase nuk e ka qëndrimin sikur që edhe është bërë marrëveshja që prona private e banorëve të mos cenohet. “Problemi qëndron kryesisht tek definimi i vijës tek “Kodra e Furrës”, ku vendosja e një pike aty cenon një pjesë të konsiderueshme të banorëve prej 12 deri 15 hektarë”, ka thënë ai. Ndërsa kryetari i Komisionit për kufirin të Republikës së Kosovës prof. Murat Meha, ka thënë se të dy komisionet janë duke punuar maksimalisht që të gjendet një zgjidhje në këtë pjesë më të ndejshme. Ndërkaq, kryetari i Komisionit të Maqedonisë për shënimin e kufirit, Teodor Nanev tha për “Lajm” se në pjesën e Maqedonisë nuk ka incident dhe se po punojnë për zgjidhjen e këtij incidenti të izoluar. Vendosja e gurëve të kufirit mes Maqedonisë dhe Kosovës përfundoi në fund të muajit nëntor, ndërsa demarkacioni i plotë i kufirit pritet të përfundojë në mars të vitit të ardhshëm.


Dhuna e “Alfa”-ve rrezikon eskalimin e situatës
Laura Papraniku


Reagimet për aksionin e fundit të policisë, si rezultat i së cilës u arrestuan 18 shqiptarë dhe u bastisën 20 shtëpi, kanë vazhduar edhe të hënën. Lëvizja Qytetare “Zgjohu” nga Shkupi ka shprehur shqetësim të thellë për këto veprime të cilat, vlerëson se po shndërrohen në përditshmëri të padurueshme. “Në veçanti jemi të shqetësuar nga bastisjet pa arsyetime zyrtare dhe të gabuara, duke përfshirë edhe bastisjen ‘koincidente’ në shtëpinë e një gazetari”, shkruan “Zgjohu”, ndërsa fton Ministrinë e Punëve të Brendshme (MPB) të mos paragjykon fajësinë. Kjo lëvizje qytetare, gjithashtu u apelon miqve ndërkombëtar, që urgjentisht të intervenojnë për të parandaluar eskalimin e mëtutjeshëm të situatës. Përmes një komunikate ka reaguar edhe kryetari i Republikës së Iliridës, Nevzat Halili, i cili i konsideron të rrezikshme aksionet e policisë për bastisjen dhe arrestimin e personave të pafajshëm. Aksioni i fundit i policisë, me pretekstin e gjetjes së autorëve, që para një muaji vranë një pjesëtar të njësitit special policor “Alfa”, është dënuar nga shumë organizata dhe parti politike. Bashkimi Demokratik Shqiptar (BDSH) u është drejtuar me një letër të hapur deputetëve të partisë shqiptare në pushtet, Bashkimit Demokratik për Integrim (BDI) Xhemail Jasharit, Tahir Hani dhe Xhevat Ademit, në cilësinë e ish të burgosurve politik. “Skenat e përditshme të bastisjeve të familjeve shqiptare nga pjesëtarët e pafytyrë, desha të them me maska, të aparatit represiv të shtetit maqedonas, maltretimet e mijëra familjeve shqiptare në Komunat e Likovës, Kumanovës, Haraçinës, Hasanbegut, Çairit dhe vendbanimeve tjera shqiptare, arrestimet e shumta, dhuna shtazarake për të detyruar të burgosurit që të pranojnë veprat që nuk i kanë bërë dhe komoditeti i përfaqësuesve të partisë suaj. Që përsërit në mënyrë monotone, se koalicioni qeveritar VMRO-BDI funksionon në mënyrë të përkryer më shtyn t’iu drejtohem më këtë letër të hapur edhe për publikun”, shkruan Bardhyl Mahmuti, kryetari i BDSH-së. Duke u kujtuar atyre se si “neveriteshin nga komunistët shqipfolës me aminin që i bënin politikës antishqiptare”, Mahmuti pyetën ata “a u ka shkuar ndër mend se për një rrogë në ‘Parlamentin e Diktaturës Multietnike të Maqedonisë’ do të heshtni dhe kështu do të aprovojnë atë që ndodhën”, njësoj si dikur “komunistet shqipfolës ne Sobranien e Maqedonisë”. Ndërkaq Nevzat Halili i Republikës së Iliridës duke marrë si shkas aksionin e fundit të MPB-së, bën një retrospektivë të aksioneve famëkëqija të policisë maqedonase, duke filluar me Ladorishin dhe Bit Pazarin e 1992-shit, për të vazhduar me aksionet vrastare të policisë në Porojin e 1995-ës, të Gostivarit dy vite më vonë, të Haraçinës në 2000-ën, ato të 2001-shit dhe për të ardhur te Brodeci i 2007-ës dhe ky i fundit në Shkup dhe Kumanovë.


Shaqiri: Nëse vazhdojnë arrestimet UÇK do të riorganizohet

Ish-komandanti i Ushtrisë Çlirimtare Kombëtare (UÇK), Xhezair Shaqiri-Hoxha për agjencinë INA ka deklaruar që faktori politik shqiptar në Qeveri të ngrejë zërin për të ndërprerë aksionet e policisë ose të përkrahë ato hapur. “Kërkojmë nga subjekti politik shqiptar në Qeveri BDI dhe personalisht Ali Ahmeti që të distancohet ose t’i përkrahë publikisht aksionet e tilla. Nëse vazhdojnë kështu ne do të urdhërojmë riorganizimin e UÇK-së për të mbrojtur popullin shqiptar”, ka thënë Shaqiri. Sipas tij, bastisjet dhe arrestimet e ish-ushtarëve të UÇK-së kanë indinjuar të gjithë ish-ushtarët dhe popullin shqiptar. “Prandaj reagojmë ashpër ndaj Qeverisë dhe tandemit Gruevski-Mijalkov, që të ndërpresin sulmet të tilla sepse kanë tejkaluar vijën e kuqe të durimit. Për herë të fundit kërkojmë nga faktori ndërkombëtarë që të ndërhyjë me të vetmin qëllim ruajtjen e paqes”, thekson ish-deputeti i Partisë Demokratike Kombëtare.