[Lona]

Presidenti i Shqipërisë më 8 dhe 9 janar viziton Kosovën

Tiranë, 26 dhjetor - Presidenti i Shqipërisë Bamir Topi bëri të ditur se më 8 dhe 9 janar do të vizitojë Kosovën, me ftesë të Presidentit të Kosovës, Fatmir Sejdiu. Mbrëmë gjatë një interviste televizive, Presidenti shqiptar tha se këtë vizitë e vlerëson shumë të rëndësishme për faktin se është vizita e tij e parë zyrtare në një Kosovë të pavarur. Në janar të vitit të kaluar, pak para shpalljes së pavarësisë së Kosovës, z.Topi ka realizuar një vizitë zyrtare në vendin tonë.

Halimi: Arrestimet mund të destabilizojnë gjendjen në Luginën e Preshevës

Preshevë, 26 dhjetor - Situata në Preshevë raportohet e qetë, ndërsa popullsia është e bafasuar me këtë aksion të arrestimeve. I vetmi që ka reaguar deri më tash nga politikanët lokalë shqiptarë në Preshevë është deputeti Riza Halimi, cili ka deklaruar se ky aksion i arrestimeve "nuk çon drejt stabilizimit të gjendjes në Luginën e Preshevës". Halimi u ka thënë gazetarëve se "dikujt i konvenon që në luginën e Preshevës kohë pas kohe të ngrisë temperatarën për të justifikuar xhandarmërinë". "Absolutish kjo nuk ndjell për të mirë mirë dhe nuk shkon në dobi të stabilizimit të këtij rajoni", ka thënë Halimi.

Sejdiu: Gjashtëpikëshi i papranueshëm dhe nuk do të gjejë zbatim në Kosovë

Prishtinë, 26 dhjetor - Presidenti i Republikës Fatmir Sejdiu beson në punën dhe efikasitetin e misionit EULEKS it, ndërsa vazhdon të kundërshtojë planin gjashtëpikësh të OKB së. Në një intervistë për Radio Kosovën (RTK), Presidenti Sejdiu vlerësoi se plani gjashtëpikësh nuk ka fuqinë e një dokumenti të miratuar në Këshillin e Sigurimit dhe si i tillë nuk është obligativ për Kosovën. "E vërteta është se plani gjashtëpikësh nuk ka marrë fuqinë një dokumenti në kuptimi në marrjen e një vendimi në KS, në nxjerrjen e një rezolute në KS. Por më tepër është i shprehur në raportin e Sekretarit të Përgjithshëm (të KB), sikur është shprehur edhe qëndrimi i Prishtinës, 4 pikëshi dhe është lëshuar një deklaratë presidenciale që në esencë relativizion atë që ishte tendencë e mëhershme që ky plan të marrë bekimin e përgjithshëm ndërkombëtar". Sipas Presidentit, plani gjashtëpikësh mund të jetë presion i ndonjë vendi që të realizohet si i tillë, por për autoritetet e Prishtinës "do të jetë i papranueshëm" dhe se nuk do të gjejë zbatim në Kosovë, thotë Sejdiu, duke saktësuar se EULEX i nuk mund të jetë neutral ndaj statusit të Kosovës. "Thuhet se EULEKS i duhet të jetë neutral, kjo është thirrja serbe. Por, EULEKS i nuk mund të jetë neutral, sepse është përbërë mbi 90 për qind që kanë njohur, kanë mbështetur dhe vazhdojnë të mbështesin republikën e Kosovës", thotë ai. Gjithashtu Presidenti Sejdiu konstaton se ka një vonesë në transferimin e përgjegjësive nga UNMIK u në EULEKS dhe në institucionet e Kosovës, duke u bërë thirrje zyrtarëve të EULEKS it të qartësojë këtë situatë me UNMIK un.

Policia serbe në Preshevë ka arrestuar 10 ish-pjesëtarë të UÇK-së

Vranjë, 26 dhjetor - Policia serbe, bashkë me shërbimet e tjera të sigurisë, sot në Preshevë ka arrestuar 10 ish-pjesëtarë të UÇK-së, siç thuhet për "krime mbi popullsinë civile" në rajonin e Gjilanit. Gjatë këtij aksioni të policisë serbe, në Preshevë ka qëndruar edhe vetë ministri serb i policisë Ivica Daçiq, i cili ka deklaruar rreth drekës në një konferencë për gazetarë në Vranjë se janë arrestuar 10 vetë, por jo edhe udhëheqësit e grupit të Gjilanit të UÇK-së: Fazli Ajdari, Rexhep Ajiri (?) dhe Shaqir Shaqiri, të cilët jetojnë në Gjilan dhe nuk mund të arrestohen nga policia serbe, ka thënë Daçiq, pas arrestimit të të dyshuarve. Sipas Daçiqit, për udhëheqësit e grupit nuk do të lëshohet ndonjë fletarrestim ndërkombëtar, sepse siç thotë "nuk janë në territorin e një shteti tjetër", por do të kërkohet ndihma e UNMIK-ut.

Forcat e koalicionit vranë 11 militantë

Kabul, 26 dhjetor - Koalicioni i Shteteve të Bashkuara njoftoi sot se forcat e tij kanë vrarë 11 militantë talibanë, përfshirë edhe liderin e një grupi për prodhimin e bombave, gjatë një operacioni në jug të Afganistanit. Ndërhyrja e djeshme në provincën Kandahar kishte për cak grupin që po i bënte bombat me të cilat janë vrarë ushtarët e NATO s. Me këtë rast forcat e koalicionit kanë gjetur shumë mina tokësore, granata, armatim automatike dhe material për bomba.

Edhe një viktimë nga Tetova në Irak?

Gjatë eksplodimit të një kamioni në Irak ka gjetur vdekjen një i ri nga Tetova. Ekzistojnë dyshime se kamioni ka qenë pjesë e firmës “Ekolog”- Tetovë, ku dhe punonte i riu nga Tetova, ndërkaq që akoma nuk dihet nëse ka dhe të lënduar të tjerë. Identiteti i të ndjerit si dhe shkaqet e shpërthimit akoma nuk dihen. Nga Ekologu nuk thonë asgjë, veç asaj që presin informata nga Qendra që kanë në Gjermani, dhe pas asaj do të japin edhe informata për mediat, me qëllim që të mos krijohet huti për këtë çështje delikate, pasi, siç thonë përfaqësuesit e “Ekolog”-ut, në Irak punojnë qindra punëtorë nga Maqedonia. Ndërsa, në Ministrinë e Punëve të Jashtme (MPJ) të Maqedonisë nuk kanë asnjë lloj informate dhe e kanë dhe shumë të vështirë për të marrë informata nga Iraku. Zëdhënësi i MPJ-së, Petar Çulev tha për “Lajm”, se nuk kanë asnjë informatë, pasi Maqedonia nuk ka përfaqësi diplomatike në Irak. “Në MPJ nuk ka mbërritur asnjë lloj informacioni dhe e kemi të vështirë për të marrë informata nga Iraku, pasi që nuk kemi përfaqësi diplomatike në atë vend. Përfaqësia më e afërt diplomatike është Turqia”, tha Çulev, duke shtuar se do të përpiqen që të marrin informata edhe nëpërmjet kontingjentit amerikan që vepron në Irak. Në Irak punojnë qindra qytetarë të Maqedonisë, të cilët nëpërmjet firmave të ndryshme punojnë kryesisht në sferën e ndërtimtarisë. Jo rrallë herë ato kanë qenë në qendër të sulmeve terroristë që ndodhin atje. Para pak vitesh në Irak gjetën vdekjen katër shqiptarë të Maqedonisë, të cilët kishin shkuar të punonin në Irak nëpërmjet firmës “Ekolog”.