[Lona]

Riker: Nuk ka ndarje të Kosovës

Shkup, 30 dhjetor - Ambasadori iSHBA në Maqedoni, Filip Riker (Philip Reeker), ka deklaruar se administrata amerikane është thellë e angazhuar për stabilizmin e Ballkanit dhe integrimin e tij në Bashkimin Evropian. Ndërsa sa i përket Kosovës, Riker tha se SHBA të nuk besojnë dhe i vlerësojnë të pabaza njoftimet për ndarje të Kosovës, apo për probleme në procesin e konsolidimit të misionit të Bashkimit Evropian. "Zhvillimet në Ballkan ende nuk kanë përfunduar, pasi qëllimi ynë është që ta shohim rajonin të integruar në Evropën e lirë dhe të sigurtë. Vendosja e EULEX it kaloi pa probleme dhe në esencë kjo ndihmon në përforcimin e Kosovës dhe të institucioneve të saj, meqë do ta bëntë këtë shtet të ri të pavarur të funksionoj në një mënyrë më të mirë. Përforcimi i sundimit të së drejtës në këtë shtet do të ndihmojë edhe në stabilizimin e gjendjes, andaj edhe EULEX i është atje. Megjithatë, ka vlerësime se vendosja e EULEX it do të çojë në ndarje apo do të hasë në vështërësi, por pikëpamjet e tilla nuk kanë kurrfarë baze", tha Riker. "SHBA mbeten të angazhuara si me praninë në EULEX ashtu me aktivitetet diplomatike për t?u sigurara se Kosova po ec përpara në drejtimin pozitiv", tha Filip Riker për Radion Evropa e Lirë. Ambasadori amerikan në Shkup gjithashtu shprehu bindjen se edhe administrata e re amerikane, që do të udhëhiqet nga Presidenti i zgjedhur Barak Obama, nuk do të ndryshojë kursin e politikës amerikane ndaj Ballkanit.

Shvarcenberg: Duhet shumë kohë derisa Kosova të hyjë në BE

Pragë, 30 dhjetor - Ministri i jashtëm i Çekisë, Karel Shvarcenberg, tha se anëtarësimi i Kosovës në Bashkimin Evropian "nuk është çështje e ditës së nesërme". "Duhet të jetë e qartë se derisa Kosova të hyjë në BE do të kaloj edhe shumë kohë", tha ministri Shvarcenberg, vendi i të cilit prej 1 janarit e kryeson presidencën e radhës së Bashkimit Evropian. Më tutje, duke u shprehur për misionin EULEX në Kosovë, ai u tha mediave beogradase, se është me rëndësi që "ky mision të funksionojë". Shvarcenberg theksoi se detyrë e vendit që e kryeson BE në është që ta ndihmoj3 EULEX in që "në Kosovë të zhvillohet shtet i vërtetë ligjor, qeverisje e mirë dhe e drejtë". Gjithashtu edhe kryeministri Mirek Topolonek si një nga axhendat thelbësore ballkanike të presidencës çeke ka paralajmëruar edhe misionin EULEX në Kosovë.

"Standard": Në Kosovë po rritet mosbesimi ndaj BE-së

Vjenë, 30 dhjetor - Sipas gazetës austriake "Standard", në Kosovë po rritet mosbesimi ndaj BE-së, sepse qëndrimi evropian ndaj Kosovës për shumëkënd është i paqartë. BE ka marrë në konsideratë më shumë se është dashur kërkesat e Beogradit, shkruan gazeta, e cila pohon se për këtë arsye edhe shefi i Zyrës Civile Ndërkombëtare Piter Feit është i pakënaqur dhe flitet se ka kërkuar dorëheqje, sepse ndihet i tradhtuar nga BE ja. Ahtiasari apo Solana nuk kanë shansin që një rrugë në Prishtinë të mbajë emrin e tyre. Në kryeqytetin e Kosovës ndërkaq qeveria e saj vendosi që një rruge t'i jepet emri i presidenti amerikan Bush në shenjë falënderimi, shkruan "Standard", duke pohuar se Shtetet e Bashkuara të Amerikës për shqiptarët e Kosovës janë shumë më shumë se fuqia mbrojtëse numër një për ta, sepse ata jetësuan pavarësinë e Kosovës. Në anën tjetër, shrkuan "Standard", evropianët po humbin besimin e tyre tek popullata e Kosovës.

Shqipëria dënon dhunën e ushtruar në Preshevë

Tiranë, 30 dhjetor - Ministria e Punëve të Jashtme së Shqipërisë, i cilëson si veprime me prapavijë dhe paragjykime etnike, arrestimet dhe krijimin e situatës së rënduar në Preshevë. Sipas një deklarate për shtyp, në Preshevë ka përdorim disproporcional të forcës, dhe është ushtruar dhuna policore ndaj familjarëve të arrestuarve, përfshirë këtu gra, fëmijë dhe pleq, si dhe janë bastisur objektet. Duke dënuar dhunën e ushtruar, Ministria e Jashtme vlerëson se transparenca e plotë e të gjithë akteve dhe veprimeve të autoriteteve të Beogradit në lidhje më këtë ngjarje, është tejet e rëndësishme. Ministria e Jashtme e Shqipërisë shpreh bindjen se tensionime të tilla ndëretnike nuk janë në interes të zhvillimeve pozitive në rajonin tonë, dhe u bën thirrje organizatave ndërkombëtare të monitorojnë nga afër situatën e të drejtave dhe lirive themelore të shqiptarëve në Luginën e Preshevës.
Rripi i Gazës edhe më tej në zjarrin e luftimeve

Nju Jork, 30 dhjetor Izraeli do të vazhdojë edhe më tej ofensivën e tij ushtarake në Rripin e Gazës, deri në shkatërrimin e Hamasit radikal islamik. "Ofensiva do të zgjasë deri sa të jetë arritur ky synim", deklaroi ambasadorja izraelite e Kombeve të Bashkuara Gabriela Schalev në Nju Jork. Aviacioni ushtarak izraelit vazhdoi ndërkohë sulmet mbi ndërtesat e ministrive dhe stacioneve të policisë së Hamasit radikal islamik. Nga sulmet hakmarrëse të palestinezëve militantë më parë në jug të Izraelit u vranë tre vetë dhe shumë të tjerë u plagosën rëndë. Numri i viktimave, ndërkohë, sipas burimeve vendore ka arritur në 400. Vëzhguesit presin së shpejti një ofensivë të trupave tokësore izraelite. Po ashtu është përjashtuar mundësia e bisedimeve për një ndërprerje të luftimeve si nga ministria e mbrojtjes në Tel Aviv, ashtu edhe nga Hamasi.