[Llapjani_HH]

Mitrovicë: Rikthehet dhuna

Dy shpërthime të ndara kanë ndodhur në orët e para të së shtunës në veri të Mitrovicës, ku u plagosën 6 persona dhe u dëmtuan disa vetura. Polica e Kosovës raporton se tanimë situata e sigurisë është e qetë dhe nën kontroll.

Në orët e hershme të mëngjesit të ditës së shtunë, në pjesën veriore të qytetit të Mitrovicës kanë ndodhur dy incidente të ndara të shkaktimit të rrezikut të përgjithshëm, njofton Policia e Kosovës.

Kështu, në afërsi të lokalit të quajtur "Viva", në rrugën që shpie drejt spitalit në pjesën veriore të Mitrovicës ka ndodhur një shpërthim, si pasojë e të cilit janë dëmtuar rreth 8 vetura civile, ndërsa në mesnatën e së shtunës u është dhënë flaka dy shtëpive me pronarë shqiptarë në veri.

Zëdhënësi i Policisë rajonale në Mitrovicë, Besim Hoti, thotë se si pasojë e shpërthimit të zjarrit janë lënduar 6 persona, zjarrfikës, ndërsa motivet për të dyja incidentet dhe kryesit e veprave nuk dihen akoma.

"Policia për momentin nuk ka të dyshuar në lidhshmëri me rastin. Kjo është faza preliminare e hetimeve, me ç’rast policia është e obliguar të fillojë fazën e hetimeve për identifikimin e personave të dyshuar", u shpreh Hoti.

Hoti njofton se pas këtyre incidenteve, situata e sigurisë në Mitrovicë është e qetë dhe nën kontroll të mekanizmave kosovarë dhe ndërkombëtarë të sigurisë.

"Situata e sigurisë është nën kontroll dhe është vënë shumë shpejt nën kontroll me ndihmën e KFOR-it dhe forcave të Policisë së EULEX-it. Që nga vënia e situatës nën kontroll, nuk është shënuar për incidente të tjera", shtoi ai.

Ditët e fundit kanë qenë mjat sfiduese për situatën e sigurisë në rajonin e Mitrovicës, e cila siç duket vazhdon të jetë e brishtë.

Incidentet në Mitrovicë i kanë dënuar edhe udhëheqësit e institucioneve të larta shtetërore të Republikës. Presidenti i Kosovës, Fatmir Sejdiu, përmes një kumtese për media u ka bërë thirrje të gjithë qytetarëve të vendit që t'u shmangen provokimeve të ndryshme dhe t'u ndihmojnë institucioneve të rendit për ruajtjen e stabilitetit dhe të qetësisë.

"Aktet e tilla të dhunshme, pa marrë parasysh motivet dhe autorët që qëndrojnë prapa tyre, nuk i shërbejnë perspektivës së qytetarëve të Republikës së Kosovës", ka theksuar presidenti Sejdiu, i cili u ka bërë thirrje institucioneve përgjegjëse për sigurinë në vend, KFOR-in, Policinë e Kosovës dhe organet e hetuesisë që t'i ndërmarrin të gjitha masat e nevojshme për zbardhjen e këtij rasti, në mënyrë që personat përgjegjës të dalin para drejtësisë.

"Institucionet e Republikës së Kosovës janë të përkushtuara për sundimin e rendit dhe të ligjit, për ndërtimin e një shoqërie të lirë e demokratike, që u krijon mundësi të barabarta të gjithë qytetarëve të saj dhe nuk do të lejojnë që aktet e tilla ta vënë në rrezik të ardhmen euroatlantike të vendit", ka shtuar presidenti Sejdiu.
Radio Evropa e Lirë


Shtohen masat e sigurisë në veri të Kosovës

Pas dy shpërthimeve që kanë ndodhur të premten në mbrëmje në veri të Mitrovicës - me ç’rast janë lënduar gjashtë persona – forcat paqeruajtëse të NATO-s dhe policia e EULEX-it kanë shtuar masat e sigurisë në këtë pjesë të Kosovës.

Siç raporton BBC, situata është qetësuar pas shtimit të masave të sigurisë, ndërsa zëdhënësi i Policisë në Mitrovicë, Besim Hoti nuk ka dhënë hollësi për motivet e dy shpërthimeve të mbrëmshme.

Policia thotë se shpërthimi i parë ka ndodhur në afërsi të një kafeneje në veri të Mitrovicës duke dëmtuar shtatë makina.

Incidenti nxiti reagimin e dhunshëm të një grupi serbësh, të cilët i vunë flakën dyqanit të një shqiptari, në Lagjen e Boshnjakëve.

Shpërthimi i dytë ndërkaq ndodhi në këtë lagje, derisa zjarrfikësit po përpiqeshin të shuanin zjarrin.

Tre nga të lënduarit nga ky shpërthim janë zjarrfikës. Jeta e tyre është jashtë rrezikut, thonë mjekët e spitalit në veri të Mitrovicës.

Ditëve të fundit, veriu i Mitrovicës është përfshirë nga një valë incidentesh të motivuara etnikisht. Më 30 dhjetor, në dy incidente të ndara, një i ri serb dhe një i ri shqiptar u plagosën, ndërsa u dogjën disa dyqane dhe makina të shqiptarëve.

Autoritetet e Kosovës kanë dënuar incidentet në Mitrovicë dhe u kanë bërë thirrje qytetarëve që të vetëpërmbahen nga dhuna.
Telegrafi


Gjendja e tensionuar në Mitrovicë. Banorët shqiptarë ndihen të frikësuar

Gjendja në veri të Mitovicës, e sidomos në lagjen e Boshnjakëve vazhdon të jetë e tensionuar pas incidentit të një nate më parë. Banorët shqiptarë ndjehen të frikësuar pas incidenteve të vazhdueshme dhe për shkak të pasigurisë ata kanë filluar ta largojnë mallin dhe produktet nga dyqanet, ndërsa kërkojnë nga institucionet që t'i ndihmojnë dhe të mos lejojnë përshkallëzimin e mëtejmë të situates, të rënduar tashmë.

"Me datë 30 më është djegur dyqani lart mbrëmë është djegur kjo këtu dhe këtu nuk ka kurrfar sigurie sa për KFOR-in dhe policinë tonë apo SHPK-në që janë në pjesën veriore katastrofë është. Mbrëmë rreth orës 24 së pari i kanë ndalë dritat dhe pak më vonë nga lartë kanë zbritur 70 vetë të armatosur dha ia kanë vënë flakën. Me mirë të na thonë se këtë pjesë e kanë sigurt apo e kanë ndarë , sepse mbrëmë na kanë zënë fjetur me familje në shtëpi më fëmijë e më të gjithë", shprehet Gynaj Rexhepi, Pronar i Dyqanit të Shkatërruar.

"Edhe kësaj radhe kriminelët serbë e kanë sulmuar popullin shqiptar dhe shqiptarët janë të shqetësuar këtu b dhe nuk kanë siguri as nga policia e Kosovës dhe as nga qeveria dhe këtu është një anarki duke mbretëruar dhe në këtë rast nuk ka ligj nuk ka mbështetje dhe populli shqiptar nuk ka asnjë mbështetje nga qeveria. I bëj apel qeverisë që urgjentisht të bëjë një mbrojtje për popull që të jetë populli i sigurt të banoj", tha Ahmet Prishtina, Banor i lagjes së Boshnjakëve.

"Nuk ka siguri veturat sillen natën, policia nuk ndërhynë asnjëherë. Kisha lutë qeverinë që të ndërhyjë në këto raste, sepse ne nuk mund t'i lëshojmë shtëpitë tona. Këtu duhet ja ta merr policia situatën në dorë ose ne vet. Që duan të na ndihmojnë mirë jo jo ne jemi të përgatitur t'i mbrojmë shtëpitë tona dhe fëmijët tanë", tha nje tjeter banor i lagjes se Boshnjakeve Enver Ismajli.

Veriu pas këtyre incidenteve është blinduar nga forca të mëdha të KFOR-it, Policisë së EULEX-it dhe policisë së Kosovës, të cilët po bëjnë të pamundur që të mos lejojnë përshkallëzimin e mëtejshëm të situatës.
ALSAT


Thaçi: Nuk ka zgjedhje parlamentare këtë vit

Për kryetarin e Partisë Demokratike të Kosovës, njëherësh kryeministrin e Kosovës, Hashim Thaçi, sfida për vitin 2009 mbeten prioritetet e qeverisë së tij, kurse në lidhje me zgjedhjet e përgjithshme, ai ka thënë se, “nuk sheh ndonjë mundësi që ato të mbahen, siç kërkon opozita”.

“Zgjedhje lokale do të ketë në nëntor, ndërsa unë jam për respektimin e kushtetutshmërisë dhe konsensusit ndërpartiak. Kërkesat për zgjedhjet nga këta individë nuk janë serioze, por janë më tepër sa për të bërë zhurmë. Ata nuk janë në favor të organizimit të zgjedhjeve dhe e dinë se do të ndahen edhe më keq sesa në zgjedhjet e 17 nëntorit. Me këtë sjellje destruktive të këtyre individëve, qytetarët edhe atë besim prej 7 apo 8 për qind do t’ua marrin në zgjedhjet e ardhshme”, ka deklaruar Thaçi për Radion Evropa e Lirë.

Ndërkaq nënkryetari i LDK-së, Lutfi Haziri ka thënë se, “edhe LDK-ja pret që të jetë e gatshme për zgjedhjet lokale në vjeshtën e vitit 2009, por jo edhe për zgjedhjet parlamentare”.

Në anën tjetër, partitë opozitare, synim kryesor kanë përgatitjet për zgjedhjet në të dyja nivelet. Duke u thirrur në pakon e Ahtisaarit, këto parti presin që zgjedhjet lokale dhe ato parlamentare të mbahen në vjeshtë. Ahmet Isufi, nënkryetar i Aleancës për Ardhmërinë e Kosovës, thotë se zgjedhjet e lira janë të domosdoshme për realitetin e ri që është krijuar në Kosovën e pavarur.

”Zgjedhjet duhet të mbahen vitin e ardhshëm dhe për këtë ekzistojnë tri argumente. Ekziston Kushtetuta e Kosovës, e cila është treguesi i mjaftueshëm, për arsye se këto institucione të sotme janë të dala nga korniza kushtetuese dhe për atë s’po mund ta zbatojmë Kushtetutën e Kosovës. Argumenti i dytë është pakoja e Ahtisaarit, të cilën nëse e kanë marrë për obligim ta zbatojnë institucionet e Kosovës, atëherë duhet ta zbatojnë; dhe elementi i tretë - gjendja e partive politike, të cilat janë në rrugë të reformimit të tyre dhe duhet t’u përgjigjen kushteve që janë pas pavarësisë së vendit”, ka thënë Isufi.

Edhe partia tjetër opozitare, Aleanca Kosova e Re, prioritet kryesor e ka mbajtjen e zgjedhjeve. Nënkryetari i AKR-së, Ibrahim Makolli, tha se zgjedhjet në të dyja nivelet janë të domosdoshme për të përmbushur krijimin e institucioneve të reja në Republikën e Kosovës.

Prioritete identike me dy partitë tjera opozitare ka edhe Lidhja Demokratike e Dardanisë. Sekretari i saj i përgjithshëm, Lulëzim Zeneli, tha se mbajtja e zgjedhjeve lokale dhe parlamentare është një prej obligimeve që ka marrë Kosova para faktorit ndërkombëtar në kohën e shpalljes së pavarësisë.
Telegrafi