[Arkza]

Përmes një komunikate për opinion është bërë e ditur se me vendimin e Kryesisë së Partisë Demokratike të Kosovës (PDK), Blerand Stavileci është emëruar zëdhënës i kësaj partie. Blerand Stavileci është lindur në Prishtinë, ku ka përfunduar shkollimin para-universitar, ndërsa ka diplomuar për Menaxhment dhe Informatikë në Universitetin Mbretëror Iliria, ku aktualisht është në përfundim të studimeve master.
Në njoftim po ashtu thuhet se Blerand Stavileci ka studiuar mjekësinë për tri vite në Universitetin e Prishtinës dhe ka kryer kursin intensiv të gjuhës dhe të civilizimit francez në Universitetin e Sorbonës.
Aktualisht është këshilltar politik i ministrit Fatmir Limaj, në Ministrinë e Transportit dhe të Postë-Telekomunikacionit. Gjatë fushatës së fundit zgjedhore ka qenë dhe zëdhënës i fushatës së z. Limaj.
Në rrafshin akademik, Blerand Stavileci është asistent i lëndëve mësimore të Menaxhmentit dhe Informatikës
Stavileci është marrë aktivisht edhe me sport, si basketbollist i shquar në klubin "Prishtina", ku më vonë ka qenë edhe drejtor sportiv dhe udhëheqës i shkollës së basketbollit. Tani është anëtar i Bordit të Federatës së Basketbollit të Kosovës.
Përveç gjuhës amtare, Blerand Stavileci komunikon në gjuhët angleze, franceze, italiane dhe serbokroate, thuhet në njoftimin e lëshuar sot nga Zyra për informim e PDK-së.