[fadil]

http://www.gazetaexpress.com/images/...37-490x320.jpg


Godet të gjithë
Partia Demokratike e Kosovës po vazhdon rekrutimin e anëtarëve nga partitë kundërshtare. Zyrtarët më të lartë të PDK’së, të martën në Vushtrri, shpërndanë libreza për ish-zyrtarë të AAK’së rivale, LDD’së dhe ORA’s. Por, kësaj here, PDK goditi edhe dy parti partnere, LDK’në dhe AKR’në. Anëtarëve më të rinj të PDK’së, Hashim Thaçi u premtoi mundësi të barabarta. Partia më e atakuar, AAK, thotë se Thaçi po vepron në frikë


Nga Shpend Limoni më 21.01.2009 në ora 8:05

Rivaliteti mes Hashim Thaçit dhe Ramush Haradinajt po thellohet përditë e më shumë.

Inatet që ishin shfaqur gjatë muajve të fundit mes dy liderëve duket se do të shtohen edhe më tej, pas një fushate që ka nisur Partia Demokratike e Kosovës për t’u marrë anëtarësi partive kundërshtare.

Në fokus të Thaçit është AAK’ja e Haradinajt, të cilin kreu i PDK’së akoma e shikon si politikanin më sfidues në vend.

Javën e kaluar AAK kishte marrë një goditje në Drenas, ku sipas ish-kryetarit të degës, komplet struktura e partisë kishte kaluar në PDK.

Ndërsa sulmi i radhës ka ndodhur të martën në Vushtrri, ku zyrtarë të PDK’së kanë lexuar më se 30 emra të politikanëve lokalë të kësaj komune që i janë bashkuar kësaj partie, shumica prej tyre ish-anëtarë të AAK’së.

Por, një goditje Thaçi kësaj here u ka dhënë edhe partive partnere, LDK’së dhe AKR’së, sikurse edhe LDD’së dhe ORA’s, të cilave po ashtu ua ka marrë nga disa anëtarë.

Zyrtarë të PDK’së, në kushte anonimiteti, thonë se fushatën e tyre do ta vazhdojnë edhe nëpër komuna tjera si Prishtina e Prizreni, pa dhënë detaje tjera.

Krerët më të lartë të PDK’së janë duke trajtuar me seriozitet këto transfere të anëtarësisë.

Lideri i PDK’së, Hashim Thaçi, bashkë me bashkëpunëtorët më të ngushtë, Hajredin Kuçin dhe Fatmir Limajn, të martën kanë shpërndarë personalisht libreza për anëtarët më të rinj të partisë në Vushtrri.

Simpatizantët e PDK’së u kanë duartrokitur personave që kanë kaluar në taborin e tyre, përderisa janë treguar më entuziastë kur përmendej emri i ndonjë aktivisti të vjetër të LDK’së që tani po merrte librezën e partisë më të madhe në vend.

Zyrtarë të PDK’së, aktivistët që kanë kaluar në anën e tyre, i kanë quajtur “njerëz që nuk deshën të jenë spektatorë të një epoke të re, por deshën dhe erdhën të bashkohen në PDK”.

Ish-kandidati për kryetar të Vushtrrisë nga radhët e AAK’së, Menderes Ibra ka mbajtur një fjalim ku ka folur në superlativ për partinë e re.

Ndërsa Hashim Thaçi, si lider, u ka premtuar të gjithë të anëtarësuarve se do të trajtohen si të barabartë në PDK. Thaçi ka folur për forcimin e partisë, duke thënë se një parti e fortë garanton institucione të forta. “Jeni të mirëpritur, ju uroj punë të mbarë”, ka thënë Thaçi.

Sidoqoftë, zyrtarë të AAK’së thonë se veprimet e kreut të PDK’së janë një tregues për frikën nga zgjedhjet.

“Ceremonitë që po i organizon z. Thaçi vetëm tregojnë se ai po frikohet nga zgjedhjet. Prandaj mendon që, përmes marrjes së një anëtarësie të vogël të ndonjë partie, ta rritë epërsinë e subjektit të tij”, ka thënë Isufi për Express të martën.

Ndërsa vetë lideri i AAK’së, Ramush Haradinaj, i cili sërish është në telashe me partitë në pushtet për shkak të vendimit për mosmbajtjen e zgjedhjeve nacionale, ditë më parë duke komentuar ikjen e disa anëtarëve në degën e Drenasit, kishte deklaruar se nuk ka bërë sa duhet partia në Drenas.

Ramush Haradinaj, që nga momenti i lirimit nga Tribunali i Hagës, ka hedhur akuza të rënda në adresë të rivalit të tij, Hashim Thaçit. Nga ana tjetër, kryeministri aktual vazhdimisht i ka injoruar këto akuza.

Veprimet e fundit të Thaçit, duke goditur degët e AAK’së, duket të jetë kundërpërgjigja e tij për Haradinajn.

Deri më tash, Haradinaj kishte gjetur argumente për t’u përballur me Thaçin në çështjet e qeverisjes. Mbetet të shihet se cila do të jetë kundërpërgjigjja e tij ndaj veprimeve të fundit të Thaçit në Drenas e Vushtrri.


marr nga gazeta expres.