[Llapjani_HH]

Ngriten pensionet dhe pagat e punëtorëve të adiministratës publike

Qeveria e Kosovës vendosi sot që të rris pagat për punonjësit e administratës publike për 10 përqind dhe ngritjen e pensioneve deri në 12 përqind. Kryeministri Hashim Thaçi tha se ngritja është në përputhje me ngritjen e përgjithshme ekonomike në vend dhe zbatimi i saj pritet të fillojë në pagat e muajit janar.
Mijëra të punësuarit në administratën publike prej këtij muaji do të kenë paga për 10 përqind më të larta. Vendimi është marrë në mbledhjen e sotme të qeverisë dhe kryeministri Hashim Thaçi e vlerësoi të rëndësishme.
Ngritja e pagave në sektorin publik është deklaruar nga qeveria Thaçi si njëri ndër prioritetet kryesore. Gjatë vitit të kaluar janë rritur pagat e punonjësve të arsimit por megjithë ngritjet paga mesatare në administratën publike konsiderohet e ultë. Po sot qeveria vendosi që të ngris edhe pensionet. Varësisht nga kategoria ngritja do arrijë deri në 12 përqind. Qeveria miratoi sot edhe rregulloren për organizimin e punës në Sekretariatin e Këshillit të Sigurisë së Kosovës dhe disa projektligje, si dhe vendosi që të ndajë edhe 100 mijë euro për ndërtimin e shtëpive në lagjen “Kroi i Vitakut” në veri të Kosovës.
RTK


Banorët e Lagjes së Boshnjakëve kërkojnë zgjidhje për veriun

“Pasi që ju nuk po na ruani, erdhëm ne që t’ju ruajmë”, “Kthim të banorëve në veri”, “Ndaloni strukturat paralele kriminale”, janë disa nga parullat me të cilat banorët e Lagjes së Boshnjakëve protestuan para Qeverisë së Kosovës. Banorët e Lagjes së Boshnjakëve kanë kërkuar nga institucionet e Kosovës që sa më shpejt të dalin me një zgjidhje për veri dhe t’i plotësojnë kërkesat e tyre.
Fevzi Beqiri, përfaqësues i “Lagjes së Boshnjakëve”, ka thënë se kemi ardhur të protestojmë para qeverisë për shkak të gjendjes së tmerrshme prej pas luftës. Ai tha se protestuesit kanë bërë me dije se do të ndalojnë kujdestaritë, por nëse ndodh ndonjë dhunë, djegie, apo vrasje, atëherë përgjegjësia do të bie mbi Qeverinë e Kosovës dhe autoritetet ndërkombëtare në Kosovë. Beqiri tha se është kërkuar nga institucionet që sa më shpejt të dalin me një zgjidhje për veri dhe t’i plotësojnë kërkesat e tyre dhe të mos heshtin sikurse kanë heshtur që nëntë vjet që prej pasluftës.
RTK


Prishtine, pjesëtarët e TMK-së sot në ditën e dytë të protestave

PRISHTINE- Mbi 200 ish-pjesëtarë të Trupave Mbrojtëse të Kosovës protestuan sërish sot para ndërtesës së Qeverisë në Prishtinë. Ata kërkojnë ngritjen e një komisioni që të rishqyrtojnë vendimin për mospranimin e tyre në Forcën e Sigurisë.

Protestuesit kërkuan takim me kryeministrin Hashim Thaci dhe kërcënojnë se nëse nuk do të ketë ndonjë zgjidhje për ta atëherë "brenda 24 orëve do të shkatërrojnë gjithë atë që kanë dhuruar për 20 vjet për ndërtimin e shtetit".
Ish-pjesëtarët e TMK`së u bënë thirrje zyrtarët të Ministrisë së Forcës së Sigurisë, që të mos e vazhdojnë rekrutimin pjesëtarëve të rinj, pa u zgjidhur problemi i tyre.

Aktualisht një delegacion prej 6 anëtarësh përfaqësues të protestuesve po bisedojnë me kryetarin e Komisionit për Siguri në Kuvendin e Kosovës, Rrustem Mustafa.

Incidentet po shoqërojnë fillimin zyrtar të punës së Forcës së Sigurisë në Kosovë më 21 janar 2009.

Mbi 100 pjesëtarë të ish-Trupave Mbrojtëse të Kosovës që u pasuan nga Forca e Sigurisë protestuan të enjten, 22 janar, në Prishtinë në shenjë pakënaqësie me mospërfshirjen e tyre në FSK dhe mënyrën e përzgjedhjes së pjesëtarëve të kësaj force. Forca e Sigurisë e Kosovës do të numërojë 2500 pjesëtarë, do të përfshijë rreth 1000 ish pjesëtarë të TMK-së.

Po në mbrëmjen e së enjtes një shpërthim i fuqishëm dëmtoi kazermën e FSK-së në Pejë. Sipas policisë së Kosovës
Mjeti shpërthyes dyshohet të jetë predhë ose mortajë dore. Një grup hetimor po mbledh provat për të zbuluar autorët e kësaj ngjarjeje.
BalkanWeb


Kosovë, shpërthim në kazermën e FSK-së në Pejë

• Shpërthimi ndodhi nje ditë pas fillimit zyrtar të punës së FSK-së në Kosovë. Mësohet se nuk ka të lënduar por dëmet materiale konsiderohen të jenë të mëdha. Autoritetet e policisë kanë bllokuar zonën ku gjendet kazerma e Forcës së Sigurisë dhe kanë filluar hetimet.


PEJE- Një shpërthim i fuqishëm ndodhi mbrëmë në kazermën ku janë vendosur Forcat e Sigurisë së Kosovës, në Pejë, në perëndim të kryeqytetit të Prishtinës.

Policia thotë se nuk ka të lënduar por dëmet materiale konsiderohen të jenë të mëdha. Ende nuk ka të dhëna mbi motivet e kësaj ngjarjeje, të dyshuar apo të arrestuar për këtë akt kriminal

Zëdhënësi i Policisë së Kosovës për rajonin e Pejës Avni Gjevukaj tha për Kohavisionin se policia është në vendin e ngjarjes dhe është duke i vazhduar hetimet.
Autoritetet e policisë kanë bllokuar zonën ku gjendet kazerma e Forcës së Sigurisë dhe kanë filluar hetimet.

Sulmi ndodhi një ditë pasi Forcat e Sigurisë së Kosovës morën zyrtarisht punën duke zëvendësuar mbi 3000 trupa të TMK-së

Ende nuk është e qartë se kush mund të jetë pas sulmit. Serbia- e cila nuk njeh pavarësinë e Kosovës dhe insiston që ajo të jetë pjesë e saj- ka deklaruar se do të dërgonte një notë proteste në Organizatën e Kombeve të Bashkuara kundër krijimit të FSK-së.
Sipas Beogradit FSK paraqet rrezik për stabilitetin në tërë Ballkanin Perëndimor.

Krijimi i FSK-së ka lënë të pakënaqyr edhe disa nga ish anëtarë të TMK-së. Të enjten dhjetëra ish anëtarë të TMK-së protestuan pasi mbetën jashtë FSK-së.

Komandat Lejtant Gjeneral Sulejman Selimi, një ish ushtar i UCK-së ka thënë se FSK do të përbëhet nga 2500 trupa me armatim të lehtë, të cilët do të ruajnë sigurinë në Kosovë nën mbikëqyrjen e 15 mijë trupave paqëruajtëse të NATO-s.
BalkanWeb