[Peja-Boy]

Kanë mbërritur në Austri katër fëmijët e familjes Zogaj nga fshati Kalican i Istogut. Nga kampi i azilantëve të Hungari, Albani (19), Alfredi (17), Albona (9) dhe Albini (7), të hënën janë bashkuar me nënën Nurien dhe motrën Arigonën në Austri. Udhëtimi i tyre nga kampi Debreczen në Hungari është bërë në mënyrë shumë të thjeshtë, vetëm me tren. Werner Ertel, gazetari i televizionit austriak ORF 2, i cili ndodhej në familjen Zogaj, shpjegoi për Express se katër fëmijët kanë shfrytëzuar trenin për t’u bashkuar me nënën e tyre.
“Nga ky qytet ata kanë marrë trenin në drejtim të Budapestit, nga aty në drejtim të Vienës dhe prej atje kanë mbërritur në qytezën, ku jeton nëna dhe motra e tyre”, citon gazetari austriak, fjalët e fëmijëve të familjes Zogaj. Sipas fëmijëve, në kufirin ndërmjet Hungarisë dhe Austrisë nuk i ka pyetur askush ngase nuk ka pasur ndonjë kontroll.
Shkuarja e tyre nga Kosova deri në Austri është bërë pa asnjë dokumentacion, pasi kufirin ndërmjet Serbisë dhe Hungarisë, fëmijët e kanë kaluar në të zezë, për t’u arrestuar nga policia e këtij shteti, ku kishin rreth dy javë që ishin vendosur në një kamp refugjatësh. Katër fëmijët dhe babai i tyre kanë më shumë se një vit që janë kthyer në Kosovë pasi autoritetet austriake nuk iu kishin pranuar azilin.
Në atë kohë është dashur të kthehet e tërë familja, por në atë moment Arigona, motra e tyre, është arratisur për t’u strehuar në një kishë. Për këtë arsye policia ka lejuar edhe nënën e tyre Nurien të qëndrojë në Austri derisa të gjendet vajza Arigona, por në ndërkohë ajo (Nuria)ka pësuar krizë nervore, kur ka kuptuar se burri i saj në Kosovë (Xhevat Zogaj), i ka braktisur fëmijët. Fëmijët kanë qëndruar për më shumë se një vit sa andej e sa këtej në Kosovë, derisa në fund të vitit të kaluar janë nisur drejt Hungarisë.
Ky rast është shndërruar në debat të nxehtë ndërmjet pozitës dhe opozitës në Austri si dhe opinionit publik dhe ka zgjuar interesim të jashtëzakonshëm tek mediet austriake.