[Shpat]

TIRANË Ã¢â‚¬“ Pedagog në Universitetin Politeknik, student kantoje i një profesori izraelit, pastor në kishën "Zdrukthëtari hebre" dhe njëkohësisht oponent i ligjeve disa-mijëvjeçare të fizikës e të matematikës. Klement Qerimi së shpejti pret të nxjerrë në dritë librin "Gabimet matematikore në shkencat e zbatuara inxhinierike", në bëshkëpunim me shkencëtarin Jozef Shuman (Joseph Schuman). "Më bëri shumë përshtypje fakti që asnjë prej pedagogëve apo mësuesve nuk e kanë vrarë ndonjëherë mendjen në lidhje me ligjet e fizikës e matematikës. I kanë shpjeguar ndoshta mekanikisht, por pa u thelluar shumë", thotë pedagogu, i cili me të njëjtën forcë që adhuron shkencat ekzakte, është edhe besimtar kristian. Ai thotë paraprakisht se në libër dalin gabime që të befasojnë, ku hidhen poshtëë shkencëtarë të mëdhenj si Galileo Galilei, Isak Njuton, e shumë të tjerë. Mathologjisti Shuman i ka nisur kërkimet para 25 vjetësh, ndërsa pedagogu Qerimi ka 5 vjet që punon së bashku me profesorin hebre, banues në Kaliforni. Vetëm nëpërmjet postës elektronike, pasi Shuman nuk ka qenë kurrë në Shqipëri. Por ç'e lidh shkencëtarin Shuman me vendin tonë? Mirënjohja. Hebrenjtë jo vetëm që nuk janë vrarë në Shqipëri, por janë trajtuar si miq të veçantë. Janë strehuar dhe janë ushqyer nga shqiptarët. Kështu, në shenjë mirënjohjeje, Shuman ndoshta nuk mund të bëjë shumë, por po i "dhuron" vendit tonë një libër, frut i një pune gjysmëshekullore. Për herë të parë ai do të botohet në Shqipëri, në shqip dhe në anglisht. Më vonë, mbase ky libër mund të botohet në rang botëror, ku i dihet. Gjithçka, sipas Qerimit, varet nga reagimet që do të ketë dhe sa do të kuptohet nga mbarë opinioni publik. Në një intervistë për gazetën "Dita", pedagogu i Universitetit Politeknik shpjegon se si u lidh me shkencëtarin hebre, përmbajtjen e librit dhe planet në vazhdim.



Zoti Qerimi, ç'rol keni ju në librin "Gabimet matematikore në shkencat e zbatuara inxhinierike" dhe sa kohë është punuar për të nxjerrë një produkt të tillë?



Unë jam bashkëautor, por duhet thënë se rolin kryesor e ka pasur profesor Jozef Shuman, matologjist me origjinë hebreje dhe banues në shtetin e Kalifornisë. Ai ka punuar 25 vjet rresht për një gjë të tillë, ndërsa unë kam vetëm 5 vjet që jam angazhuar. Roli im konkret? Kam ndërhyrë në të gjithë kapitujt, duke bërë shtesa apo heqje të pjesëve të tyre. Natyrisht profesori i nderuar i ka mirëpritur të gjitha sugjerimet e mia.



A ka ndikuar ky profesor në marrjen seriozisht të matematikës dhe fizikës?



Profesor Shuman më ka nxjerrë jashtë mendimit të këndvështrimit të ngushtë që ekziston në komunitetin shkencor. Dhe për këtë i jam shumë mirënjohës.



Ku jeni mbështetur që keni "guxuar" të sfidoni ligjet e shkencëtarëve të mëdhenj?



Në fakt, libri është mbështetur në një studim të hollësishëm të origjinës së formulave që mësojmë në librat shkollorë: Si kanë dalë? A kanë kuptim? Si duhen shkruar duke dhënë formulime të reja, etj. Në të gjitha studimet që ka bërë profesor Shuman, i është referuar materialeve arkivorë origjinale të kohës, duke arritur të shkohet edhe te autorësia e tyre.



Kur mund ta kenë në dorë lexuesit këtë libër dhe pse duhet ta blejnë?



Libri pritet të dalë shpejt në treg, pasi është në proces botimi. Është diçka e rrallë dhe produkt i një punë gjysmëshekullore. Duhet të kemi parasysh se profesori Shuman disponon dokumente origjinale që do të befasonin gjithkënd. Pra, ky nuk është një libër sa për të thënë se po botohet diçka, por është konkret, frut i një pune të madhe kërkimore e shkencore. Vlen për t'u theksuar se do të botohet për herë të parë në Shqipëri, si mirënjohje për atë çka kanë bërë shqiptarët për hebrenjtë. Do të jetë në anglisht dhe shqip.



Si jeni njohur me profesorin Shuman?



Nëpërmjet profesori tim të kantos, Nathaniel Brocki, i cili jeton prej 10 vjetësh në Shqipëri dhe është një nga bas-baritonët më të mëdhenj të Botës. Ai e ka pasur shok fëmijërie Shumanin dhe kjo bëri që edhe unë të miqësohesha me të.



Po profesori juaj i kantos si është gjendur në Shqipëri?



Nathanieli është hebre. Pikërisht në shenjë mirënjohjeje për atë ç'ka ka bërë populli shqiptar, ka ardhur 10 vjet më parë në Shqipëri si misionar kristian (misionar i dashurisë). E do vendin tonë me gjithë shpirt dhe do që të vdesë këtu, edhe pse në vendin e tij ka 4 fëmijë dhe 6 nipër e mbesa që e presin.



Si është realizuar komunikimi juaj me Shuman, sepse thatë që nuk ka ardhur kurrë në vendin tonë?



Nëpërmjet postës elektronike. Kështu ka funksionuar që në fillim. Ai më dërgonte artikujt nëpërmjet e-maileve dhe unë me të njëjtën mënyrë i dërgoja ndryshimet që kisha bërë.



JETËSHKRIMI



Kush është Klement Qerimi



TIRANË - Ka lindur në Berat më 22 gusht 1972. Është diplomuar në Universitetin Politeknik të Tiranës, në Fakultetin e Inxhinerisë Mekanike, Dega Energjetikë. Ka kryer një sërë specializimesh, ndërsa zotëron disa gjuhë të huaja. Aktualisht ai kryen edhe rolin e pastorit në Kishën e Zdrukthëtarit Hebre në Tiranë, duke predikuar fenë kristiane. Është anëtar themelues i Shoqatës Termo-Energjitike të Shqipërisë, si dhe i Shoqatës së Kimistëve. Gjithashtu, Klement Qerimi është student i Kantos, me Profesor Nathaniel Brocki. Bashkautor me Prof. Nikolin Pema dhe Dr. Ing. Ramadan Alushi në një studim të paraqitur në Konferencën e Parë të Shoqatës Termo-Energjitike të Shqipërisë, njëkohësisht bashkëautor me Prof. Nikolin Pema në studimin lidhur me Strategjinë e trajtimit të të gjithë tipeve të mbeturinave në Shqipëri. Ai është anëtar i Forumit Gjithë-shqiptar "Me Kosovën për Kosovën", së bashku me personalitetet më të shquara të Kombit Shqiptar si prof. Rexhep Qosja, Ismail Kadare, prof. Teki Tartari, prof. Emil Lafe, etj. Ka qenë anëtar në lëvizjen studentore kundër diktaturës si dhe anëtar i grevës së urisë për heqjen e simboleve të diktaturës nga universitetet e Shqipërisë. Vazhdon të jetë anëtar i shoqatës së ish-të Përndjekurve Politikë.