[Scooby-Doo]

Dijetari i mirënjohur sirian Sheikh Hussam-Zeddin u ka bërë thirrje dijetarëve muslimanë që t’i thellojnë njohuritë e tyre rreth Krishterimit dhe feve të tjera. Mesazhi erdhi si përgjigje ndaj çështjes së ngritur kohëve të fundit mbi nevojën dhe domosdoshmërinë e njohjes së religjioneve të tjera. Në konferencën e organizuar nga muslimanët dhe të krishterët në Universitetin Kombëtar të Singaporit - NUS - (National University of Singapore) është i pranishëm edhe dijetari dhe rektori i Universitetit Al-Fat’h të Sirisë, i cili është duke mbajtur një sërë ligjëratash në disa institucione të Republikës së Singaporit.
Duke folur në gjuhën arabe para 100 profesorëve dhe mësimdhënësve të medresesë El-Xhuneid (Madrasatu El-Juneid El-Islamijeh), ai tha: “Një ndër obligimet parësore për dijetarët muslimanë është mësimi dhe njohja me religjionet e tjera.” Ai përveç të tjerash shtoi: “Prania e shumë religjioneve është një nga planet e të Madhërishmit dhe me gjithë mospajtimet dhe ndasitë teologjike që ekzistojnë mes fesë islame dhe religjioneve të tjera, kjo nuk lë të kuptohet se nuk mund të jetohet në paqe.” Duke pasur parasysh se në Kuran gjenden një mori ajetesh që thërrasin për luftë dhe ndarje me pasuesit e besimeve të tjera, i pyetur në lidhje me këtë Sheikh Hussam Zeiddin u përgjigj: “Ajetet e tilla kuranore kanë zbritur gjatë kohës së luftërave dhe ndodhive të asaj kohe dhe si rrjedhojë ajetet me përmbajtje të kësaj natyre nuk duhen zbatuar në këtë kohë, në të cilën dominon paqja dhe harmonia mes popujve.” Gjatë këtyre ligjëratave, temë diskutimi ishte edhe kriza shkencore apo intelektuale me të cilën janë duke u ballafaquar muslimanët kohëve të fundit. Në lidhje me këtë, Sheikh Hussam Zeiddin u bëri thirrje muslimanëve që t’u kthehen çështjeve islame dhe të rimendojnë rreth ripërtëritjes së tyre, proces ky i njohur tek dijetarët si përtëritje apo texhdid.
Në fund të mesazhit, ai shtoi se bindjet e forta religjioze, pa dallim feje, nuk do të thotë t’i japim fund harmonisë dhe unitetit shoqëror.