[Llapjani_HH]

Qeveria dhe ICO nisin dialogun me serbët

Me ndihmën e shefit të ICO-së, Pieter Faith, zyrtarë të lartë të Qeverisë së Kosovës kanë zhvilluar të premten një takim me përfaqësuesit e komunitetit serb, ku u bisedua për zgjidhjen e problemeve të rrymës, dokumentacionit e të tjera.

Qëllimi i këtij dialogu - ku kanë marrë pjesë shefi i Zyrës Civile Ndërkombëtare, Pieter Feith, zëvendëskryeministri Hajredin Kuçi, si dhe ministra të kabinetit qeveritar - thuhet se është integrimi i pakicës serbe, për faktin se pjesa dërmuese e këtij komuniteti vazhdon të jetojë mbi bazat e organizimit paralel kundruall institucioneve vendore.

Zëvendëskryeministri Hajredin Kuçi tha se qëllimi i dialogut është që serbët të integrohen dhe ta ndjejnë vetën pjesë të shoqërisë dhe institucioneve të Kosovës.

Ndërkohë, Rangjel Nojkiq, një përfaqësues i serbëve të Kosovës, theksoi se bisedimet ndërmjet serbëve dhe institucioneve të Kosovës ende po mbahen nën dyer të mbyllura dhe me modelimin e shefit të ICO-së, Pieter Feith. Ai tha se të gjitha problemet edhe ashtu duhet të zgjidhen përmes dialogut dhe pret që një formë e tillë të vazhdojë deri në gjetjen e zgjidhjeve të pranueshme.

Kohët e fundit, serbët kanë protestuar në disa raste në lidhje me ndërprerjen e rrymës, e cila u ishte shkyçur atyre për shkak të mospagesës me vite. Po ashtu, ata nuk i pranojnë dokumentet e Republikës së Kosovës dhe as tabelat e regjistrimit të makinave.

Të gjitha këto probleme, bashkë me ato që ndërlidhen me shëndetësinë dhe arsimin nëpër komuna, pritet të vazhdojnë të shtrohen në dialogun tashmë të filluar, deri në gjetjen e zgjidhjeve me të cilat do të pajtoheshin edhe institucionet e Kosovës, por edhe përfaqësuesit serbë. /Radio Evropa e Lirë/
Telegrafi


Diaspora kursen 2.3 miliardë €, në Kosovë sjell 470 milionë

Në një studim të prezantuar vlerësohet se kursimet e diasporës kosovare për vitin 2008, sillen mbi 2.3 miliardë euro, kurse dërgesat e tyre janë rreth 470 milionë euro, shuma këto që konsiderohen si mundësi potenciale për investime.

Hulumtimi është pjesë e projektit “Devinpro” nga “Nexus” dhe Qendra për studime ekonomike e sociale e Tiranës, ndërsa studimi bazohet në rreth 715 anketa me emigrantë dhe 800 anketa me familjet e emigrantëve nga Gjermania, Zvicra, Austria, Anglia, Italia dhe SHBA.

Po ashtu, referuar studimit vërehet se 50.5% e emigrantëve dëshirojnë të kthehen në Kosovë, pas një afati kohor dhe pjesa më e madhe e tyre dëshirojnë të investojnë në ekonominë kosovare, kryesisht në prodhimtari, në bujqësi, në ndërtime dhe shërbime etj.
Telegrafi


Krasniqi: Sekretaria Koordinuese e Qeverisë ka hartuar vendimin për Çollakun

Në përpjekje për të arsyetuar mënyrën e emërimit dhe pagën retroaktive të Bekim Çollakut si Shef të Stafit të kryeministrit, zëdhënësi i qeverisë, Memli Krasniqi, brenda një prononcimi bie ndesh disa herë me fjalët që thotë. Fillimisht, për të është krejt në rregull që emërimi i Çollakut është bërë duke iu referuar Kushtetutës pa hyrë në fuqi. Thotë se njëjtë është vepruar edhe në shumë raste të tjera, në Qeveri e në Kuvend. Krasniqi pohon se emërimi i Çollakut ka ardhur nga një vendim i bërë gati nga Sekretaria Koordinuese e Zyrës së Sekretarit të Përhershëm, që është staf civil. Mirëpo ai që e ka miratuar përfundimisht këtë vendim, është vetë kryeministri Hashim Thaçi, i cili edhe e ka nënshkruar atë, duke iu referuar kompetencave të tij në Kushtetutë për ta marrë vendime politike. Kohavision merr vesh se vendimi është përpiluar nga njerëzit politikë të Thaçit, e ai pastaj e ka nënshkruar. Zyra ligjore nuk është konsultuar fare për një vendim të tillë. Sidoqoftë, pozita e Shefit të Stafit, që e bën Çollakun numër dy në Qeverinë e Kosovës, mbi vetë ministrat, është gjë e re e kësaj qeverie. Krasniqi thotë se ka qenë ide e USAID-it që e ka ndihmuar me këtë projekt. Pozita e Shefit të Stafit nuk figuron në asnjë organogram të qeverisë, dhe në faqen e Kryeministrit, Çollaku figuron si këshilltar politik. As në draftin e projekt-ligjit të ri të qeverisë nuk ka asnjë referencë për këtë post.
KTV


Edhe një vendim tjetër i publikuar me shumë bujë nga kryeministri Thaçi nuk respektohet nga vartësit e tij

Dhjetëra zyrtarë të Qeverisë së Kosovës preferojnë të udhëtojnë vetë çdo mëngjes nga shtëpia në vendin e punës me veturë zyrtare, pasi që janë nisur nga shtëpitë e tyre me automjetet që kanë pasur të parkuara aty. Edhe pse një gjë e tillë ndalohet me vendimin 04/3 të Qeverisë së Kosovës për përdorimin e veturave zyrtare, punonjësit e administratës nuk e kanë problem t’i mbajnë veturat në shtëpitë e tyre. Në pikën 2 të vendimit thuhet se vetëm kryeministri, zëvendëskryeministrat, ministrat, zëvendësministrat, sekretari i përhershëm dhe shefi i i kabinetit të kryeministrit do të kenë në përdorim 24 orë automjetet zyrtare për qëllime zyrtare, për të vazhduar me një nen më poshtë: I cili thotë se Automjetet të përdoren edhe nga zyrtarët e tjerë gjatë orarit të punës për nevoja zyrtare me fletë udhëtime. Por, mos respektimi i këtij vendimi ka rezultuar me vjedhjen e tri veturave zyrtare, një në Ministrinë e Komuniteteve dhe Kthimit, një në e Ministrinë e Punëve të Brendshme dhe një në Ministrinë e Shërbimeve Publike. Zëdhënësja e Ministrisë, Majlinda Hulaj, e pranon vjedhjen e veturës në këtë ministri. Po ashtu, KTV ka konfirmuar nga zyrtarë në ministritë përkatëse edhe humbjen e veturave zyrtare në pronësi të Ministrisë së Brendshme dhe asaj të Kthimit I pyetur të komentojë mosrespektimin e rregulloreve, zëdhënësi i qeverisë, Memli Krasniqi, ka paralajmëruar ndëshkimin e atyre që kanë lejuar të shkelen vendimet e qeverisë. Zëdhënësi i policisë, Arbër Beka, duke konfirmuar rastet e lajmëruara për humbjen e veturave zyrtare, thotë se ato trajtohen si çdo veturë tjetër që raportohet si e vjedhur. Orari i punës përfundon në orës 16, dhe disa zyrtarë pa shoferë kthehen në shtëpitë e tyre po me vetura zyrtare
KTV