[Llapjani_HH]

Ndahen në Vushtrri

AKR’ja braktisi koalicionin qeverisës me PDK’në në Vushtrri, duke hapur kështu shumë dilema. Në radhë të parë, nëse Behgjet Pacolli po e sheh si të nevojshme ftohjen e raporteve me Kryeministrin Thaçi, disa muaj para fillimit të fushatës zgjedhore. Apo, nëse pas takimit me Presidentit Sejdiu, ai ka filluar ta shohë LDK’në si bashkudhëtare në jetën e tij politike.

Raportet e shkëlqyera mes Liderit të PDK’së dhe atij të AKR’së duket të mos jenë reflektuar edhe në qytezën e Vushtrrisë, ku deri të enjten këto dy subjekte qeverisnin së bashku.

Dega e AKR’së në Vushtrri, përmes një komunikate për media, njoftoi se ka vendosur ta braktis koalicionin me PDK’në, si pasojë e mosrespektimit të marrëveshjes për ndarjen e posteve.
“Arsyeja e këtij vendimi është mosrespektimi i marrëveshjes së koalicionit për bashkëqeverisje dhe ndarje proporcionale të pozitave politike nga subjekti i PDK’së”, ka thënë për Express Tasim Gubetini, Kryetar i Degës së AKR’së në Vushtrri.

Prishja e koalicionit ndodhë vetëm disa muaj përpara mbajtjes së zgjedhjeve lokale, duke i hapur kështu mjaftë probleme PDK’së, e cila, pothuajse, e ka të pamundur që tash të gjejë ndonjë partner tjetër në Vushtrri.
Përveç kësaj, AKR’ja duke braktisur koalicionin me PDK’në, në këtë fazë, ka hapur shumë dilema. Dilema kryesore është nëse Lideri i AKR’së Behgjet Pacolli po e sheh si të nevojshme ftohjen e raporteve me Kryeministrin Hashim Thaçi, disa muaj para fillimit të fushatës zgjedhore. Apo nëse, pas takimit me Presidentit Sejdiu, ai ka filluar ta shoh LDK’në si bashkudhëtare në jetën e tij politike.

Të dy këto mundësi janë mohuar nga Behgjet Pacolli, të enjten.
“Absolutisht jo. Nuk ka bazë për të ndryshuar dhe nuk do të ndryshojë asnjëherë raporti ynë me koalicionin qeveritar, pra jo vetëm më PDK’në, por me koalicionin qeveritar. Pavarësisht zhvillimet në Degën e Vushtrrisë, pavarësisht takimit tim me Presidentin Sejdiu”, ka thënë Pacolli për Express.
Sipas tij, prishja e koalicionit në Vushtrri është çështje e zhvillimeve që kanë ndodhur në atë qytezë.

“Unë besoj se ata kanë pasur të drejtë që e kanë ndërpre koalicionin me PDK’në. Ne nuk mund të dalim prej principeve tona. Ne jemi munduar çdokund që të jemi konstruktiv, kooperativë dhe bashkëpunues me partnerin qeveritar. Por si duket në Vushtrri nuk ka ekzistuar gatishmëri për këtë nga partneri ynë”, ka thënë ai.
“Kjo është e drejtë e plotfuqishme e degës së Vushtrrisë dhe ne nga qendra nuk mund të ndërmarrim asgjë, pasi që jetojmë në një shtet demokratik. Ne vetëm e përshëndesim vendimin e tyre”, ka shtuar Pacolli.

AKR’ja, edhe pse në opozitë, për shkak të raporteve të shkëlqyera mes Liderit të saj dhe Kryeministrit aktual, ashtu sikurse bashkëpunimit me PDK’në në disa komuna, ka bërë që të konsiderohet pjesë e pushtetit. Për shumë kënd, kjo mund t’i krijoi AKR’së vështirësi gjatë zgjedhjeve të ardhshme lokale. Prandaj edhe prishja e koalicionit në Vushtrri, mund të perceptohet si hapë taktik i AKR’së.

Kjo mohohet nga Behgjet Pacolli.
“Nuk e kisha thënë këtë. Deri tash kanë bashkëjetuar AKR dhe PDK në Vushtrri, tash nuk ka baza për bashkëjetesë. Kaq”, ka thënë ai.
Nga ana tjetër, Xhavit Halitit, anëtar i Kryesisë së PDK’së, i duket e pabesueshme që AKR’ja ka braktisur koalicionin në Vushtrri.
“Për mua pak është e pabesueshme që ka ndodhur ajo”, ka thënë Haliti për Express, të enjten.

“Megjithëkëtë, nuk besoj se PDK’ja do të jetë pa oferta tjera politike në Vushtrri”, ka shtuar ai.
Xhavit Haliti nuk beson se prishja e koalicionit mes AKR’së dhe PDK’së në Vushtrri duhet parë në një kontekst më të gjerë.
“Nuk besoj se është politikë e AKR’së. Megjithatë mbetet të shihet më pas kjo çështje”.
Deri të enjten, PDK dhe AKR kanë qeverisur në pesë komuna së bashku. Pas prishjes së koalicionit në Vushtrri, këto dy parti do të vazhdojnë të qeverisin së bashku në Mitrovicë, Kamenicë, Gjilan dhe Ferizaj.
Gazeta expres


Veteranët kritikojnë Ahmetin

Organizata e Veteranëve të Luftës të UÇK, e ka quajtur të dhimbshme marrëveshjen e kryetarit të BDI, Ali Ahmeti, me partnerin e koalicionit, Nikola Gruevski.

Kryetari i OVL të UÇK, Besim Hoda, duke komentuar marrëveshjen mes liderëve të VMRO DPMNE dhe BDI për mbështetje në raundin e dytë, deklaroi se fjala është për një marrëveshje të dhimbshme për të gjithë shqiptarët në Maqedoni, ndërkaq mospublikimi i saj do t’i hakmerret vetë BDI.

“Kjo është një marrëveshje që do të jetë e dhimbshme, për ata që e nënshkruan por edhe për gjithë shqiptarët në Maqedoni. Besoj se zgjedhjet e 5 prillit do të dëshmojnë të kundërtën. Unë nuk kuptoj sesi njerëzit arrijnë ta delegjitimojnë vetveten. Nuk besoj se do të ketë ndonjë shqiptarë, qoftë i angazhuar politikisht ose jo, që do të ishte në gjendje që pa asnjë kusht të mbështes njërin nga kandidatët maqedonas. Shqiptarët nuk e meritojnë një gjë të këtillë”, theksoi Hoda.

Sipas tij, si strukturë e ish-pjesëtarëve të UÇK, OVL është thellësisht e indinjuar me të gjitha zënkat dhe devijimet brenda spektrit politik shqiptar.

“Shqiptarët në Maqedoni nuk e meritojnë këtë, ndërsa fajtorë për këtë gjendje janë të gjitha strukturat politike, pa përjashtim”, u shpreh përfaqësuesi i OVL-UÇK, derisa kërkoi një takim urgjent të liderëve shqiptarë para zgjedhjeve, për t’i dhënë kahje të drejtë procesit zgjedhor.
Gazeta expres