[Llapjani_HH]

Preteni: 113 zyrtarë dyshohen për korrupsion gjatë vitit 2008

Fenomeni i korrupsionit është prezent në të dyja nivelet e pushtetit, si dhe në vet gjyqësorin i cili është i obliguar që ta luftojë këtë dukuri, ka thënë sot drejtori i Agjencisë Kundër Korrupsionit, Hasan Preteni, me rastin e publikimit të raportit për vitin 2008. Sipas Pretenit rastet e raportuara do të duhej të adresoheshin tani nga sistemi i drejtësisë.

Asnjë institucion nuk mund të mburret që Agjencia kundër korrupsionit nuk ka pranuar informata për korrupsion, tha drejtori i kësaj agjencie, Hasan Preteni, sot në një takim me gazetarë. Ai tha se ky fenomen është prezent në të dyja nivelet e pushtetit, si dhe në vet gjyqësorin i cili është i obliguar që ta luftojë këtë dukuri. Ky fenomen është i trashëguar dhe është prezent aty ku ka para publike, nga 53 informatat e dorëzuara në prokurori për vitin 2008 dyshohen 113 zyrtarë.
Sipas, tij natyra korruptive më e theksuar është marrja e ryshfetit, nënshkrimi i kontratave të dëmshme, përdorimi i autoritetit për kryerje të veprimeve të paligjshme ndërsa si më e theksuara mbetet procesi i tenderimit.

Preteni, nuk e bëri publike vlerën e përgjithshme të dëmit që i është shkaktuar Kosovës me 146 informatat e pranuara, 53 prej të cilave i janë përcjellur prokurorit përkatës.

Nga 53 informatat e përcjella në prokurori këtë vit, për shkak të natyrës e lëndëve të trajtuara ka qenë e vështirë t’iu përcaktohet vlera, thotë me keqardhje z. Preteni. Vitin e kaluar kemi tentuar që atyre 47 informatave t’ia përcaktojmë vlerën, mirëpo për këtë vit ka shumë veprime korruptive ku vlera materiale kishte me qenë shumë vështirë të përcaktohet. Është puna e favorizimeve, transaksionet e tokave, vlerat janë të ndryshme, po fundi i fundit mbetet që gjyqësori me aktivitetet e veta, me vendimet e veta të vendosë a është veprim korruptiv apo jo, thotë Preteni.

Në informatat e përcjella në prokurori dyshohet niveli më i lartë i ministrisë përkatëse, thotë Preteni, edhe pse ata nuk janë nënshkrues të tenderëve.

“Parimisht, ne e përcjellim hierarkinë dhe në çdo ministri nëqoftëse një aktivitet pretendohet se është kryer me veprime korruptive, në informatat tona që i përcjellim në prokurori është niveli më i lartë i asaj ministrie edhe pse në dokumentacione, në materialet tenderuese ata nuk janë të nënshkruar. Mirëpo, konform ligjit janë të obliguar që të dinë për të gjitha transaksionet, të gjitha qarkullimet për mënyrën se si shpenzohet buxheti nëpër ato institucione. Në mesin e këtyre 53 informatave janë diku të atakuar 113 zyrtarë”, sqaron z. Preteni.

Zyrtarët e Agjencisë Kundër Korrupsionit, bashkëpunimin me EULEX-in e vlerësojnë si mundësi të luftimit të këtij fenomeni.
RTK


Qeveria kritikohet për mungesë të manifestimit për anëtarësimin e Shqipërisë në NATO

E gjithë Kosova ka festuar hyrjen e Shqipërisë në NATO tha sot zëdhënësi i Qeverisë së Kosovës Memli Krasniqi, megjithëse ka pasur mjaft kritika për institucionet e vendit sa i përket organizimit të ndonjë manifestim lidhur me këtë. Ai tha se nuk kanë ndaluar asnjë parti apo institucion tjetër të organizojnë manifestime të tilla. Ndërkohë, shumë qytetarë thonë se mungesa e ndonjë manifestimi në atë ditë është gabim që nuk bën të përsëritet.

Ngjarja historike e hyrjes së Shqipërisë në NATO ishte një festë e madhe për të gjithë shqiptarët kudo që janë. Institucionet e Kosovës dhe të gjithë qytetarët e saj kanë festuar me këtë rast, tha zëdhënësi i qeverisë së Kosovës, Memli Krasniqi, i cili shtoi se institucionet e Kosovës kanë uruar institucionet dhe qytetarët e Shqipërisë për hyrjen në NATO.
Kritikave të shumta për mos-organizim të ndonjë manifestimi nga ana e institucioneve tona qeveritare, zëdhënësi Krasniqi, tha se askush nuk e ka ndaluar askënd që të bëjë manifestime me rastin e kësaj dite.

“Askush nuk i ka ndaluar partitë opozitare që të organizojnë diçka vet, nëse me të vërtetë kanë pasur kaq shumë dëshirë të organizojnë ndonjë manifestim. Kështu që nëse ata realisht nuk kanë shprehur gatishmërinë për të organizuar një manifestim, nuk është fer që të shfrytëzojnë situatën për të thënë pse qeveria nuk ka organizuar diçka”, ka thënë Krasniqi.

Zëdhënësi i qeverisë, shtoi se nëse qeveria nuk ka pasur ndonjë organizim formal, askush tjetër nuk e ka bërë këtë, kështu që sipas tij, janë të gjithë të barabartë në këtë drejtim.

Ndërkaq, kryetari i Bordit të Klubit Euroatlantik, që është hapur ditë më parë, Agim Çeku, mendon se është lëshuar ky rast për këtë ngjarje historike për Shqipërinë dhe të gjithë shqiptarët. Sipas tij, ky mund të jetë edhe qëndrim politik, që siç tha ai, Kosova të largohet pak nga identiteti kombëtar.

“Gjëra të tilla nuk përsëriten shpesh dhe mendoj që është një rast i humbur, një rast shumë i mirë që edhe në të dëshmojmë ta ndajmë gëzimin me Shqipërinë. Uroj që të jetë në pyetje papërgjegjësia, por kam frikë që është pak edhe qëndrimi politik, që Kosova të largohet pak nga identiteti kombëtar, dhe kjo assesi nuk duhet të ndodhë. Duhet sidomos në këtë kohë tranzicioni, ne duhet të jemi shumë të kujdesshëm ta ruajmë identitetin tonë kombëtar, vlerat tona kombëtare, t’i promovojmë ato”, ka thënë z. Çeku.

Ndërkohë, qytetarët mendojnë se mos-manifestimi nga ana e Prishtinës për hyrjen e Shqipërisë në NATO, është një mangësi e institucioneve tona qeveritare.

“Është kënaqësi që Shqipëria pas shumë vjetësh diku rreth 100 vjet është futur në NATO. Kjo është një shpëtim edhe për Kosovën dhe gjithë rajonin ku banojnë shqiptarët. Për institucionet tona që nuk kanë përgatitur është një mangësi, ma së miri e dinë ata. Pasi ata gjithmonë kanë qenë neve, na kanë përkrahë në çdo moment çdo krizë edhe ne duhet kur ata argëtohen së bashku të argëtohemi edhe ne me ta”, thotë një qytetar.

“Si mund të ndodhë diçka në Shqipëri e mos me qenë të gëzuar edhe ne kosovarët. Ne jemi një komb dhe sa është e mirë për Shqipërinë është edhe ma e mirë hyrja e Shqipërisë në NATO edhe për Kosovën. Ndoshta festa më e madhe është dashur të jepet këtu në sheshin tonë se sa në Tiranë. Unë mendoj se institucionet e Kosovës e kanë humbur rrugën në oborr”, thotë qytetari tjetër.

Mendoj së është dashur meqë jemi një komb duke pasur parasysh se Shqipëria në çdo manifestim të Kosovës ka marrë pjesë me organizime në Tiranë. Ndoshta mund të them se neve na mungon një traditë e organizimit të manifestimeve, qoftë nga ana e Shqipërisë që e bëri ose nga ana e shqiptarëve tjerë si, Preshevë apo Maqedoni. Besoj që herëve të tjera nuk do të lëshohet ky gabim, besoj që do të krijohet edhe tek në një traditë e manifestimeve të festave shqiptare në përgjithësi”, deklaron në mikrofonin e Radio Kosovës një qytetar i Prishtinës.


Megjithatë, edhe përfaqësuesit e institucioneve tona edhe qytetarët e Kosovës, vlerësojnë se hyrja e Shqipërisë në NATO është një ngjarje historike jo vetëm për Shqipërinë, por për të shqiptarët kudo që janë, sepse sipas tyre, i gjithë rajoni bëhet pjesë e sigurisë globale.
Qytetarët, mendojnë se të gjitha festat shqiptare janë festa të të gjithë shqiptarëve në rajon e më gjerë, dhe duhet t’i shënojnë ato kudo që ndodhen.
RTK


Vlerësohet e qetë gjendja e sigurisë në Mitrovicë

Përgatitjet për fillimin e rindërtimit të një numri të shtëpive në Kroin e Vitakut janë në fazën e fundit dhe deri kah mesi i muajit do të fillohet me punë. Kështu tha sot kryetari Komunës së Mitrovicës, Bajram Rexhepi, duke pohuar se “Nuk mund të mbetemi peng i politikës së të kaluarës. Kthimi i të zhvendosurve nuk ka të bëj asgjë me politikë”.

Përfaqësuesit e strukturave politike dhe ato të sigurisë, vlerësuan sot se java e fundit në Mitrovicë, ka qenë e qetë dhe pa ndonjë incident serioz që do të reflektohej në gjendjen e përgjithshme të sigurisë.

Në këtë takim Bajram Rexhepi, përmendi një letër që është duke qarkulluar në veri, ku një këshill organizativ i banorëve serbë të lagjes Kroi i Vitakut, të cilën ata e quajnë Bërxhani, bëjnë thirrje që të pengohet rindërtimi në atë lokalitet.

Që është një provokim dhe gjëra të tilla janë të pritshme, meqë shumë herë politikanë dhe liderë serbë në Beograd dhe në Kosovë kanë paralajmëruar haptas një politikë destruktive, tha Rexhepi.

“Këto lloj letrash nuk duhet të injorohen krejtësisht, mirëpo as nuk duhet t’u jepet rëndësi e madhe, meqë strukturat paralele serbe në veri janë duke provuar të gjitha mjetet me qëllim të destabilizimit të situatës”, tha Rexhepi.
RTK