[Llapjani_HH]

Hajnat dëmtojnë varrezat e Dëshmorëve të Kombit në Shipol, të Mitrovicës

Persona të pandërgjegjshëm e të paidentifikuar deri tash, kanë dëmtuar në mënyrë vandale varrezat e dëshmorëve të kombit në Shipol, ka njoftuar drejtori i Drejtorisë për Shërbime Publike dhe Infrastrukturë të Kuvendit të Komunës, Rasim Veseli.
Ai duke e dënuar ashpër këtë vepër të personave keqbërës, ka sqaruar se janë dëmtuar kubëzat në hapësirat e varrezave, në një gjatësi prej rreth 40 metrash, për të vjedhur më pastaj nga aty kabllon elektrike që ishte e shtrirë nën kubëza, po në këtë gjatësi.

Duke pas parasysh se keqbërësit pamëshirshëm po i dëmtojnë këto varreza në mënyrë të vazhdueshme, duke vjedhur rrethojën metalike dhe së fundi edhe kabllon elektrike dhe me qëllim të parandalimit të kësaj dukurie të shëmtuar, drejtori Veseli njoftoi se e ka angazhuar Kompaninë “Loti” që të mënjanojë përkohësisht, përkatësisht t’i ruaj varrezat gjatë 24 orëve, derisa ky problem të zgjidhet përfundimisht.
Veseli bëri të ditur po ashtu se është shpallur tenderi për asfaltimin e dy korsive të rrugës kryesore dhe rregullimin e trotuareve në të dyja anët e rrugës, që do të kushtojë rreth 110 mijë euro, ndërsa që po gjatë këtij viti do të rregullohet edhe ndriçimi i varrezave, projekt ky që do të kushtojë rreth 50 mijë euro. Të gjitha këto mjete janë siguruar nga buxheti i komunës, thuhet në një njoftim të Zyrës për informim të KK Mitrovicë.
RTK


UNMIK-u paralajmëron konflikte në veri

Zyrtarë të UNMIK-ut në Mitrovicë kanë tërhequr vërejtjen për mundësinë e konfrontimeve dhe fillimit të dhunës ndërmjet serbëve dhe shqiptarëve në pjesën veriore të Mitrovicës, shkruan "Koha Ditore".

Banorët serbë të lokacionit Kroi i Vitakut, vitin e kaluar kanë kundërshtuar rindërtimin e shtëpive të shqiptarëve, me ç’rast asnjë banor shqiptar nuk është kthyer aty që nga koha e luftës. Ndërkohë, përfaqësuesi rajonal i UNMIK-ut në Mitrovicë, ka deklaruar se UNMIK-u po mundohet të arrijë një marrëveshje të pranueshme për të dyja palët.

“Nëse kjo nuk arrihet, kam frikë se do të ketë konfrontime në këtë pjesë të Mitrovicës, dhe atëherë është e mundur që në atë konfrontim të ndërhyjë policia, EULEX-i, madje edhe KFOR-i”, ka thënë përfaqësuesi rajonal i UNMIK-ut në Mitrovicë.
Telegrafi


Qeveria Thaçi e korruptuar, sikur qeveritë e mëhershme

Qeveria e Hashim Thaçit ka trashëguar traditën e korrupsionit nga qeveritë e kaluara. Raporti vjetor i Agjencisë Kosovare kundër Korrupsionit, flet për shkallë të ndryshme korrupsioni në të gjitha institucionet, në krye të të cilave qëndron Qeveria e Kosovës. Në raport thuhet se natyra e korrupsionit është e larmishme që nga marrja e ryshfetit, nënshkrimi i kontratave të dëmshme, përdorimi autoritetit për kryerje të veprimeve të paligjshme, etj.. Vlera e përgjithshme e rasteve të dyshuara për korrupsion është 3 milion e 600 mijë euro.
KTV

Kosovë, Haradinaj akuzon Thaçin për nepotizëm. Reagon zëdhënësi i qeverisë

Kryeministri i Kosovës Hashim Thaçi ka vendosur në pozita të ndryshme njerëz të besueshëm të tij, madje edhe familjarë. Kështu shprehet kryetari AAK-së Ramush Haradinaj duke përmendur si shembull për këtë emërimin e Gani Thaçit, vëllait të kryeministër në pozitën e koordinatorit për polisa në Bordin e Kompanive të Sigurimit. Qeveria ka reaguar duke thënë se emërimi është bërë nga vetë bordi i këtyre kompanive.


“Në rast se e shihni me prokurim veç e veç si në kompanitë publike qoftë në ministri, do t’i gjeni njerëzit e grupit të korruptuar të tipit SHIK dhe të tipit të njerëzve të besuar të kryeministrit. Shembulli i fundit i vendosjes së vëllait të kryeministrit, z. Gani Thaçi në bordin e kompanive të sigurimeve, në sektorin e polisave, si koordinator, është dëshmia më e mirë se çka po i ndodh vendit” tha Haradinaj.

“Ky është një frustrim i radhës i z. Haradinaj dhe neve na vjen keq që ai ende vazhdon me akuza qesharake dhe të pabaza. Mund të themi se atributet e tij inkriminuese ai nuk mund t’ia mveshë tjetërkujt. z. Gani Thaçi ka punuar për vite të tëra në Asociacionin e Kompanive të Sigurimeve, nuk është që nga tash. Ai ka një përvojë të gjatë dhe aty është emëruar nga vetë kompanitë e sigurimeve. Qeveria e Kosovës nuk ka kurrfarë relacioni në këtë drejtim” tha zëdhënësi i Qeverisë Memli Krasniqi.

Haradinaj ka kritikuar mënyrën se si kryeministri Thaçi ka emëruar shefin e tij të kabinetit, Bekim Çollakun duke i dhënë atij një pagë prej 1100 euro, ndërsa zëdhënësi Krasniqi tha se pozita e shefit të kabinetit është marrë nga përvojat amerikane dhe evropiane të qeverisjes.
ALSAT


Thaçi suspendon tre zyrtarë

Kryeministri i Kosovës Hashim Thaçi ka marrë vendim për suspendimin e dy zyrtarëve të Qeverisë dhe një të policisë, të cilët dyshohet se kanë kryer vepra korruptive. Këto suspendime vinë vetëm disa orë pasi Agjencia Antikorrupsion publikoi raportin ku përmenden shumë afera korruptive të zyrtarëve të Qeverisë dhe të ndërmarrjeve publike.

Thaci në një konferencë për shtyp, nuk ka dashur t`i përmend emrat e të suspenduarëve, por tha se është duke pritur nga ministrit përkatëse marrjen e masave të kërkuara.

“Pa dashur të paragjykoj fajësinë apo pafajësinë si Kryeministër, pak minuta më parë kam urdhëruar ministrat përkatës që në përputhje me kompetencat e tyre të bëjë suspendimin. Këtë hap e ndërmarr për zhvillimin e proceseve hetimore, pa ndërhyrje politike”, tha ai, në një konferencë për gazetarë, pas mbledhjes së jashtëzakonshme të Qeverisë.
Gazeta expres


Tre Ministra, pa Ministri

Projektligji që përcakton organizimin dhe funksionimin e Qeverisë, do të sjellë risi në ekzekutivin kosovar. I mundëson Kryeministrit të emërojë deri në tre Ministra pa portofol. Konsultimet janë ende të hapura. Hajredin Kuçi thotë se Ministrat pa portofol mund të mbulojnë tri çështje me rëndësi: Zbatimin e Planit Ahtisaari, Veriun e Kosovës dhe proceset integruese në NATO dhe BE.

Projektligji për Qeverinë e Republikës së Kosovës, që pritet të dërgohet në Parlament, pas mbledhjes së radhës së Kabinetit Qeveritar, i lejon Kryeministrit të emërojë deri në tre Ministra pa portofol.
Kjo sjell një risi në ekzekutivin kosovar.

Në Nenin 19 të këtij Projektligji, thuhet se Ministrat pa portofol janë anëtarët e Qeverisë të cilët udhëheqin fusha të caktuara të politikës qeveritare, të identifikuara si prioritete, pa qenë në krye të një portofoli klasik ministror. Ata vendosen pranë Kryeministrit dhe asistohen nga struktura të cilat i takojnë Qeverisë.

Ministra pa portofol ka ose ka pasur në Qeveri të shteteve të ndryshme të botës, përfshirë shtetet të Ballkanit.

Zëvendëskryeministri Hajredin Kuçi thotë se kjo është një mundësi juridike që i jepet jo vetëm Qeverisë aktuale, por edhe qeverive të ardhshme.

“Ligji bëhet për afat të gjatë, e jo vetëm për këtë kohë”.

Sipas tij, edhe kur të hyjë në fuqi ky ligj, nuk do të thotë se është obligim i Qeverisë që patjetër të ketë edhe Ministra pa portofol në përbërjen e saj.
Megjithëkëtë, Kuçi shprehet se Qeveria Thaçi do të shfrytëzonte këtë mundësi, ndonëse kjo çështje ende është e hapur.
Zëvendëskryeministri përmend tri fusha të cilat do të mund të mbuloheshin ‘Ministrat pa Ministri’.

“Momentalisht nuk e kemi menduar saktësisht, por me siguri do ta shfrytëzojmë, për shembull, për çështje të implementimit të Dokumentit të Presidentit Ahtisaari. Mund jetë pjesa e Veriut të Kosovës, një prej fushave të interesimit, ose proceset integruese qoftë në NATO apo në Unionin Europian”, ka thënë Kuçi, duke shtuar se të gjitha këto janë vetëm supozime sepse nuk ka paraprakisht duhet të merret vendim.

Në momentin kur të hyjë në fuqi ligji, Kryeministri ka të drejtë të emërojë Ministra pa portofol me procedurë të njëjtë sikurse emërimi i ministrave klasik.
Në Nenin 3 të Projektligjit thuhet se Ministër pa portofol mund të jetë edhe ndonjëri nga Zëvendëskryeministrat.

Ministri pa portofol mund të emërojë deri në dy këshilltarë politikë, përkatësisht tre këshilltarë më pak se një ministër klasik.
Qeveria aktuale ka 17 ministra. Tetë nga radhët e PDK’së, gjashtë nga LDK dhe tre nga komunitetet pakicë.

Zëvendëskryeministri Kuçi thotë se për çdo vendim për shtimin e dikastereve të reja në Qeveri do të ketë konsultime me partnerët e koalicionit, por në veçanti me LDK’në.
Projektligji që përcakton organizimin dhe funksionimin e Qeverisë, mënyrën e punës dhe procedurat e vendimmarrjes, bashkëpunimin mes Qeverisë dhe institucioneve tjera të përcaktuara me Kushtetutë, është ende në fazën e konsultimeve.

“Është bërë një draft, jo krejt final, ngase ka nevojë për konsultime edhe vendore, por në veçanti për konsultime me praktikat e mira ndërkombëtare”, ka thënë Kuçi, për Express, të dielën.
Ai thotë se Ligji jep një mundësi për një ndarje të plotë në mes të shërbyesve civilë, por edhe administratës publike dhe ekzekutivit të vendit.

“Ka pasur dilema për Ligjin për Qeverinë, por ajo që garantojmë, që është filozofi e Qeverisë, e Kryeministrit dhe gjithë të tjerëve, është një ndarje e qartë në mes të të emëruarve politikë dhe shërbyesve civilë. Me këtë Ligj nuk do të preket kjo vijë, por përkundrazi do të forcohet”, ka thënë Zëvendëskryeministri Kuçi.

Kur të hyjë në fuqi ky Projektligj, do të shfuqizonte dispozitat kundërthënëse të ndonjë ligji tjetër apo rregulloret e UNMIK’ut që aktualisht rregullojnë punën e ekzekutivit të Kosovës.
Gazeta expres