[Zana_ch]

Don Lush Sopi shpallet “Qytetar nderi” i Mitrovicës

Në një ceremoni rasti të organizuar sot (e mërkurë) në sallën e KK të Mitrovicës është ndarë titulli “Qytetar nderi” për Don Lush Sopin, për ndihmën që iu kishte dhënë ai si famullitar i kishës në Zllakuqan, të përndjekurve mitrovicas nga regjimi serb në vitin 1999. Po ashtu mirënjohje janë ndarë edhe për Don Marjan Demaj si dhe për përfaqësuesit e fshatrave Zllakuqan, Zabllaq, Gremnik, Xërxë dhe për kryetarin e Kukësit për mirëpritjen e treguar.
Biografinë për Don Lush Sopin e lexoi kryesuesi i kuvendit të komunës, Ahmet Tmava, i cili tha se ai është një personalitet i formuar në përmasa kombëtare.
”Mirënjohje e veçantë për Don Lushin është falënderimi i popullatës mitrovicase dhe i viseve të tjera për ndihmën që iu kanë dhënë atyre gjatë luftës”, tha Tmava.

Ndërsa kryetari i komunës, Bajram Rexhepi, i cili ndau titullin “Qytetar nderi” dhe mirënjohjet për ata që kanë ndihmuar qytetarët e dëbuar të Mitrovicës, gjatë luftës së vitit 1999, vlerësoi si heroike ndihmën që kishin ofruar popullata dhe klerikët fetarë gjatë viteve të luftës për të dëbuarit.

Më tepër për nismën qytetare për të shpallur qytetar nderi Don Lush Sopin dhe për të ndarë mirënjohje për popullatën e Zllakuqanit, Zabllaqit, Gremnikut, Xërxës dhe Kukësit, foli drejtori për Shëndetësi dhe Mirëqenie Sociale, Shaqir Demiri, i cili tha se mitrovicasit janë mirënjohës përjetë për ndihmën e ofruar në ato ditë të rënda.

Në këtë ceremoni qenë të pranishëm edhe kryetari i Kukësit, Hasan Halilaj, i cili tha se ka qenë një kohë e trishtueshme, por që u përballua me krenari. “Ne jemi krenarë që kemi mundur të ndihmojmë”, tha ai.

Ndërsa Qytetari i nderit i Mitrovicës, Don Lush Sopi, theksoi se ata që dinë të respektojnë të kaluarën e kanë të ardhmen e sigurt.

“Regjimi serb kishte urdhëruar popullatën që të mos pranonte dhe ndihmonte refugjatët, ndërsa ne i këshilluam që t’u ndihmojmë dhe u thamë që nëse pjesëtarët e regjimit u thonë se pse u keni ndihmuar, t’iu tregojnë se ju ka sugjeruar kisha”, tha Don Lush Sopi.

Zyrtarët komunalë kanë ndarë një dhuratë modeste në këtë rast edhe për 10 vjeçarin Valdrin Rrecaj, i cili kishte lindur në vitin 1999 në Zllakuqan.



www. rtklive.com