[Llapjani_HH]

7 ministra nuk deklarojnë pasurinë

Numri i zyrtarëve të lartë të cilët kanë pasur për obligim të deklarojnë pasurinë e tyre në vitin 2009 ka qenë 800, ku nga ky numër 619 apo 78.8% e tyre e kanë deklaruar pasurinë, ndërsa 173 është numri i zyrtarëve që nuk e kanë deklaruar pasurinë, 8 të tjerë janë zyrtarë të lartë të liruar nga detyra që kanë ushtruar dhe nuk bartin detyrim për deklarimin e pasurisë.

Afati ligjor për deklarimin e pasurisë nga zyrtarët e lartë të institucioneve publike të Republikës së Kosovës i paraparë me Ligjin kundër Korrupsionit (LKK) ka përfunduar më 31 mars 2009.

"Në mesin e zyrtarëve të cilët e kanë deklaruar pasurinë janë edhe liderët kryesorë të institucioneve të Republikës së Kosovës si: Presidenti i Republikës, kryeministri, kryetari i Kuvendit, dy zv/kryeministrat. Ndërsa nga niveli i ministrave pasurinë e tyre e kanë deklaruar dhjetë ministra nga 17 sa përbëjnë Qeverinë e Republikës së Kosovës", thuhet ne komunikaten e Agjencisë Kundër Korrupsionit.

Para fillimit të marsit janë shpërndarë formularët e deklarimit të pasurive ndërsa, zyrtarët e Agjensionit kanë mbajtur trajnime me personat që ishin pikë kontaktuese në mes të AKK-së dhe institucionit përkatës (një nga të gjitha institucionet publike) në mënyrë që ata ta kenë më të lehtë mbushjen e formularëve.
Telegrafi

Pagat: Sejdiu 2.873, Krasniqi 2.420, Thaçi 1.442 euro

Një vendim i qeverisë për rritjen e pagave 10 % të punëtorëve të administratës publike, sipas një përllogaritjeje të bërë nga televizioni Kohavision, ka shkuar edhe në favor të krerëve të lartë politikë.

Nga vendimi i 23 janarit kanë përfituar të gjithë të paguarit nga buxheti i Kosovës, me disa përjashtime. Kështu, pagat u janë rritur edhe kryeministrit e ministrave të qeverisë.

Në këtë mënyrë, paga e kryeministrit Hashim Thaçi nga 1.312 euro ka shkuar në 1.442. Ministrat që e kishin pagën 1.150 euro tashmë e kanë 1.265 euro.

Rroga i është rritur edhe kryeparlamentarit Jakup Krasniqi, që i ka shkuar nga 2.200 euro në 2.420 euro, ndërsa pagat u janë rritur edhe deputetëve, të cilët në vend të 980 eurove sa kanë marrë deri më tash, do të marrin 1.078 euro.

Për ta bërë real ndryshimin, sipas këtij televizioni, është përkujdesur edhe presidenti i Kosovës. Paga e presidentit Fatmir Sejdiu tashmë ka mbërritur në 2.873 euro, dhe ai vazhdon të mbetet presidenti më i paguar i rajonit.

Fatmir Sejdiu, president i Kosovës – 2.873
Traian Basescu, president i Rumanisë – 2.500
Bamir Topi, president i Shqipërisë – 2.100
Boris Tadiq, president i Serbisë – 1.900
George Ivanov, president i Maqedonisë – 1.200

Ministri i Shërbimeve Publike, Arsim Bajrami, thotë se është në përfundim ligji për pagat e zyrtarëve të lartë politikë, që do ta ndalë praktikën e caktimit të rrogave nga vetë institucionet.

Pagat e zyrtarëve të lartë janë bërë shpesh objekt diskutimi publik. Presidenti Sejdiu propozoi që ta ketë rrogën prej 3100 eurosh vitin e kaluar, por u tërhoq pas presionit medial. Ligji për presidentin thotë se ai duhet ta ketë pagën më të lartë se kryeparlamentari Krasniqi për së paku 25%, gjë që nuk ndodh aktualisht.
Telegrafi

Kosova braktisë mbledhjen e CEFTA-s

Delegacioni i Kosovës ka braktisur takimin e CEFTA-s që po mbahet në Podgoricë të Malit të Zi. Shkak janë bërë autoritetet malazeze të cilat nuk kanë pranuar që të heqin mbishkrimin e UNMIK-ut dhe në vend të tij të vendoset emri i Kosovës.

Në takimin e CEFTA-s, merrte pjesë një delegacion i Ministrisë së Bujqësisë, Pylltarisë dhe Zhvillimit Rural , të MTI dhe të Doganave në Kosovë.

Takimi kishte për qëllim rishikimin e politikave tregtare bujqësore, duke përfshirë edhe masat mbrojtëse, subvencionet në eksport si dhe këmbimi i informatave për tregtinë e produkteve bujqësore.

Takimi ishte i nivelit të nën-komitetit për bujqësi dhe masa sanitare e fitosanitare.

Kosova gjatë këtij viti ka patur probleme me CEFTA për shkak se dy vende Serbia dhe Bosnja kanë bllokuar eksportet e vendit tonë për shkak të vulës së Republikës së Kosovës, ndërsa i pranojnë vetëm me ato të UNMIK-ut.

Ministri malazez Branimir Gvozdenoviç, në cilësinë e kryesuesit të sekretarit të CEFTA-s, pati deklaruar dhe më herët se Kosova në këtë asociacion nuk mund të prezantohet pa UNMIK-un dhe nuk ka arsye që të debatohet për bllokadën e mallrave kosovare nga Serbi e Bosnja.

Marrveshja CEFTA është nënshkruar dhe pranuar nga të gjitha vendet e Europës Juglindore dhe parashef shkëmbimin e mallrave pa norma doganore. Ajo ka zëvendësuar marrveshjet biletarale për tregëti të lirë që kanë ekzistuar mes këtyre shteteve.
Telegrafi

QKUK-ja hedh poshtë kërkesën e kryeministrit Thaçi dhe të MSH-së për shkarkimin e mjekut Ilir Tolaj

Ministri Alush Gashi i është bindur urdhrit të shefit të tij, kryeministrit Hashim Thaçi, për të kërkuar shkarkimin e disa zyrtarëve, por jo edhe drejtori i QKUK-së, Jusuf Ulaj. Ky i fundit pasi ka shqyrtuar me kujdes kërkesën e Ministrisë së Shëndetësisë, ka vendosur të injorojë thirrjet për shkarkimin e ish- sekretarit të përhershëm të kësaj ministre, Ilir Tolaj, nga pozita e mjekut në QKUK. Drejtori Ulaj thotë se Ministria nuk ka ofruar kurrfarë faktesh se Ilir Tolaj ka shkelur ligjin në klinikën ku punon, ndërsa QKUK-ja nuk mund të përzihet në atë çfarë ka bërë Tolaj në Ministrinë e Shëndetësisë. Madje Ulaj është shprehur i befasuar me mënyrën e komunikimit të Ministrisë së Shëndetësisë me QKUK-në. Ai ka shpjeguar se në e mailin e tij ka arritur dje një komunikatë për media, ku flitet për suspendimin e dy zyrtarëve tashmë të suspenduar. Ndërsa pak më vonë, një email tjetër i Ministrisë së Shëndetësisë ka arritur në postën elektronike të drejtorit të QKUK-së. Në të thuhet : Po ju përcjell urdhrin e Kryeministrit të Republikës së Kosovës për zbatim të datës 6 prill 2009, për pezullim të zyrtarëve të mëposhtëm. Megjithatë, ministri Alush Gashi nuk ka dashur të komentojë mwnyrwn e komunikimit tw vendimeve, duke u shprehur i bindur se urdhri i kryeministrit do të zbatohet. Por në letërkëmbimin e Ministrisë së Shëndetësisë dhe QKUK-së është konfirmuar emri i Haxhi Kamberit si ushtrues detyre i sekretarit të përhershëm. KTV-ja ka mësuar se Kamberi është baxhanaku i Afrim Sylejmanit, ish-sekretar i përhershëm i shkarkuar ditë më parë nga kryeministri Thaçi. Ministri Alush Gashi duke emëruar Kamberin në këtë detyrë ka injoruar vendimin e kryeministrit që për sekretarë të përhershëm të emërojë vartësin e parë më të ulët pas sekretarit të përhershëm ose kryeshefit ekzekutiv. Kamberi deri para pak kohësh ka qenë drejtor i spitalit në Gjakovë. Ndërsa, tri ditë pas suspendimit nga Ministria e Shërbimeve Publike, ish-menaxheri i Prokurorimit, Hysni Krasniqi, i ka quajtur të pavërteta akuzat. Ai ka paralajmëruar padi ndaj Agjencisë Kosovare Kundër Korrupsionit. Krasniqi dyshohet për keqpërdorime në tri lëndë: atë të renovimit të objektit të Rilindjes, për mbikëqyrjen e punëve të Rilindjes dhe Lënda për studimin e fizibilitetit për kompleksin qeveritar. Ndërmarrja e vendimit të kryeministrit Hashim Thaçi për suspendime ka ardhur pas publikimit të raportit të Agjencisë Kosovare Kundër Korrupsionit, kur përmenden 53 raste korruptimi dhe 113 zyrtarë të përfshirë.
KTV

AKK-ja, kërkon nga Komisioni parlamentar për transport sqarimin e pozicionit të deputetit Zef Morina

Teksa po vazhdon zgjerimi i autostradës Prishtinë - Pejë, kërkohet sqarimi i pozicionit të njërit prej kontraktuesve të tij. Ish-ministri i Transportit, deputeti i Kuvendit, Zef Morina, me firmën “Arjak”, ku është bashkëpronar, po përkujdeset për zgjerimin e një pjese të kësaj autostrade. Në të njëjtën kohë ai udhëheq Grupin punues për monitorimin e zbatimit të Ligjit për Rrugët, në kuadër të Komisionit për transport e telekomunikacion. Për këtë fakt ka alarmuar Agjencia Kundërkorrupsion, e cila i ka kërkuar Morinës të sqarojë pozicionin e tij nëpërmjet një shkrese zyrtare. Agjencia vlerëson se ka konflikt interesi në këtë rast. Shefja e Komisionit, Myzejene Selmani, e cila e ka marrë shkresën dje, ka thënë se gjëja më e mirë është që Morina të largohet nga ky komision. Vetë ish-ministri, tash deputeti Morina, thotë se i është përgjigjur Agjencisë Kundërkorrupsion, ku tregon se nuk ka asnjë konflikt interesi për t’i mbajtur këto dy pozicione. Ai thotë se nuk do ta kishte problem të largohet nga komisioni, pasi nuk e vlerëson aspak privilegj. As ministri i Transportit, Fatmir Limaj, nuk sheh asnjë konflikt interesi. Ai thotë se Komisioni nuk ka kompetenca për të monitoruar cilësinë e rrugëve që po shtrohen. Morina e ka udhëhequr këtë grup punues para se firma e tij të fitonte tenderin nga Ministria e Transportit.
KTV

Thaçi kategorizon ministrat në shumë aktivë, aktivë dhe ministra që duhet të jenë më aktivë

Kryeministri Hashim Thaçi edhe në mbledhjen e rregullt të Qeverisë ka kategorizuar ministrat në tri kategori për angazhimin e tyre në punë. Sipas tij, në qeverinë e tij ka ministra që janë shumë aktivë, ka ministra që janë aktivë dhe ka ministra që duhet të jenë më aktivë. Ndërsa, sa i përket rasteve të aferave korruptive të paraqitura nga Agjencia Kosovare Kundër Korrupsionit, Thaçi ka thënë se gjithçka tani është në duart e drejtësisë, e cila e ka mbështetjen e plotë të ekzekutivit. Unë, as Qeveria që drejtoj nuk prejudikojmë rastet apo individët, por respektojmë verdiktin e drejtësisë. Do të vazhdojmë të jemi të pakompromis në luftimin e korrupsionit dhe krimit të organizuar, ka deklaruar kryeministri Thaçi.
KTV