[Tropojani30]

Blerim Latifi i hedh poshtë akuzat e bëra nga AAK-ja se Qeverinë e Kosovës e drejtojnë kriminelët.

Nga Express më 06.05.2009 në ora 9:37
Në një intervistë për të përditshmen “Epoka e Re”, Blerim Latifi i cili është këshilltar politik i Kryeministrit të Kosovës, Hashim Thaçi, në lidhje me këtë çështje, ndër të tjera është shprehur se “ çunakut të AAK-së, sekretar a çka ishte, i them se sikur edhe 200 vjet të ketë jetë, nuk mund t’i shërbejë vendit më shumë sesa që i ka shërbyer Kadri Veseli”.
Kjo është një pjesë e kësaj interviste të gjatë.


Epoka e re: Cili është komenti juaj ndaj akuzave të AAK-së se Kosova po qeveriset nga strukturat kriminale të përbëra nga njerëz që kanë qenë dhe janë pjesëtarë të SHIK-ut?

Latifi: Ka vetëm një shpjegim racional për këto akuza: njerëzit e AAK-së, duke filluar nga kreu i saj, po përpiqen t’i projektojnë atributet e veta tek të tjerët. Me siguri ju kujtohet tregimi për atë kriminelin, i cili, për ta fshehur veten, bërtiste duke bërë me gisht nga të tjerët: kapeni, kapeni kriminelin. Mendoj se një gjë e tillë po përsëritet me rastin e këtyre akuzave. Merreni dhe lexoni raportet e auditimit të qeverisjes në vitet 2004-2007 dhe do të bindeni për këtë. Janë mijëra faqe që do t’i kishin zili edhe organizatat më të famshme mafioze në botë.

Epoka e re : Ata po i quajnë struktura kriminale njerëzit e SHIK-ut.

Latifi: Është turp që nga njerëz që flasin shqip të bëhen etiketime të tilla për djemtë e atij mekanizmi tashmë i shpërbërë, që për vite me radhë, që nga koha e rëndë e luftës, si pjesë e Ushtrisë Çlirimtare të Kosovës, por edhe pas saj, i kanë shërbyer interesave të vendit. Unë do ti thosha atij çunakut të AAK-së, sekretar a çka ishte, se edhe sikur 200 vjet t’i ketë jetë s’do të mund t’i shërbejë vendit më shumë sesa i ka shërbyer Kadri Veseli. As ai e as bashkëpartiakët e tij.

Epoka e Re: Ka qeveria informacione se kush me të vërtetë qëndron në Kosovë prapa krimit?

Latifi: Qeveria e Kosovës ka dhënë dëshmi praktike në politikën e saj të tolerancës zero ndaj korrupsionit dhe krimit të organizuar. Mekanizmat institucionalë që mbulojnë këtë fushë e kanë informacionin e nevojshëm dhe janë duke vepruar me efikasitet në parandalimin e shumë fenomeneve negative. Natyrisht është e qartë se mekanizmat e ndërtuar nga duart njerëzore nuk janë të përkryer. Herë pas here mund të ndodhin lëshime apo defekte. E rëndësishme është se sistemi po funksionon, si një trup i shëndetshëm.

Epoka e Re: Pse atëherë AAK-ja dhe lideri i saj Ramush Haradinaj po i sulmojnë institucionet?

Latifi: Ata po i pengon dhe po vuajnë nga fakti si progresi i përgjithshëm i Kosovës identifikohet me Qeverinë e kryeministrit Thaçi. Nuk ka asnjë shpjegim tjetër të arsyeshëm për frustrimet e tyre të përditshme. Partitë që kanë rënë nga pushteti me faqe të zezë, të njollosura nga keqpërdorimet e tij, kanë vetëm një rrugë për t’u rikthyer: duhet të merren një kohë të gjatë me pastrimin e vetvetes. Në të kundërtën, e dënojnë veten në shkatërrim