[jonuzi]

Reformat në Shqipëri, shembull edhe për OKB-në
Bota sot (Tiranë)
Kryeministri Berisha takon drejtoren e zyrës për Zhvillim OKB-së, (DOCO), Deborah Landey
Tiranë-Kryeministri i shtetit shqiptar, dr. Sali Berisha zhvilloi një takim me znj. Deborah Landey, drejtore e zyrës se Koordinimit të Veprimeve për Zhvillim të Kombeve të Bashkuara (DOCO), një organizatë që përfaqëson një grup prej 33 fondesh, programe, agjenci, departamente dhe zyra të UN të cilat luajnë një rol të madh në programet e zhvillimit në të gjithë botën. Në këtë takim u diskutua rreth ecurisë së zbatimit të programit “Një OKB” në Shqipëri si një nga vendet pilot të përzgjedhura. Kryeministri Berisha, shprehu vlerësimin e tij për kontributin shumë të madh që programi “Një OKB”, dhe Agjencitë e Kombeve të Bashkuara po japin në mbështetje të prioriteve të rëndësishme për zhvillimin ekonomik, social, mjedisin, barazisë gjinore, në përputhje me agjendën e integrimit evropian të Shqipërisë. Kreu i Qeverisë, Berisha theksoi se qeveria po zbaton me seriozitetin më të madh programin “Një OKB” duke siguruar një koordinim sa më të mirë dhe zbatim me efektivitet të projekteve. Po ashtu, kryeministri e njohu znj. Landey me reformat kryesore dhe progresin qe ka bërë Shqipëria duke mbajtur një rritje ekonomike të qëndrueshme pavarësisht krizës financiare globale, si dhe ulje të ndjeshme të varfërisë siç edhe tregoi raporti i fundit i përgatitur me asistencën e PNUD dhe Bankës Botërore. Ndërkaq, zonja Landey theksoi se është e impresionuar nga reformat dhe progresi që ka bërë Shqipëria dhe veçanërisht në rolin drejtues që ajo ka marrë në zbatimin e programit “Një OKB”. Shembulli i mirë i Shqipërisë dhe eksperienca e fituar në zbatimin e këtij programi do të shërbejë si një model të cilin OKB do ta zbatojë edhe në vende të tjera të botës. Ajo e falënderoi Kryeministrin për mbështetjen e tij personale në ecurinë e mirë të këtij programi si dhe punën e madhe të strukturave qendrore të administratës në zbatimin e tij me sukses.



Nikoqiri i musafirëve nga Gjermania, kryeministri Berisha, merr premtimet të forta për mbështetjen e shtetit gjerman në rrugën e integrimit të Shqipërisë në BE.

Kryeministri Berisha ka takuar edhe kryetarin e grupit parlamentar të Partisë Socialdemokrate në Bundestag-un e Republikës Federale të Gjermanisë, Walter Kolbow.

Në takim u bisedua mbi intensifikimin e bashkëpunimit midis dy vendeve, veçanërisht në fushën ekonomike. Kryeministri Berisha e njohu Z. Kolbow me masat e marra nga qeveria, që e kanë bërë Shqipërinë një vend shumë atraktiv për biznesin e huaj dhe në këtë kuadër, investitorët gjermanë janë të mirëpritur. Kryeministri Berisha vlerësoi edhe bashkëpunimin e frytshëm me Fondacionin Friedrich Ebert dhe fondacionet e tjera gjermane dhe shprehu gatishmërinë për intensifikimin e këtij bashkëpunimi në të ardhmen. Z. Koblow theksoi se Shqipëria është bërë një vend shumë i sigurt në rajon dhe kjo është një arritje e rëndësishme e kësaj qeverie. Siguria është një avantazh shumë i madh i vendit tuaj, të cilin, - theksoi z. Kolbow - ne po ia bëjmë të njohur biznesit gjerman. Z. Kolbow vlerësoi pranimin e Shqipërisë në NATO si një arritje të madhe, e cila përbën edhe një fondament të rëndësishëm për fitimin e statusit të vendit kandidat të BE. Ai theksoi se Gjermania do ta mbështesë fort Shqipërinë në rrugën e integrimit evropian