[pirro]

Çeku në paraburgim deri të shtunën?


Nga Express më 24.06.2009 në ora 13:05

(Update) Autoritetet bullgare ia kanë zgjatur paraburgimin ish-kryeministrit të Kosovës, Agim Çeku, deri të shtunën. Kështu ka bërë të ditur sot kryeprokurori bullgar Nikolaj Kokinov, njoftojnë agjencitë e lajmeve.

Ndërkohë, zëdhënësi i partisë së Çekut - PSD, Gëzim Kasapolli, tha se të gjitha institucionet e Kosovës përfshirë edhe ambasadat në Prishtinë janë angazhuar që Çeku të lirohet. Sipas tij edhe autoritetet bullgare vlerësojnë se kjo çështje është politike.

“Në besojmë, se kemi marrë edhe konfirmimin nga autoritetet bullgare që kjo është një çështje politike dhe se z. Çeku së shpejti do të lirohet nga autoritetet e Bullgarisë”, ka thënë zëdhënësi Kasapolli, transmeton RTK.

Kasapolli njoftoi se një delegacion i Partisë Social Demokrate do të niset sot për në Bullgari për të parë për së afërmi situatën atje, përderisa ka mohuar të ketë neglizhencë të institucioneve të Kosovës në zgjidhjen e këtij problemi.

“Nuk mund të flas për neglizhencën e institucioneve tona, ato deri tash kanë qenë shumë kooperative lidhur me këtë rast, megjithatë duhet një azhurim i gjithmbarshëm i spektrit politik dhe institucioneve tona me qëllim që të bëjnë parandalimin e këtyre ngjarjeve... Nuk ka fajtorë këtu, sepse Serbia është duke punuar me qëllim të uljes së vlerave, së pari të UÇK-së dhe minimit të proceseve në Kosovë”, ka theksuar Kasapolli.

Ish-kryeministri Agim Çeku është arrestuar mbrëmë nga autoritetet bullgare në vendkalimin mes Bullgarisë dhe Maqedonisë, në bazë të një urdhër arresti të Serbisë, i cili është lëshuar në vitin 2002.

Ekspertë të sigurisë konsiderojnë se institucionet kosovare nuk kanë ndërmarrë masa të duhura tek Interpol-i që mos të ndodhin arrestime të tilla ndaj kosovarëve.

Eksperti i çështjeve të sigurisë, Agim Musliu, i ka thënë RTK-së se është një neglizhencë totale e institucioneve të Kosovës që së bashkë me UNMIK-un nga viti 1999 nuk kanë ndërmarrë asnjë hap që të shfuqizohen urdhër arrestet e Serbisë nga Interpoli, duke marrë parasysh se janë qindra persona në këto lista të lëshuara nga Ministria e Punëve të Brendshme të Serbisë.

“Sa i përket institucioneve tona qendrore, është një neglizhencë totale që është e pafalshme. Njerëz që kanë funksione publike, thjeshtë qytetarë të Kosovës, burgosen pa kurrfarë faji dhe gjinden para gjykatave të huaja pa asnjë mbrojtje ligjore nga shteti i Kosovës”, ka shtuar Musliu. Sipas tij, Serbia me këtë po tregon funksionalitetet edhe në institucionet ndërkombëtare, siç është Interpoli.

“Po tregohet se funksionaliteti institucional i Serbisë, po funksionon edhe tek institucionet ndërkombëtare, ndërsa neglizhenca jonë po na kushton shumë shtrenjtë. Paramendoni tani z. Çeku që është një qytetarë i merituar i Kosovës dhe ish komandant i UÇK-së, gjendet në shtetin që na ka njohur edhe ndërkombëtarisht, kjo është skandal për shtetin tonë”, vlerëson Musliu.

Çeku ndodhej në Bullgari me ftesë

Ish-kryeministri i Kosovës, Agim Çeku, po mbahet ende nga policia bullgare, ndërkohë që ish-ministri i Jashtëm bullgar, Solomon Pasi, ka thënë se Çeku ndodhet në vizitë në këtë vend me ftesën e tij.

“Unë kam krijuar kontakte të përhershme me Agim Çekun, me të cilin kemi këmbyer vizita. Ne jemi duke punuar në dy drejtime kryesore - në integrimin e Kosovës në strukturat euroatlantike dhe në veçanti në formimin e Klubit të Atlantikut", ka thënë Pasi për agjencinë bullgare “Focus”.

Zëdhënësi i partisë së ish-kryeministrit Çeku, Gëzim Kasapolli, ka thënë për RTK-në se Ministria e Jashtme Bullgare është duke bërë përpjekje së bashku me atë të Brendshmen që ta sqarojnë te Interpoli se fletarresti është i karakterit politik. Në këtë ngjarje janë angazhuar edhe Ministria e Jashtme dhe ajo e Brendshme e Kosovës si dhe autoritetet më të larta të vendit, tha zëdhënësi Kasapolli.

“Agim Çeku është arrestuar në Geshevo, kur ai ka hyrë në Bullgari, në bazë të një kërkese të Interpolit”, ka thënë zëdhënësja e Ministrisë së Brendshme bullgare, Diana Jankulova, duke shtuar se një gjykatë bullgare, gjatë ditëve të ardhshme, do ta shqyrtojë rastin e tij, njofton Radio Evropa e Lirë.

“Agim Çeku do të mbahet i arrestuar për 72 orë, nga e mërkura”, citon REL kryeprokurorin bullgar, Nikollaj Kokinov.

Kryetari i Partisë Social Demokrate të Kosovës dhe ish kryeministri i Kosovës, Agim Çeku, është ndaluar mbrëmë nga autoritetet e Bullgarisë në vendkalimin kufitar midis Maqedonisë dhe Bullgarisë, derisa ishte duke udhëtuar për të marrë pjesë në një takim me zv/ministrin e Punëve të Jashtme të Bullgarisë, Kucuko dhe drejtorin e klubit të Atlantikut të Bullgarisë Solomon Pasi.

Ndalesa e Çekut është bërë në bazë të fletarrestit të lëshuar nga Interpoli i Serbisë, i përtërirë me datën 9 maj të këtij viti. Ish kryeministri Çeku pritet brenda orësh të lirohet.

Në orët e mbrëmjes të së martës burime të RTK-së kanë bërë të ditur se Ministria e Punëve të Jashtme e Bullgarisë ka kërkuar që të mos publikohet lajmi në mënyrë që të mos politizohet kjo ngjarje, dhe kanë shtuar se pas procedurave kryetari i Partisë Social Demokrate shumë shpejt do të lirohet.

Ndërkohë, nënkryetari i Qeverisë dhe ministri i Brendshëm i Serbisë, Ivica Daçiq, duke komentuar arrestimin e Çekut, ka thënë se Ministria e Drejtësisë duhet menjëherë të kërkojë ekstradimin e Çekut sepse mund të pasojnë presione politike për lirimin e tij.

Çeku është ndaluar edhe disa herë më parë me fletë-arrest të lëshuara nga Serbia, por asnjëherë nuk iu është dorëzuar autoriteteve serbe.