[Llapjani_HH]

KEK ngrin borxhet e konsumatorëve serbë

Korporata Elektro-energjetike e Kosovës iu ofron konsumatorëve serbë të enklavave marrëveshje për fillimin e pagesës së energjisë elektrike, duke ua ngrirë borxhet e mëhershme. Këtë hap, ministrja e Energjisë, Justina Shiroka-Pula dhe udhëheqësi i KEK-ut, Arben Gjukaj, e vlerësojnë shumë të rëndësishëm për KEK-un, i cili deri tani nuk ka pasur fare qasje në këto zona. Por, ata nuk pranojnë se përmes këtij veprimi diskriminojnë konsumatorët shqiptarë.

Vetëm 26 euro mund të paguajnë konsumatorët serbë, për të arritur kontratë më KEK-un, për pagesën e energjisë elektrike. Ndërkaq, çështja e borxheve të tyre, mbi 130 milionë euro, mbetet për t’u zgjidhur në të ardhmen.
Kështu thanë përfaqësues të qeverisë dhe të KEK-ut në një konferencë për media në Qendrën Mediale në Çagllavicë.
Zyrtarët e qeverisë dhe të KEK-ut thanë se plani për futjen e serbëve të enklavave, në sistemin e pagesës së energjisë elektrike, është shumë i mirë dhe jo-diskriminues. Ministrja e energjisë dhe minierave, Justina Shiroka-Pula, thotë se qeveria dhe KEK-u synojnë që përmes politikës ta zgjidhin problemin e pagesës së energjisë elektrike nga konsumatorët serbë, prandaj iu kanë ofruar kontrata përmes të cilave, punëtorëve të KEK-ut iu mundësohet të lexojnë njehsorët elektrikë nëpër enklava dhe konsumatorët të fillojnë të paguajnë energjinë e shpenzuar.

Korporata Elektro-energjetike për rreth një dekadë nuk ka pasur fare qasje në zonat e banuara me shumicë serbe. Ushtruesi i detyrës së drejtorit të KEK-ut, Arben Gjukaj, tha se marrëveshja përfshin furnizimin e rregullt të konsumatorëve me energji, pajisjen me njehsorë elektrikë, aty ku nuk ka dhe nuk janë të mirë teknikisht, të lexohen çdo muaj, të bëhet faturimi dhe pagesa çdo muaj.

Në rast se konsumatorët nuk paguajnë dy muaj me radhë, atëherë do të bëhet shkyçja e tyre, tha Gjukaj.
Nga ana tjetër, ministri i Punës dhe Mirëqenies Sociale, Nenad Rashiq, u shpreh se kjo është një çështje specifike, por për të pasur energji, duhet paguar atë.

“Natyrisht mendoj se kjo është e drejtë themelore e të gjithë neve dhe është pikënisje për stabilitet të një shoqërie sepse nuk mund të presim që të kemi energji nëse nuk paguajmë, dhe, lidhur me këtë mund të pajtohemi të gjithë që do të na jap një shpresë për hapa të mëtejmë që të jemi të sigurt”, tha Rashiq.
Megjithëse kontratat janë vetëm për konsumatorët serbë, ministrja Pula thotë se kjo nuk është diskriminuese për konsumatorët shqiptarë.

Ndryshe, konsumatorët serbë ia kanë borxh KEK-u rreth 132 milionë euro, të papaguara, që nga periudha e pasluftës. Ministrat mohuan çdo kontakt me Qeverinë e Serbisë për pagesën e këtyre borxheve. Ndërkohë, njoftuan se rastet sociale do të trajtohen në mënyrë të barabartë, pa dallim të përkatësisë së tyre etnike.
RTK

Janë kthyer 130 policë serbë pas vendosjes së afatit për kthim

Ka pasur efekt afati i vendosur për kthimin e policëve serbë nga Ministria e Punëve të Brendshme. Vetëm sot deri në orën 14 e 30 janë kthyer 130 policë, ndërsa prej kur është marrë vendimi për suspendimin e tyre janë kthyer 53. Në gjithë territorin e vendit janë kthyer 183 policë të nacionalitetit serb, ka bërë të ditur zëdhënësi i Policisë, Arbër Beka. Sipas zëdhënësit, numri i tyre pritet të rritet deri në afatin e paraparë. Nëpërmjet një komunikate për media edhe EULEX-i ua ka rikujtuar policëve serbë mundësinë e fundit që mund ta shfrytëzojnë gjatë ditës së sotme. Shefi i EULEX-it, Yves de Kermabon, ka thënë se ky është afati i fundit”, ka njoftuar Zyra e informimit e misionit të EULEX-it. Policët serbë kanë bojkotuar punën në shkurt të vitit të kaluar kur Kosova shpalli pavarësinë. Ata u suspenduan nga puna me pagesë deri më 15 maj. Disa prej tyre janë kthyer pas 15 majit, pasi u është ndërprerë paga, por ka edhe shumë të tjerë që nuk e kanë bërë një gjë të tillë.
KTV

Protestë kundër diskriminimit

Prodhuesit e përpunuesit e mishit kanë vendosur që ditën e enjte të protestojnë kundër udhëzimit administrativ, me të cilin Qeveria e Kosovës u ndalon të gjitha kompanive vendore të importojnë ushqime me prejardhje shtazore. Qeveria edhe me tutje nuk jep shpjegime.

Agjensioni i Ushqimit dhe i Veterinës ka shpallur tenderin për zgjedhjen e një kompanie ndërkombëtare, që mund të sjellë nga jashtë ushqim me prejardhje shtazore. Këtë e ka barë vetëm pak ditë pasi që Qeveria e Kosovës ka nxjerrë udhëzimin administrativ, i cili në një mënyrë kompanive vendore ua ndalon futjen në këtë biznes. Kjo ka detyruar përfaqësuesit e kompanive që merren me prodhimin, përpunimin dhe tregtimin me mish, të takohen për herë të dytë brenda javës për të vendosur për masat. Ata ditën e enjte, në shenjë proteste nëpër rrugët e Prishtinës, do të parakalojnë me automjetet e tyre për 90 minuta. Në këtë mënyrë duan të përkujtojnë autorët e udhëzimit se edhe ata janë gjallë.

“Ne sot do ta paralajmërojmë protestën ne Policinë e Kosovës. Nëse deri të enjten nuk do te kemi asnjë shpjegim nga institucionet, atëherë protesta do të bëhet”, tha të hënën Burim Piraj, kryetar i Shoqatës se Prodhuesve, Përpunuesve dhe Importuesve të Mishit.

Piraj thotë se udhëzimi administrativ është në kundërshtim të plotë me nenin 10 të Kushtetutës se Republikës se Kosovës.

“Ekonomia e tregut me konkurrencë të lirë është bazë e rregullimit ekonomik të Republikës se Kosovës”, thuhet në këtë nen.
Në bashkëpunim me Oden Ekonomike, kjo shoqatë ka bërë përpjekje të vazhdueshme për të marrë sqarime nga kryeministri i Kosovës dhe të tjerët që e kanë nxjerrë këtë udhëzim. Duke parë mospërfillje nga institucionet, ata kanë vendosur për protesta.

Safet Gerxhaliu tha se Oda Ekonomike e Kosovës për këtë problem ka kontaktuar kryeministrin dhe disa ministra, por deri tani nuk ka asgjë konkrete. Madje, sipas tij, vetë ministri i Ekonomisë dhe i Financave, Ahmet Shala ka qenë i shokuar me përmbajtjen e udhëzimit, i cili autorizon kompanitë ndërkombëtare të jenë importues të vetëm të mishit.

Gerxhaliu tha se nëse hapet një tender i tillë, atëherë zhvlerësohet imazhi dhe puna e ndërmarrësve në Kosovë.

“Ndërmarrësit në Kosovë mbajnë me shumë se 4000 familje dhe është e papranueshme një punë disavjeçare te dëmtohet kështu”, tha ai.
Sipas tij, udhëzimi i nxjerrë nga qeveria ka përmbajtje të dyshimtë, pasi qe nuk precizohet se nga duhet të jetë kompania ndërkombëtare.
“Kur thuhet kompani ndërkombëtare, atëherë duhet të dihet nga vjen ajo sepse mund te jetë edhe nga Serbia”, tha ai.

Ndërsa Betim Humolli nga kompania “Albi”, tha se për udhëzime të këtilla fillimisht duhet të ketë debate dhe të pyeten vendorët.
“Debatet para udhëzimeve të tilla janë të pashmangshme, e si grup i interesit as që jemi pyetur fare”, tha ai.

Përveç kësaj, mishtarët paralajmëruan për pasojat negative qe do t’i këtë zbatimi i udhëzimit. Sipas tyre, ai mund të shuajë mbi 100 kompani vendore dhe të humben mbi 4000 vende të punës. Pastaj në mënyrë të drejtpërdrejtë rrezikohen bankat komerciale për shkak se këtyre kompanive u pamundësohet kthimi i 300 milionë eurove sa kanë në kredi aktive. Po ashtu kompanitë vendore eliminohen nga konkurrenca, ndërsa një apo dy kompanive të huaja në mënyrë administrative iu besohet një qarkullim mbi 600 milionë eurosh.

Ndryshe Agjensioni i Ushqimit dhe i Veterinës, i cili tani me është ne kuadër te kryeministrisë, ka shpallur tenderin për zbatimin e udhëzimit. Askush nga ky agjension nuk ka marrë pjesë në takimin e prodhuesve dhe përpunuesve të mishit, edhe pse kanë qenë te thirrur për te dhënë shpjegime.

Qaush Kabashi, kryeshef i këtij agjensioni, thotë se Ministria e Bujqësisë dhe ajo e Shëndetësisë do t’i përcaktojnë kriteret për zbatimin e udhëzimit. Ndërsa për eliminimin e kompanive vendore nga konkurrenca, ai arsyetohet se ato nuk i plotësojnë kriteret.

“Asnjë kompani nuk mund ta fitojë tenderin nëse nuk ka një miliard euro qarkullim. Kompanitë tona nuk e kanë këtë kapacitet”, tha ai.

Por, mishtarët nuk e kanë ndërmend të dorëzohen, pasi që llogarisin se e drejta është në anën e tyre. Hapi i parë i tyre është protesta.
Gazeta expres

Aktet represive të xhandarmerisë serbe janë tepër indinjuese

10 shqiptarët të arrestuar në Luginë të Preshevës nga xhandarmëria serbe janë dërguar në godinën e Ministrisë së Brendshme në Beogradi. Ata pritet që sot të dalin para gjykatës, njoftojnë mediat serbe.

Kundër këtyre arrestimeve ka reaguar Shoqata e Veteranëve të Luftës së UÇPMB-së. “Aktet represive dhe brutaliteti i forcave policore e të xhandarmerisë serbe në Luginë të Preshevës janë të papranueshme dhe tepër indinjuese”, thuhet në reagim.

Sipas tyre akuzat ndaj të të arrestuarve janë tërësisht të bazuara në shpifje, sajesa e intriga janë tashmë të njohura nga opinioni shqiptar dhe ai i huaj.

“Veprimet e fundit gjithsesi përputhen me skenarët e organeve më të larta vendimmarrëse në Serbi, me qëllim të vetëm - shpërnguljen e popullatës më vitale shqiptare nga rajoni”, thuhet ndër të tjera reagimin e kësaj shoqate.

Të arrestuarit akuzohen për krime gjatë periudhës qershor-tetor 1999, kohë kur qenë rrëmbyer 159 civilë të nacionalitetit serb dhe që “kishin vrarë” të paktën 51 nga ta. /ktv/
Telegrafi