[Llapjani_HH]

Sipas qeverisë serbe, policët serbë janë kthyer në bazë të gjashtëpikëshit

Beograd, 3 korrik - Qeveria e Serbisë në takimin e saj ka konkluduar se zgjedhjet lokale në Kosovë "nuk janë në pajtim me rezolutën e Këshillit të Sigurimit 1244, as në pajtim me Kornizën Kushtetuese për vetëqeverisjen lokale dhe se nuk ka kushte që serbët e Kosovës të marrin pjesë në ato zgjedhje". Pas mbledhjes ministri për të drejtat e njeriut dhe minoriteteve Svetozar Çipiq ka deklaruar se kthimi i serbëve në policinë e Kosovës është realizuar në pajtim me zbatimin e Marrëveshjes së gjashtë pikave, konform rezolutës 1244 dhe politikës së neutralitetit të faktorëve përgjegjës ndërkombëtarë.
QIK-u

Dodik: Kosova të ndahet, të mos jemi peng i saj

Kryeministri i Republikës Serbe të Bosnjës, Millorad Dodik ka deklaruar se situata rreth Kosovës nuk do të duhej t’i bënte serbët robër në 20 vitet e ardhshme – duke shtuar se, “interesi nacional serb nuk guxon të lidhet ekskluzivisht për Kosovën”.

Sipas tij, zgjidhja më e mirë do të ishte, ndarja e Kosovës. "Mendimi im personal është se, zgjidhja më e mirë do të ishte ndarja e Kosovës, ku veriu do të integroj në Serbi ndërsa pjesa tjetër le të bëjë çkado që dëshiron”, ka thënë Dodik.

Dodik ka thënë se ky është vetëm mendim i tij, që nuk korrespondon me mendimet publike në Beograd – por, sipas tij, “disa qëndrime private shkojnë në atë drejtim”.

Duke parashtruar një pyetje hipotetike – çka do të ndodhte po që se Kosova do të integrohej në Serbi? - Dodik ka vlerësuar se, ajo do të ishte edhe një strukturë homogjene, që ndoshta, sipas rregullave evropiane, do të mund të kërkonte postin e kryetarit apo edhe të kryeministrit të Serbisë.
Telegrafi

Protestojnë mishtarët

Përpunuesit e mishit kanë dalë sot në rrugët e Prishtinës me më shumë se 300 kamionë, ku po kërkojnë anulimin e udhëzimit administrativ për importimin e mishit.

Udhëheqësit e Shoqatës së mishtarëve janë takuar sot me Presidentin, Fatmir Sejdiu dhe pritet të takohen edhe më kryeparlamentarin Jakup Krasniqin.

Sipas shoqatës, Presidenti nuk ka qenë i njoftuar për përzgjedhjen paraprake të kompanisë ndërkombëtare për të importuar mishin për qytetarët e Kosovën.

Express ka shkruar se Qeveria e Kosovës e ka ditur para një vitit se kush do të fitoj tenderin për importin e mishit në Kosovë. Madje, zyrtarët qeveritar kanë hartuar udhëzimin administrativ, me të cilin paraprakisht dihet kompania fituese.

Përfaqësuesi i mishtarëve, Burim Piraj tha për Express se sot në ora 14 do të mbajnë takim të gjithë prodhuesit e mishit dhe do të vendosin për hapat që do t`i ndërmarrin.

Kundër tenderit të mishit

Zekirja Shabani
Shoqata e mishtarëve dhe organizata Çohu kanë akuzuar Qeverinë e Kosovës që po ngulfat bizneset kosovare të mishit për përfitime personale. Ata thonë se tenderi për import të mishit, i përpiluar nga Qeveria, është në kundërshtim me të gjitha ligjet. Kryeministri Hashim Thaçi thotë se nuk e ka ndërmend të ndryshojë rregulloren dhe tenderi do të shkojë deri në fund. Sot mbahet protesta e mishtarëve.

Tenderi për import të mishit, që i përjashton kompanitë kosovare, ka filluar të shkaktojë tensione. Shoqata e mishtarëve ka lajmëruar se do të protestojë ashpër për këtë çështje dhe nëse nuk do të anulohet ky tender, masat do të radikalizohen. Kjo punë, thonë ata, po bëhet për interesa personale të njerëzve të Qeverisë. Njëjtë kanë deklaruar edhe drejtues të organizatës Çohu.

Burime të gazetës Express thonë se që para një viti është përgatitur skenari se si t`u ndalohet importuesve vendorë importi i mishit dhe t’i jepet një kompanie të parapërcaktuar nga Qeveria. Sipas tenderit, kompania fituese, do të furnizojë krejt Kosovën me produkte që janë me prejardhje shtazore. Monopol.

Në anën tjetër, kryeministri Hashim Thaçi deklaron se nuk e ka ndërmend të ndërrojë rregulloren, e as të anulojë tenderin. Këtë tha se e bën për të mirën e qytetarëve kosovarë.

Shpalljes së tenderit nga Agjencia Veterinare e Ushqimit, që funksionon në kuadër të Zyrës së kryeministrit të Kosovës, i ka paraprirë nxjerrja e një udhëzimi administrativ nga Qeveria e Kosovës, i cili, sipas prodhuesve dhe përpunuesve të mishit, në Kosovë është në kundërshtim me ligjet në fuqi.
Përveç kësaj, kryetari i Shoqatës së mishtarëve, Burim Piraj thotë se me këtë udhëzim administrativ, Qeveria e Kosovës e shkel edhe Kushtetutën e Kosovës. Mishtarët kanë paralajmëruar protestë për sot. Kërkojnë anulimin e tenderit dhe të shpallet i pavlefshëm Udhëzimi administrativ 09/2009, që ua ndalon atyre importin e mishit.

Ai thekson se është në kundërshtim me Ligjin e prokurimit publik, shpallja e tenderit nga Qeveria për import të produktit që paguhet nga paratë e qytetarëve.

“Kemi diskutuar gjatë ditës me zyrtarë të Odës Ekonomike dhe kemi pritur të takohemi me kryeministrin. Por nuk është realizuar takimi dhe protesta do të mbahet”, thekson Piraj. Ndërkaq në tenderin e shpallur më 17 qershor nga AUV-ja, specifikohet se kompania e cila do të jetë fituese, duhet që për 3 vitet e fundit të ketë të hyra financiare minimum 8 milionë euro.

Mishtarët thonë se me angazhimin e kompanive ndërkombëtare për import të mishit, në Kosovë do të mbyllen 100 biznese që janë marrë me këtë veprimtari dhe do të mbesin pa punë mbi 4000 persona. Gjithashtu, sipas tyre, rrezikojnë të mbesin pa u kthyer miliona euro kredi në bankat komerciale, me të cilat kanë funksionuar deri më tash si biznese.

Tashmë kur kanë mbetur edhe pesë ditë për përzgjedhjen e fituesit, ndaj këtij vendimi të Qeverisë kanë reaguar edhe opozita dhe organizata joqeveritare.
Kryeministri kosovar hodhi poshtë reagimin e Shoqatës së përpunuesve të mishit.

“Qeveria është e determinuar që të mbrojë shëndetin e qytetarëve kosovarë dhe në këtë mënyrë, nuk do të lejojë që qytetarët të kequshqehen”, tha Thaçi. Prandaj, edhe reagimin e shoqatave të përpunuesve të mishit, Thaçi e quajti si reagim ndaj standardeve të BE-së.

“Të gjitha vendimet që merren nga Qeveria e Kosovës dhe Kuvendi, nxirren në përputhshmëri të plotë me kriteret e Bashkimit Evropian. Prandaj, për këtë çështje nuk marr vendim nën ndikimin e grupeve politike apo grupeve të interesit”.

Organizata Çohu, në një komunikatë për media ka deklaruar se Qeveria e Kosovës po nxjerr vendime e instruksione që jo vetëm që nuk kanë bazë ligjore, por edhe përfaqësojnë politika diskriminuese e të dyshimta.

“Është shumë e qartë se ky vendim i Qeverisë së Kosovës është marrë në rrethana të dyshimta dhe është e mundur që ky tender, sikundër edhe shumë tenderë të tjerë në sektorin publik, është ndikuar nga njerëz që kanë lidhje me kompani të huaja dhe që duan të kenë përfitimin e vet nga vendosja e monopolit edhe në këtë sektor”, thuhet në njoftim.

Sipas organizatës Çohu, tregu me qarkullim vjetor prej mbi 600 milionë eurosh është më se i dëshiruar nga kompani të huaja. Importi i mishit me tender, sipas kësaj organizate, është në kundërshtim me Ligjin për prokurim publik duke qenë se ky është një biznes që i takon sektorit privat dhe shteti nuk ka ndonjë kompetencë, përveçse të bëjë kontrollin e kualitetit të produkteve të importuara.

“Tenderi që jo vetëm nuk ka bazë ligjore, por edhe dëmton rëndë kompanitë vendore, është ai për importimin e mishit, kushtet e të cilit janë bërë ashtu që pothuajse në mënyrë eksplicite përjashtohen kompanitë vendore”. Çohu thotë se dyshimet forcohen edhe më shumë pas futjes së AVUK-së nën ombrellën e Qeverisë.

Shoqata e mishtarëve me protestën e vet do të bllokojë tërë rrugët e Prishtinës me kamionët e tyre me sloganet që janë kundër këtij udhëzimi dhe tenderi.
Gazeta expres

Dogana kërcënon argjendarët

Doganierët pa marrë fare parasysh faktet e argjendarëve, u kanë konfiskuar arin. Ata konfiskuan edhe mall që argjendarët i mbulonin me dokumente. Doganierët n`aksion, madje edhe i kanë kërcënuar argjendarët se do t`ua marrin prapë arin vetëm sa të largohen mediat.

Dogana e Kosovës ka marrë një aksion për konfiskimin e arit i cili është i pa regjistruar apo i pa mbuluar me dokumente.

Pronarët e argjendarive nëpër Kosovë kanë treguar se Dogana po iu konfiskon mallin edhe kur po kanë mbulueshmëri me dokumente.

Madje të premten argjendarët, gjatë një aksioni të doganave, janë përleshur verbalist duke tentuar që t`i bindin doganierët që nuk duhet t`u marrin arin.

Por doganierët, nuk kanë marrë fare parasysh kërkesat dhe arsyetimet e tyre. Me plotë arrogancë, pjesëtarët e Doganave, kanë marrë arin dhe kanë kërkuar nga argjendarët që duhet t`i heqin mediat përndryshe edhe më shumë do t`iu marrin arin.

“Prapë kemi me ardh me ju marrë arin, e shihni ju”, kërcënoi një doganier argjendarët.

Njëri prej argjendarëve tregoi se doganierët i kanë dëgjuar ata për disa kohë, dhe pa asnjë kundër përgjigje iu kanë marrë dukatin që e kanë pasur nëpër lokalet e tyre.

Zëdhënësi i doganave, Adriatik Stavileci, tha se ky është një aksion që po vazhdon në gjitha qytetet e Kosovës. Deri më tash, tregoi se kanë inspektuar mbi 150 dyqane të arit.

“Të gjithë ata që nuk kanë dëshmuar që paguajnë doganë, dhe prejardhjen e mallit, malli iu ndalohet përkohësisht”, tha Stavileci.

Ky aksion është shpërndarë në krejt Kosovën dhe do të zgjasë edhe për një kohë.
Gazeta expres