[Llapjani_HH]

A po mbetet Kosova e izoluar?

Komisioni Evropian do të sqarojë çështjen e përfshirjes së Kosovës në procesin e liberalizimit të vizave në fillim të nëntorit, thonë në Qeverinë e Kosovës. Problem më vete, thuhet se paraqet mosnjohja e Kosovës nga pesë vendet anëtare të BE-së.Kosova mbetet vendi i fundit i rajonit, i papërfshirë në procesin e liberalizimit të vizave. Qeveria e Kosovës shpreson se ky proces do të sqarohet nga Komisioni Evropian gjatë vjeshtës së këtij viti. Problem më vete, thuhet se paraqet mosnjohja e Kosovës nga ana e pesë vendeve të BE-së.

Zëvendëskryeministri Hajredin Kuçi thotë se Kosova po i zbaton kërkesat dhe rekomandimet evropiane në lidhje me përfshirjen e vendeve në procesin e liberalizimit të vizave. Ai pret që edhe Brukseli t’i përshkruajë rrugën Kosovës drejt këtij procesi gjatë vjeshtës së këtij viti, përmes raportit të progresit dhe atij të studimit të fizibilitetit.

“Kosova ka bërë disa përgatitje. Kemi miratuar udhëzimin për menaxhimin e integruar të kufijve, kemi autorizuar Ministrinë e Punëve të Brendshme që të udhëheqë procesin e liberalizimit të vizave dhe jemi në përgatitje teknike dhe administrative që kërkohen nga Kosova ta bëjë një gjë të tillë”. “Kemi marrë sinjalet e duhura nga Komisioni Evropian, që në raportin e progresit, që do të publikohet në fillim të nëntorit të këtij viti, dhe në studimin e fizibilitetit, do të shihet rruga e qartë e liberalizimit të vizave edhe për Kosovën”, tha Kuçi.

Zëvendëskryeministri Hajredin Kuçi tha se përfshirja e Kosovës në kuadër të liberalizimit të vizave kërkon edhe konsensusin me pesë vendet anëtare të BE-së, që nuk e kanë njohur Kosovën e pavarur. Sidoqoftë, ai tha se beson që Kosova nuk do të mbetet e izoluar dhe e vetmuar në këtë proces. “Ajo që dua të them dhe besoj, është se Kosova nuk do të jetë e izoluar. Qytetarët e Kosovës nuk do të jenë të izoluar dhe besoj që Kosova nuk do të jetë e vetme dhe e fundit në këtë proces”.

“Por, procesin e liberalizimit të vizave duhet ta kuptojmë si diçka që kërkohet në mënyrë të dyanshme. Jo vetëm nga pala kosovare, por edhe nga vetë Komisioni apo Unioni Evropian”, theksoi Kuçi. Në anën tjetër, deputeti i Aleancës Kosova e Re, Shkumbin Demaliaj, zëvendëskryetar i Komisionit për punë të brendshme dhe siguri, konsideron se mbetja jashtë procesit të liberalizimit të vizave, është shqetësuese. Ai fajëson institucionet, duke vlerësuar se qeveria nuk e ka bërë punën e duhur që Kosova të mos mbetet një oazë e izoluar në mes të Evropës së integruar.

“Flitet gjithmonë për suksese, mirëpo këtë po e vuajnë qytetarët e Kosovës. Edhe në këtë rast, me mbetjen jashtë mundësisë që të jemi pjesë e liberalizimit të vizave krahas qytetarëve tjerë të Bashkimit Evropian në proceset më tutje, si në rrjedhat e punësimit, por edhe në mundësitë e punësimit të qytetarëve, që mund të jenë në kuadër të integrimit tonë si shtet”, tha Demaliaj. Duke fajësuar institucionet për moszbatimin e ligjeve, deputeti Demaliaj thotë se ky hendikep është përcjellë dhe me përgatitjen e dokumenteve të udhëtimit të Republikës së Kosovës.

Ai merr shembull pasaportën diplomatike të Kosovës, e cila nuk njihet nga vendet tjera, dhe kjo, sipas tij, sqaron se sa kanë arritur institucionet që të tregohen serioze në përgatitjet për procesin e liberalizimit të vizave. “Si deputet që posedoj një pasaportë diplomatike, mund të shkoj me të deri në rajon, them në Maqedoni apo në Shqipëri dhe askund tjetër, për shkak se duhet të marrim viza”.

“Thjesht, vetëm shkruan se është pasaportë diplomatike, por nuk posedon diç më shumë se ajo e qytetarëve tjerë të Kosovës dhe pikërisht edhe kjo është pjesë e mosharmonizimit të procedurave me ligjet në fuqi”, deklaron Demaliaj. Ndërsa Kosova po pret fundin e vitit që të marrë instruksionet e reja nga Komisioni Evropian për liberalizimin e vizave, vendet tjera përreth Kosovës paralajmërojnë përfshirjen në këtë proces nga janari i vitit 2010. (Radio Evropa e Lirë)
Gazeta expres

Bigman: Të dënuarit e Sopotit të pafajshëm

Nikolas Bigman ish ambasadori i NATO-s në Maqedoni ka konfirmuar bisedën që ka zhvilluar në atë kohë me ministrin e mbrojtjes Vllado Buçkovski rreth pafajsisë së të arrestuarve në rastin e Sopotit. Në një intervistë ekskluzive për ALSAT, ambasadori Bigman i cili tani jeton në Janjinë të Kroacisë thotë se asnjëherë nuk është dëshmuar fajsia e banorëve të Sopotit . Sikur atëherë edhe tani thotë Bigman jam kurioz të dijë dhe të zbulohen motivet e vendosjes së minës, kryersit e këtij akti dhe ata që kanë urdhëruar vendosjen e mjetit shpërthyes.

“Ishte vështirë të besosh se ata njerëz mund ta kenë bërë një gjë të tillë, nuk mund të shohësh motiv, thuhet se sulmi ishte kudër NATO-s, por ne nuk jemi shumë të sigurtë se është ashtu, sepse po të kishte qenë sulmi kundër NATO-s nuk mund të ndalem të mos mendoj se fshatarët atje që përbënin 99 përqind shqiptrarë etnik, ishin shumë në favor të NATO-s, ata e shifnin NATO-n si forcë e stabilitetit çka edhe jemi. Nuk mund të ndihmoj duke menduar se njerëzit në fshat janë ndoshta pak të edukuar, por ata nuk janë idiotë, nëse dëshironi të bëni një gjë të tillë, atëherë nuk do të bëni në fshatin tuaj sepse atëherë e kërkoni vet problemin", tregon Nikolas Biegman, ish ambasador i NATO-s.

Bigman tha se për të dënuar banorët e Sopotit gjygi ka përdorur fakte të zbehta duke u bazuar në dëshminë e bashkëfshatarit të tyre Ramadan Bajrami, i cili tani ka pranuar se dëshmia e tij ka qenë e rrejshme dhe është dhënë si rezultat i dhunës së përdorur mbi të nga policia.

“Nëse në bazë të dëshmive të tilla mund të shkoni përpara dhe për të dërguar njerëzit për gjygj për 165 vjet nuk duket e logjikshme për mua.Për mua janë njerëz të pafajshëm deri sa nuk ka prova se janë fajtor, kjo është e drejtë ndërkombëtare dhe unë mendoj se ndaj këtyre njerëzve akoma nuk është dëshmuar fajësia.”, thekson Nikolas iegman.

Bigman tha se tash pas hapjes së debatit për rastin e Sopotit nga ALSAT me publikimin e deklaratës së dëshmitarit kryesor Ramadan Bajrami dhe paralajmërimin për formimin e Komisionit të posaçëm parlamentar që do të merret me këtë rast, nëse e kërkon nevoja është i gatshëm të flas për pafajsinë e sopotasve.

“Nuk kam folur për këtë një kohë të gjatë sepse isha jasht Maqedonisë, ju tash e keni hapur këtë përsëri, parlamenti gjithashtu ka hapur këtë çështje mendoj se është shumë punë e mirë, dhe jam ku jam përsëri të flasë për pafajësinë e njerëzve. Nëse komisioni dëshiron të ndëgjoj këto është çështje që u takon atyre ja ku jam.”,ofrohet Nikolas Biegman.

Për nesër është caktuar mbledhja e Komisionit të përhershëm anketues për mbrojtjen e lirive dhe të drejtave të njeriut, i cili do të bëjë publike emrat e anëtarëve të grupit të punës, i cili do të merret me grumbullimin e fakteve plotësuese për rastin e Sopotit. Ndryshe për rastin e Sopotit ku humbën jetën dy pjestarë të NATO-s, janë dënuar 11 shqiptarë të këtij fshati me 156 vjetë burg. 5 prej tyre janë duke vuajtur dënimin ndërsa 6 të tjerë janë dënuar në mungesë.
Shkëlzen Aqifi
ALSAT M