[Dani11]

PD: Të ndalohet shitja e alkoolit
Partia e Drejtësisë kërkon ndalimin me ligj të shitjes së alkoolit të rinjve nën moshën 16 vjeçare.
E diel, 12 Korrik 2009 16:20



Gjatë konferencës së sotme për media, Dr. Ferid Agani, kryetar i Partisë së Drejtësisë, tërhoqi në mënyrë të përsëritur vëmendjen e institucioneve të Kosovës dhe të opinionit të gjërë në disa zhvillime shqetësuese që po ndodhin në mesin e rinisë kosovare. Raporti i OBSH për përdorimin e substancave psikoaktive në Kosovë që rishtazi u publikua në Prishtinë, përmban të dhëna shumë brengosëse për gjendjen psikosociale të rinisë kosovare.
Sipas këtij Raporti, 43.5 % e të rinjve të moshës 15 – 24 vjeçare në Kosovë (rreth 378.138, sipas të dhënave të UNFPA 1999) përdorin duhanin (165.000 të rinjë), 37.8 % alkoolin (143.000), 3.8 % marihuanën (14.500), 0.4% heroinën (1500), ndërkaq 2.6 % (9800) kanë raportuar që kanë provuar barëra psikoaktive pa përshkrim të mjekut.
Rezultatet e katër studimeve të nivelit ndërkombëtar të zbatuara në Kosovë dëshmojnë se mosha e përdorimit të parë të heroinës ka trend të rënies, ndërkaq 36% e atyre që përdorin droga në Kosovë janë të moshës 14 deri 17 vjeçare.
Studimet kanë vërtetuar se 42% e adoleshentëve në Kosovë kanë marrëdhënien e parë seksuale në moshën 14 dhe 17 vjeçare (Brisson, A., & Richter K. (2004). 2003 HIV/AIDS KAP Survey: Descriptive Data Results. Population Services International. Prishtina, Kosovo), që flet për mundësinë e madhe të shtatëzanive të padëshirueshme, aborteve kriminale, dhe prostitucioni, me pasoja shkatërrimtare për shëndetin e të rinjve.
Në rrethana të këtilla të zhvillimeve kaotike në rrafshin psikosocial të një pjese të rëndësishme të të rinjëve është e pritur që pasojat të bëhen nga dita në ditë e më dramatike. Të dhënat nga Shërbimi Policor i Kosovës flasin se në periudhën 2000 – 2006 në mesin e të rinjve të Kosovës të moshës 16 – 25 vjeçare kanë ndodhë 88 vetëvrasje ose 26% e numrit të përgjithshëm të vetëvrasjeve dhe 276 tentim vetëvrasje ose 53% e numrit të përgjithshëm të tyre. Ndërkaq studimet e vitit 2007 dhe 2008 treguan se në mesatare 2.5% e të rinjve të kësaj grupmoshe (rreth 9500) kanë realizuar tentim vetëvrasje brenda vitit të fundit (1.6% meshkuj dhe 3.5% femra me trend të rritjes.
Këto të dhëna brengosëse janë indikatorë të çrregullimeve serioze në nivele të ndryshme të funksionimit psikosocial të të rinjve dhe atë duke filluar nga familja e deri te sistemi shkollor dhe më gjërë. Tranzicioni i shpejtë kulturor, situata e rëndë ekonomike, dhe neglizhenca e institucioneve shtetërore ndaj këtyre fakteve të dokumentuara në mënyrë shkencore, janë duke e marrë haraçin më të madh mu në mesin e të rinjve tanë, të cilën shpesh për qëllime politike me kënaqësi e quajmë e ardhmja e kombit.
Pasojat janë të dukshme dhe manifestohen në forma dhe nivele të ndryshme, siç janë: rënia e dukshme e suksesit në shkolla: vetëm 46% e kalueshmërisë në testin e "maturës shtetërore" dhe 53% në testin e arritshmërisë; dhuna e shtuar në shkolla; ndërprerja e parakohshme e shkollimit; e deri te dukuritë e shumta negative që u përmendën më sipër si pasojat më të rënda.
Institucionet shtetërore nuk guxojnë të qëndrojnë të hutuara dhe të heshtura para këtyre zhvillimeve dramatike. Bëhet fjalë për ruajtjen e substancës kombëtare dhe veprimet e koordinuara dhe të vendosura janë të domosdoshme. Në këtë drejtim, Partia e Drejtësisë u rekomandon dhe kërkon prej institucioneve shtetërore të Republikës së Kosovës ndërmarrjen e masave urgjente si vijon:
1. Zbatimin e lëndës së edukatës fetare në shkollat fillore dhe të mesme të Kosovës në pajtim me standardet më të avancuara evropiane, me qëllim të fuqizimit të sistemit të vlerave etike dhe morale në personalitetin e të riut. Kundërargumenti se kjo bie ndesh me parimin kushtetues të shtetit sekular ose laik nuk ka asnjë bazë dhe paraqet manipulim të opinionit, kur të kihet parasysh fakti se shumica e madhe e shteteve të Bashkësisë Evropiane ku në mënyrë obligative zbatohet lënda e edukatës fetare janë shtete sekulare ose laike.
2. Ndalimin me ligj, të shitjes së alkoolit, duhanit, dhe të barnave psikoaktive, të rinjve nën moshën 16 vjeçare dhe zbatimin strikt të kësaj norme ligjore përfshirë dënimin e vendosur të shkelësve të saj.
3. Miratimin urgjent të ligjit me të cilin do të rregullohet përmbajtja e programeve televizive përkitazi me fëmijët nën moshën 18 vjeçare dhe në këtë drejtim ndalimin e plotë të kanaleve pornografike në programet e stacioneve private televizive, as si mundësi e zgjedhjes.
4. Përpilimin e strategjive shtetërore për ballafaqimin me dukuritë shkatërrimtare të keqpërdorimit të substancave psikoaktive, që është edhe obligim ligjor, dhe të vetëvrasjeve në mesin e të rinjve në Kosovë.
5. Parandalimin e rrethanave për trafikimin e qenieve njerëzore në Kosovë dhe luftën e vendosur kundër krimit të organizuar në këtë drejtim.
Partia e Drejtësisë kërkon nga Kuvendi i Kosovës dhe Qeveria e Kosovës që të marrin parasysh kërkesat e sipërpërmendura dhe të shprehin seriozitet të skajshëm ndaj çështjeve të parashtruara. Partia e Drejtësisë njëkohësisht apelon edhe në shoqërinë civile që të ngrisë zërin kundër këtyre dukurive shkatërrimtare dhe të bëjë presion publik në institucionet e vendit që të lëvizin në drejtim të parandalimit dhe eliminimit të tyre. /drejtesia/