[Llapjani_HH]

Gërxhaliu largohet i pakënaqur

Që dy vjet nuk ka marrë asnjë cent për ekspertizat mjeko-ligjore që i ka dhënë nëpër gjykimet më të rënda. Disa prej ekspertizave të tij janë hedhur poshtë si të pabaza. Nuk e përjashton mundësinë që dikush të jetë korruptuar, kur janë eliminuar raportet e tij. Pasi ka dhënë dorëheqje prej Komisionit për të Pagjetur, për Express flet drejtori i mjekësisë ligjore, Arsim Gërxhaliu

Express: Keni dhënë dorëheqje nga pozita e kryesuesit të Komisionit për Persona të Pagjetur. Pse?

Arsim Gërxhaliu: Shkaku i dorëheqjes ka qenë pakënaqësia e vazhdueshme, e mbi të gjitha ka qenë largimi i emrit tim nga lista e doktoratës, të cilën e kam fituar nga Komisioni i Fakultetit të Mjekësisë. Kur ka shkuar lista në Rektorat, Enver Hasani e ka hequr emrin tim nga lista. Nuk kam kërkuar lëmoshë, por pse më është cenuar e drejta e ime për doktoratë unë jam larguar nga Komisioni.

Express: Për dorëheqjen tuaj e keni informuar edhe kryeministrin?

Arsim Gërxhaliu: Po, e kam njoftuar kryeministrin dhe për këtë çështje është i ngarkuar zëvendëskryeministri Ramë Manaj, i cili më sugjeroi të mos ngutem me dorëheqje, pasi unë duhet të shkoj jashtë shtetit për ta kryer doktoratën. Atëherë i tregova për padrejtësitë që më janë bërë, por nuk kam marrë asnjë përgjigje për dy muaj dhe vendosa t`ia paraqes dorëheqjen kryeministrit. Unë jam i vetmi njeri që ka punuar me ndërkombëtarë dhe i vetmi shqiptar që punon në mjekësinë ligjore. E tash edhe me EULEX.

Express: Pse thoni se ta ka bërë Enver Hasani këtë?

Arsim Gërxhaliu: Nuk e di. Unë i kam pasur poenët, e kam dhënë provimin e anglishtes. Emri im ka shkuar si kandidat që i ka plotësuar kushtet. Edhe pse nuk kam pas konkurrencë, edhe emri im ka shkuar me prioritet, Enver Hasani e ka larguar emrin tim.

Express: Pse atëherë nuk e keni paditur Z. Hasani?

Arsim Gërxhaliu: Pse, çka i bën nëse e padit? Ai i ka disa padi dhe është zgjedhur gjyqtar në Gjykatën Kushtetuese. Le të mbetet në moralin e tij si njeri i cili ka stopuar shqiptarët me ec përpara. Me krejt ato padi dhe një njeri i tillë pas gjithë këtyre skandaleve është në Gjykatën Kushtetuese.

Express: Dorëheqja juaj po del se është bërë për shkaqe personale?

Arsim Gërxhaliu: Ashtu ma kanë kualifikuar, jo vetëm ju, por të gjithë. E kanë marrë si shkak personal, por prapë po them se nuk është personal.

Express: Pse nuk është personale?

Arsim Gërxhaliu: Që dhjetë vite vinë familjarët, komisionet qeveritare dhe të gjithë. Që dhjetë vite ndërrohen ministrat dhe kryeministrat, flasin se do të shkollojnë njerëz. E na dhjetë vite pas luftës ne nuk kemi antropologë.

Express: Edhe pse në Kosovë nuk ka antropologë, ju keni kryer punën e antropologut?

Arsim Gërxhaliu: Unë jam mjek ligjor, por që më është dashtë me u lëshua në punët e antropologjisë për hir të popullit. Sot e kësaj dite nuk ka antropologë edhe dhjetë vjet pas luftës.

Express: T`i kthehemi punës që bëni në mjekësinë ligjore. Jeni që dhjetë vjet në krye të Institutit ku bëhet identifikimi i personave të zhdukur?

Arsim Gërxhaliu: Ne kemi filluar në ditën e dytë ku ka hyrë KFOR`i pas luftës. Kemi startu me 5500 të zhdukur dhe sot jemi me 1900 ende të zhdukur. Pra, kemi më shumë se 3500 të identifikuar.

Express: E pse gjykatat vazhdimisht ankohen se ju vonohen raportet e ekspertizave?

Arsim Gërxhaliu: I kam të gjitha faturat e papaguara të gjykatave të qarkut, duke filluar prej asaj të Prishtinës, Gjilanit, Prizrenit, Pejës. Asnjëra prej këtyre gjykatave nuk ka paguar që dy vite për punën që e bëjmë.

Express: Vonesa e raporteve të obduksionit po del se është si pasojë e vonesave në pagesën e ekspertëve mjeko-ligjorë?

Arsim Gërxhaliu: Pse me shku unë me dhanë ekspertiza, ku mua nuk më paguajnë që dy vite? Gjykatat Komunale paguajnë me rregull.

Express: A keni kërkuar prej institucioneve më të larta që këto mjete t`ju paguhen?

Arsim Gërxhaliu: Vazhdimisht kemi kërkuar. Kam folur edhe me kryeprokurorin e Qarkut në Prishtinë, Osman Kryeziun. Veç na kanë premtuar se do të na i paguajnë dhe asgjë më shumë.

Express: Por, z. Gërxhaliu prej vonesave të ekspertizave janë duke pësuar më së shumti qytetarët që janë në procese gjyqësore?

Arsim Gërxhaliu: Po, është e vërtetë. Por, dy vjet shkuarje në Gjykatën e Qarkut në Prizren, Pejë, Prishtinë. Ato janë dy vjet. Ne kemi treguar anën tonë. Aty janë me mijëra euro.

Express: Disa nga raportet e ekspertizave që i bëni hidhen poshtë. Pse ka ndodhur kjo?

Arsim Gërxhaliu: Fakt është.

Express: Pse ka ndodhur hedhja e ekspertizës që e bëni ju?

Arsim Gërxhaliu: Shko pyeteni në gjykatë.

Express: A ka dhënë përgjegjësi ndokush për eliminimin e këtyre ekspertizave?

Arsim Gërxhaliu: Jo, askush. Ka edhe ekspertiza qesharake që janë dhënë mbi ekspertizën time.

Express: Me hedhjen e këtyre ekspertizave e kanë vënë në sprovë profesionalizmin tuaj?

Arsim Gërxhaliu: Në shumicën e rasteve ata besojnë në profesionalizmin tim. Rastet më të vështira i kam zgjedhur unë. Për shembull, rasti i Elona Krasniqit, vrasësi i të cilës i ka marrë 40 vjet burgim...

Express: Pse pra hidhen ekspertizat tuaja dhe kryhen superekspertiza?

Arsim Gërxhaliu: Kjo ndodh sepse nuk i konvenon dikujt.

Express: A ka korrupsion aty?

Arsim Gërxhaliu: Kah ana ime jo, e nalt nuk e di.

Express: Nuk po e përjashton mundësinë që ka korrupsion kur vendoset të hidhen poshtë raportet e juaja?

Arsim Gërxhaliu: E çka po i vjen kësaj era, normal që korrupsion.

Express: A keni kërkuar sqarime pse ndodhin këto?

Arsim Gërxhaliu: EULEX`i është duke punuar dhe rishqyrtuar shumë raste. EULEX`i është duke punuar në secilin rast dhe shume njerëz që kanë bërë shkelje do të japin llogari. Me kohë do të dalin të gjitha në shesh.
Gazeta expres

Preshevë: Bastisen tri shtëpi

Sipas agjencisë INA, të mërkurën, me pretekst të kërkimit të armëve, janë bastisur shtëpitë e dy ish-komandantëve të UÇPMB, Lulzim Ibishit dhe Sadat Nuhiut, në mungesë të të cilëve në biseda informative janë marrë anëtarët e familjeve të tyre, nëna 70-vjeçare e Lulzim Ibishit, dhe disa familjarë të Sadat Nuhiut.

Njoftohet se është bastisur edhe familja e Gafurr Dalipit, në fshatin Geraj, ndërsa në të tri bastisjet kanë marrë pjesë mbi 300 xhandarë.

Organizata e Veteranëve të Luftës e UÇPMB i apeloi OKB, OSBE, Këshillit të Sigurimit dhe partive politike shqiptare në Luginë, në Kosovë, Maqedoni dhe Shqipëri, që të jenë më aktivë ndaj situatës në Luginën e Preshevës.

Aksionet u ndërmorën pas shpërthimit të një bombe një ditë më parë në Preshevë, në ndërtesën ku kryesisht banojnë pjesëtarë të policisë serbe dhe ku u plagosë një grua me një fëmijë.
Gazeta expres

Mustafa, sulmi në Preshevë montim i policisë serbe

Brenda pak ditës regjistrohet incidenti i dytë në luginën e Preshevës. Gjysëm ore pas mesnate një shpërthim i fuqishëm ka tronditur banorët e kësaj komune. Në shpërthimin i cili ka ndodhur përballë ndërtesës ku banojnë anëtarët e forcave të policisë së Serbisë dhe xhandarmerise kanë mbetur të plagosur dy kalimtar rasti të përkatësisë etnike shqiptare.

Mjeti shpërthyes sipas informative paraprake ka qene i vendosur në një makinë të parkuar përballë ndërtesës së banuar me policë dhe pjestarë të xhandarmerisë serbe. Ministri i brendshëm Ivica Daçiq i cili gjatë ditës ka vizituar qytetin e Preshevës, sulmin e ka cilsuar si akt terrorist.


"Ky është një akt klasik terrorist, ku është rrezikuar jeta e civilëve. Dy nga të plagosurit janë shqiptarë. Policia është këtu për të mbrojtur rendin publik dhe të mbrojë qytetarët nga terroristët dhe do të ndërmarë të gjitha masat për të ruajtur stabilitetin e vendit dhe për të mbrojtur të gjithë qytetarët, serbët, shqiptarët, muslimanët dhe të gjithë atyrë që jetojnë këtu", tha Ivica Daçiq, minister i Brendshem i Serbisë.

Autoritet e Komunës së Preshevës shpërthimin e mbrëmshëm e kanë cilësuar si proces të montuar nga autoritet serbe, të cilët vazhdojnë politikat e Millosheviqit që kanë për qëllim pastrimin etnik të Luginës së Preshevës. Janë bastisur katër familje shqiptare në këtë Komunë me ç'rast është arrestuar nje person. Kryetari i Komunës Ragmi Mustafa i ka bërë thirrje popullatës që të ruaj gjakftohësinë dhe të mos bie pre e provokimeve të këtilla të autoriteteve serbe.

Ky është incidenti i dytë i tillë në pesë ditët e fundit në Luginën e Preshevës. Në incidentin, që ndodhi të enjen e kaluar, ishin plagosur dy pjestarë të xhandarmerisë në fshatin Lucanë të komunës së Bujanocit. Xhandarët janë plagosur nga një predhë e shkrehur me mortajë dore dhe në momentin e sulmit ndodheshin në një makinë. Ministri serb i policisë Ivica Daçiq edhe këtë sulm e cilësoi si "terrorist".
ALSAT M