[Arb]

Dëmtimi i imazhit


Nga Besiana Xharra & Faton Ismajli më 16.07.2009 në ora 13:18

Ndërtesa e Qeverisë së Kosovës ka qenë cak i sulmit të organizuar nga një pjesë e veteranëve të UÇK-së, të cilët kanë përdorur edhe dy bomba dore për t`i bindur zyrtarët e ekzekutivit se duhet t`iu plotësohen kërkesat e tyre.

Bombat e vendosura në oborr të Qeverisë janë larguar nga pjesëtarët e KFOR-it, derisa Policia e Kosovës ka filluar hetimet për t`i identifikuar autorët hedhjes së mjeteve ekspozuese.

Por, puna e Policisë do të jetë shumë e lehtë sa i përket zbulimit të të dyshuarve, sepse përfaqësuesit e veteranëve janë deklaruar hapur se ata i kanë hedhur bombat.

Ndërkohë, ndërtesa e Qeverisë është nën vëzhgim të kamerave 24 orë dhe kjo u ka mundësuar Policisë së Kosovës që ta kenë më të lehtë identifikimin e të dyshuarve dhe mundësinë e arrestimit të tyre. Por, gjatë ditës së enjte, policia nuk ka marrë asnjë urdhër, as nga prokurorët vendorë, e as nga ata ndërkombëtarë për arrestimin e shkelësve të ligjit, derisa burime të Expressit kanë treguar se autorët tashmë janë identifikuar, por se për shkak të ndjeshmërisë së situatës, të dyshuarit ende nuk janë arrestuar.

Zëdhënësi i Policisë, Besim Hoti ka thënë për Express se hetimet janë duke vazhduar në drejtim të identifikimit të autorëve të sulmit.

“Ne do t'i shfrytëzojmë të gjitha xhirimet dhe dëshmitë për të gjetur të dyshuarit për hedhjen e mjeteve eksplozive në oborrin e Qeverisë. Në konsultim me prokurorët vendorë dhe ndërkombëtarë, ne do të veprojmë”, ka thënë zëdhënësi Hoti.

Derisa policia zyrtarisht thotë se është duke hetuar rastin, përfaqësuesi i Këshillit për Mbrojtjen e të Drejtave të Luftëtarëve të UÇK-së, Vesel Aruqi e pranon se kanë hedhur mjete eksplozive në oborrin e Qeverisë, pasi që Qeveria nuk u është përgjigjur kërkesave të tyre.

“Ajo ka qenë mënyrë e revoltës tonë, pasi që nuk na janë përgjigjur në kërkesat tona. Menjëherë pas gjuajtjes së mjeteve shpërthyese kanë filluar lëvizjet e qeveritarëve, kështu ne do të vazhdojmë deri në përmbushjen e kërkesave”, ka thënë Aruqi për Express.

Sipas tij, ky grup protestuesish prej të enjtes kanë vendosur që të mos dalin më në rrugë për të protestuar, por të përdorin forma të tjera, të cilat për momentin nuk do t’i zbulojnë.

“Nuk do shtrihemi më në rrugë për të protestuar, por do t’i përdorim format tona, të cilat janë sekrete për momentin”, tha ai, duke shtuar se edhe vendndodhja e këtij grupi mbetet sekret.

Sipas tij, në qoftë nevoja, edhe do të vdesin, e kësaj radhe nuk do lëshojnë pe.

“Ne nuk i frikohemi as burgut, e as vdekjes. I kemi hy kësaj pune dhe i pranojmë të gjitha pasojat”, është zotuar ai.

E tëra që Aruqi dëshiron bashkë me protestuesit e tjerë, është zbatimi i ligjit, i cili është i nënshkruar nga vetë zyrtarët qeveritarë.

“Ne e kemi ligjin, i cili është nënshkruar nga Kryeministria, por kurrë nuk është zbatuar. Aty janë nenet, të cilat ne duam që të praktikohen në realitet, e jo të mbesin veç në letër”, thotë për Express, Aruqi.

Njëra prej kërkesave kryesore që parashihet në këtë ligj, është rritja e pagave për invalidët e luftës në 500 euro.

“Përderisa një deputet i Kosovës merr rrogë 1500 euro, e një invalid 100, e i cili ndoshta këmbën e ka humbë për këtë vend, është tmerr. Këtë nuk e kishte bërë as armiku”, tha Aruqi.

Këshilli nuk e ka përkrahjen e shoqatave të dala nga lufta, si ajo e Dëshmorëve, Invalidëve dhe e Veteranëve.

Muharrem Xhemajli, kryetar i Organizatës së Veteranëve të Luftës (OVL) i ka kundërshtuar format e dhunshme të protestës së disa veteranëve dhe nuk i ka përkrahur ata. Ai ka thënë se protestuesit e dhunshëm nuk i përfaqësojnë vlerat e UÇK-së, por vetëm ato personale.

“Nuk i përkrahim veprimet e dhunshme. Ata njerëz që kanë protestuar sot, nuk e përfaqësojnë askënd, përpos vetveten”, ka thënë Xhemajli.

“Nuk kemi bërë luftë për t`i shkatërruar objektet shtetërore, por për rimëkëmbjen e tyre”,

Ai ka shkuar edhe më larg në akuzat e tij drejtuar ish-bashkëluftëtarëve të tij.

“Janë një grup i manipuluar prej njerëzve që nuk ia donë të mirën Kosovës“, ka thënë ai, pa dashur të përmendë emra konkretë. “Do të vjen koha kur do të dalim edhe me emra”.

Por, edhe protestuesit kanë hedhur akuza në drejtim të organizatave të dala nga lufta se ato nuk po i mbrojnë interesat e veteranëve dhe invalidëve dhe se janë të manipuluar nga Qeveria.

Pas protestës së dhunshme, Qeveria ka reaguar duke i cilësuar sulmet me bomba ndaj institucioneve shtetërore nga ana e individëve të caktuar me motive politike dhe antishtetërore.

“Në emër të Qeverisë së Republikës së Kosovës dhe në emër të qytetarëve tanë, u bëjmë me dije atyre që e kanë inspiruar, përgatitur dhe organizuar këtë sulm qyqar me bomba e koktej molotovi, se pushteti nuk fitohet me kërcënime e dhunë, por me vullnetin demokratik të qytetarëve tanë”, thuhet në deklaratën e Qeverisë.

Në reagimin e Qeverisë thuhet se është e drejtë e garantuar e çdo individi dhe grupi qytetar që të protestojë për çështje të ndryshme, por askush nuk mund të jetë mbi ligjin.
Qeveria potencoi se askush nuk ka të drejtë dhe nuk do t’i lejohet që t’i sulmojë institucionet e Republikës së Kosovës, të ndërtuara me gjak, djersë dhe mund të të gjithë qytetarëve të vendit tonë.

“Në shtetin tonë të ri nuk ka vend për veprime të tilla të dhunshme, sepse ato janë në kundërshtim me traditën dhe moralin e popullit tonë liridashës”, thuhet në reagimin e Qeverisë.

Analisti politik, Ramush Tahiri thotë se pas protestave të dhunshme të ish-pjesëtarëve të UÇK-së, duhet të ulen dhe t’i zgjidhin problemet e grumbulluara të ish-luftëtarëve.

“Qeveria dhe shoqatat duhet të ulen dhe të gjejnë zgjidhje në të mirë të veteranëve”, ka thënë Tahiri.

Këshillit për Mbrojtjen e të Drejtave të Luftëtarëve të Ushtrisë Çlirimtare të Kosovës paralajmëron se do të vazhdojnë me protesta edhe në ditët në vazhdim, duke mos përjashtuar edhe përdorimin e dhunës në arritjet e qëllimeve të tyre.



Eshte per tu komentuar pjesa e nenvizuar ne te cilen ky legjendari (medet per ne po shume e legjendari na u bo) sikur akoma beson se nen armiku do te ishin me mire.

Haruqi, e e ju hardhucet e tjere, ata qe vertete kane luftuar per kete toke, ose jane te vdekur, ose nuk kerkojne asgje nga Kosova, per ate qe kane bere.