[niemand]

Në prag të zgjedhjeve lokale në Kosovë të cilat do të mbahen me 15 nëntor, disa prej subjekteve politike në vend kanë nisur të deklarojnë profilizimet e tyre partiake. Një hap të tillë tashmë e ka ndërmarrë Aleanca për Ardhmërinë e Kosovës.

Kjo parti e cila para disa ditësh ka nënshkruar marrëveshje bashkëpunimi me Partinë Demokratike të Shqipërisë, paralajmëroi marrëveshje bashkëpunimi edhe me partitë e së djathtës në Kosovë për formimin e një koalicioni që do të mund të udhëheqë vendin në mandatin e ardhshëm qeverisës.

Kryetari i këtij subjekti politik, Ramush Haradinaj theksoi se qeverisja e ardhshme do të jetë e drejtuar nga ai. Ai tha se AAK-ja do të ndryshojë politikat aktuale ekonomike duke u dhënë atyre orientim të djathtë.

Kryetari i AAK-së tha se subjekti që ai drejton synon të formojë koalicion i cili do të dalë fitues në zgjedhjet e ardhshme dhe do të ndërrojë sidomos politikat ekonomike. Ai nuk përjashtoi mundësinë e një koalicioni me LDK-në e LDD-në.

Haradinaj deklaroi edhe njëherë se synon të jetë kryeministër i ardhshëm i vendit.

Deri me tash Aleanca për Ardhmërinë e Kosovës marrëveshje të tilla bashkëpunimi përveç me Partinë Demokratike në Shqipëri, ka realizuar edhe me Ballin Kombëtar të Kosovës, Partinë Demokratike Shqiptare në Preshevë dhe Partinë Demokratike Shqiptare në Maqedoni.