[Llapjani_HH]

Serbët sot votojnë për struktura paralele në Graçanicë dhe Gorozhdec

Burime serbe nga Kosova raportojnë se në Graçanicë dhe në Gorazhdevc, janë hapur vendvotimet për, siç thuhet, “zgjedhjet lokale të serbëve për komunat Prishtinë dhe Pejë”. Këto zgjedhje, që i organizon qeveria e Serbisë, nga institucionet e Kosovës konsiderohen jolegjitime, ndërsa “rezultatet e tyre nuk do të jenë të vlefshme dhe nuk kanë kurrfarë fuqie politike”.

Zgjedhjet e sotme të serbëve në Kosovë, do të injorohen, thonë në policinë e Kosovës. Policia e Kosovës tha se nuk do të ofrojë sigurinë për zgjedhje. Zëdhënësi Arbër Beka i tha sot Radio Kosovës se policia mund të ndërhyjë në rast se do të ketë prishje të rendit dhe të qetësisë publike”.

Mbajtja e zgjedhjeve lokale serbe në Kosovë është veprim i gabuar, që nuk do të ndihmojë në krijimin e rrethanave të volitshme për një bashkëjetesë të komunitetit serb me komunitetin shumicë shqiptar, kanë thënë për RFE disa përfaqësues serbë të Kosovës.

Organizimi i zgjedhjeve lokale të Serbisë në Komunën e Prishtinës dhe në atë të Pejës, është veprim i gabuar i autoriteteve serbe, i cili nuk do të ndihmojë në krijimin e rrethanave të volitshme për një bashkëjetesë të komunitetit serb me komunitetin shumicë shqiptar në Kosovë.

Kështu vlerëson përfaqësuesi i subjektit politik serb, pjesëmarrës në institucionet e Kosovës, si dhe ai i iniciativës qytetare serbe për një Kosovë shumetnike.

Petar Miletiq, sekretar i Partisë së Pavarur Liberale, thotë se kjo parti nuk do të marrë pjesë në zgjedhjet lokale serbe, pavarësisht se këto zgjedhje janë, siç i quan ai, realitet.

“Unë mendoj se këto zgjedhje, si të tilla, janë një gabim, ashtu siç kanë qenë të gabueshme edhe zgjedhjet e organizuara më 11 maj, vitin e kaluar, dhe ato janë duke krijuar ndasi edhe më të madhe në mes të bashkësive serbe dhe shqiptare”, ka deklaruar Miletiq për RFE.

“Por, megjithatë, ajo që duhet të konstatojmë dhe të themi, është se këto zgjedhje janë realitet dhe se në fund të fundit ato japin disa përfaqësues të serbëve të Kosovës, pavarësisht se nuk pritet që institucionet e Kosovës, qoftë kryetari ose kryeministri, do t’i pranojnë ndonjëherë këta liderë”, tha Miletiq.

Ai shtoi se zgjedhjet serbe të organizuara në Kosovë mund të interpretohen si reaksion i serbëve karshi pozitës së tyre politike në Kosovë.

Edhe Radomir Dimiq, lider i Lëvizjes “Kosova Shumetnike Evropiane”, e vlerëson veprim të gabuar organizimin e zgjedhjeve lokale serbe në Kosovë. Ai shpreh mendimin se këto zgjedhje më shumë janë në funksion të një politike që, sipas tij, nuk është e mirë për serbët që jetojnë në Kosovë, si dhe për ata që janë zhvendosur dhe jetojnë jashtë Kosovës.

“Unë mendoj se në esencë këto zgjedhje janë një tentim që edhe një herë serbët t’i largojnë sa më shumë dhe sa më larg nga një bashkëjetesë e vërtetë me bashkëqytetarët, me të cilët jetojnë në Kosovë, si dhe paraqesin një ikje nga zgjidhja e problemeve themelore të serbëve në Kosovë”, ka deklaruar Dimiq për RFE.

“Unë mendoj se këto zgjedhje janë një veprim absolutisht i huqur”, tha Dimiq, duke shtuar se ato nuk mund t’u sjellin serbëve asgjë të mirë, përveç, siç u shpreh, vetizolimit, getoizimit dhe një jete në kushte virtuale.

Zoti Dimiq shpreh mendimin se zyrtarët në Beograd po tentojnë që përmes organizimit të zgjedhjeve në Kosovë, t’u dërgojnë sinjale serbëve se shteti serb ekziston dhe funksionon në Kosovë. Me këtë veprim, siç thotë Dimiq, Serbia po përpiqet t’iu hedhë pluhur në sy serbëve në Kosovë dhe jashtë saj.

“Kjo, në njëfarë mënyre, është vetëm një tentim i disa qarqeve të caktuara politike, të cilat absolutisht ende nuk e shohin se në Kosovë ka ndryshime thelbësore dhe se ajo faktikisht është shtet i pavarur, për të cilin nuk mund të bisedohet dhe nuk ka dilema”, theksoi Dimiq.

Sidoqoftë, zoti Miletiq tha se është e pritshme dalja masive e serbëve në këto zgjedhje. Se a duhet dalë në to ose jo, kjo, sipas tij, u mbetet vetë qytetarëve serbë të vendosin sipas ndërgjegjes së tyre.
RTK

Reagime: Zgjedhjet lokale serbe -ndërhyrje në punët e brendshme të Kosovës

Në Graçanicë dhe në Gorazhdec, janë hapur vendvotimet për, siç thuhet, zgjedhjet lokale të serbëve për komunat Prishtinë dhe Pejë. Këto zgjedhje, që i organizon qeveria serbe, nga institucionet e Kosovës konsiderohen jolegjitime, ndërsa rezultatet e tyre nuk do të jenë të vlefshme dhe nuk kanë kurrfarë fuqie politike. Lëvizja Vetëvendosje dhe analistët e konsiderojnë këtë si një ndërhyrje në punët e brendshme të Kosovës.

Derisa Qeveria e Kosovës ka deklaruar se këto zgjedhje janë edhe një pseudospektakël i Serbisë në Kosovës, duke i konsideruar ato jolegjitime, Lëvizja Vetëvendosja ka akuzuar sot lidershipin e vendin që ka lejuar mbajtjen e këtyre zgjedhjeve. Aktivistët e kësaj lëvizjeje në Prishtinë dhe në disa qendra të tjera të Kosovës kanë ngjitur posterë ku shihet kryeministri Thaçi, një kuti votimi me shkronja cirilike dhe në fund mbishkrimi “Bëhu pjesë e së ardhmes”. Lideri i Vetëvendosjes, Albin Kurti, thotë se “heshtja dhe pasiviteti i shtetit të Kosovës është leje dhe inkurajim për zgjedhjet e Serbisë në Kosovë”.

“Nuk mund të jetë edhe Kosova sovrane edhe të mbahen zgjedhjet e Serbisë. Dikush po gënjen. Është e qartë kush – krerët politikë të Kosovës, të cilët reagojnë vetëm atëherë kur iu cenohen bizneset apo iu rrezikohen votat, por jo edhe kur cenohet a rrezikohet Kosova”, ka deklaruar Kurti.

Drejtori i Qendrës kosovare për studime të sigurisë, Ramadan Qehaja, thotë se qëllimi i këtyre zgjedhjeve është që të destabilizojnë situatën politike në Kosovës dhe përmes tyre Beogradi dëshiron të tregojë se ne nuk jemi shtet që mund ta refuzojmë një gjë të tillë.

“Kësaj here, d.m.th., pas pavarësisë së Kosovës, pas aprovimit të Kushtetutës, ne është dashur në një mënyrë, si shtet, t’i tregojmë dhëmbët, kushtimisht të them, dhe të mos lejojmë që të mbahen këto zgjedhje. Së paku të tentojmë të mos lejojmë të mbahen këto zgjedhje. Mirëpo kjo nuk ka ndodhur, pse nuk ka ndodhur është çështje e lidershipit tonë”, ka deklaruar Ramadan Qehaja.

Qehaja shprehet edhe kundër deklarimit të policisë se nuk do të bëjë sigurimin e këtyre zgjedhjeve. Ai vlerëson se policia do të duhej që në këto dy enklava të shtojë masat e sigurisë, që të mos të ndodhë diçka e papritur e që mund të ketë pasoja në situatën e tërësishme të sigurisë
RTK

Opozita: Marrëveshje me shtetet fqinje mund të nënshkruajnë vetëm institucionet kosovare

Opozita kosovare reagon ndaj paralajmërimeve për nënshkrimin e një marrëveshje protokolli ndërmjet EULEX-it dhe Ministrisë së Brendshme të Serbisë, e cila lë jashtë autoritetet kosovare. Sipas opozitarëve, marrëveshje me shtetet fqinje mund të nënshkruajnë vetëm institucionet kosovare. Analistët vlerësojnë se EULEX-i është mision monitorues dhe nuk ka të drejtën e nënshkrimit të marrëveshjeve.

Reagimet vijnë pas paralajmërimeve se është në prag të nënshkrimit një protokoll bashkëpunimi në mes të EULEX-it dhe Ministrisë së Brendshme të Serbisë, që përmban rregullat rreth bashkëpunimit policor dhe këmbimit të informatave më qëllim të luftës kundër krimit të organizuar dhe atij ndërkufitarë, si dhe aktiviteteve tjera ilegale, por që lë anash institucionet legjitime të Republikës së Kosovës.

Pas paralajmërimeve për mundësinë e nënshkrimit të një marrëveshje të[ tillë, pa institucionet e Kosovës, dje kanë reaguar edhe analistë e ekspertë të cilët kanë theksuar se EULEX -i është mision monitorues dhe nuk ka të drejtë të nënshkruajë marrëveshje të tilla dhe se nënshkrimi i një marrëveshje të tillë do të thotë shkelje e sovranitetit të Kosovës.
RTK

Berisha: Bashkimi i kombit, projekti i së ardhmes

Tiranë - Në një intervistë televizive, Kryeministri Sali Berisha u ndal në marrëdhëniet Shqipëri-Kosovë, si dhe shpalli bashkimin e kombit si projektin e së ardhmes, në mënyrë që siç tha ai "shqiptarët në Shqipëri, Kosovë dhe kudo që ndodhen në trojet e tyre të ndjehen njëlloj".

Kreu i Qeverisë konfirmoi se "numri i turistëve kosovarë në Shqipëri është mbi 10 fishuar pas ndërtimit të rrugës Durrës-Kukës", duke theksuar se "Qeveria është përqëndruar në ndërtimin e një infrastrukture moderne në të gjithë bregdetin".

Në kulmin e sezonit turistik veror, Berisha shprehu mirënjohjen ndaj të gjithë turistëve kosovarë që vijnë në Shqipëri për të kaluar pushimet e tyre vjetore.

"Shpreh kënaqësinë time të madhe sepse jashtë çdo parashikimi, numri i turistëve krahasuar me muajin korrik të vitit 2008 është rritur me 36 për qind. Mendoja që zgjedhjet do të ngadalësonin turizmin dhe se kriza botërore do të kishte një ndikim negativ mbi turizmin, por e vërteta është se 'bumi' turistik i këtij viti është më i madhi se kurrë", tha më tej Kryeministri Berisha, duke shtuar se "Qeveria duhet të punojë shumë për forcimin e kapaciteteve tona turistike".

Kryeministri Berisha shprehu bindjen se "në mirëkuptim të plotë me qeverinë e Kosovës, dy pikat kufitare mes dy vendeve nuk duhet të ekzistojnë, më në mënyrë që kosovarët të vijnë në Shqipëri si në vendin e tyre dhe e anasjellta".

"Shqipëria duhet të ofrojë shumë më tepër në drejtim të turizimit", tha Kryeministri Berisha, duke shtuar se "brenda vitit 2010 do të sistemohet dhe asfaltohet çdo rrugë që të çojnë drejt bregut".
Gazeta Start