[Llapjani_HH]

Kramer: BE-ja dërgon burokratë në Kosovë

Eksperti për Ballkanin në Universitetin e Vjenës, Helmut Kramer, ka sugjeruar një ribërje të strategjisë së përgjithshme të BE’së për Kosovën, përfshirë atë të EULEX”it. Ai ka thënë për Europën e Lirë se strategjia e BE’së për momentin është shumë kontradiktore.

REL: Zoti Kramer, bazuar në njohjen tuaj, a mund t’i bëni një përshkrim përmbledhës gjendjes aktuale në Kosovë?

HELMUT KRAMER: Gjendja në Kosovë vazhdon të jetë e paqëndrueshme dhe kritike. Kjo vihet re më së shumti në fushën ekonomike e sociale, por edhe në problemet me kriminalitetin. Përveç këtyre, ka një pakënaqësi të thellë të Qeverisë në Prishtinë ndaj politikave të fundit të EULEX-it.

REL: Le të mbetemi tek raportet Qeveri - EULEX. EULEX-i po përpiqet të arrijë marrëveshje me Beogradin rreth bashkëpunimit policor, çfarë është kundërshtuar nga Qeveria, pasi nuk është përfshirë në proces. A besoni se prania evropiane dhe BE-ja në përgjithësi kanë strategji të qartë ndaj Kosovës?

HELMUT KRAMER: Jo, nuk mendoj se kanë. Politika e Bashkimit Evropian në Kosovë është politikë reaguese ndaj atyre që ndodhin dhe që dominohet nga parimi i stabilitetit. Kjo do të thotë që BE-ja është e butë me Serbinë, çfarë është shumë negative për Qeverinë në Prishtinë.

REL: Në këto kushte, çfarë duhet të bëjë Qeveria e Kosovës dhe BE-ja që të ndryshojnë gjendjen?

HELMUT KRAMER: Prishtina zyrtare nuk është shumë aktive. Aty vazhdon të sundojë politika bazuar në idenë se kanë mbështetjen e plotë të Shteteve të Bashkuara. Klasa politike në Kosovë është më shumë e shqetësuar për të siguruar e forcuar zonat e pushtetit dhe ndikimit personal, sesa të ndërmarrë nisma aktive e konstruktive.

REL: Mbetemi tek mënyra e qeverisjes në Kosovë. Në raportin tuaj të pak kohëve më parë thoni se korrupsioni është ndër problemet kyçe. Sipas jush, në çfarë shkalle është i përhapur korrupsioni dhe çfarë kërcënimi paraqet për demokracinë në Kosovë?

HELMUT KRAMER: Korrupsioni është problem thuajse në çdo vend, përfshirë dhe vendet e zhvilluara. Do të kujtoja këtu rastin e Italisë. Në Kosovë, korrupsioni po pengon klasën drejtuese që të orientohet drejt qëllimeve të përbashkëta të shoqërisë dhe të vendit.
Ekzistojnë këtu dhe disa ndikime nga tradita. Tek korrupsioni ndikon dhe mënyra klanore e të menduarit apo e zonave të ndikimit. Është një gjendje vërtet katastrofike.

REL: Përcaktimi katastrofik është një përcaktim i rëndë. A mund ta elaboroni më konkretisht mendimin tuaj?

HELMUT KRAMER: Po. Të zhvillosh një vend si Kosova, që cilësohet si shtet i papërfunduar, ku një pjesë e territorit kontrollohet nga Serbia, është një punë shumë e vështirë. Nëse shtojmë këtu nivelin shumë të ulët të zhvillimit ekonomik dhe perspektivën po ashtu të dobët të këtij zhvillimi, situata bëhet më e qartë. Ekziston nevoja për një politikë realiste nga Qeveria, çfarë nuk po ndodh në realitet.

REL: A shihni ndonjë shpresë në mesin e klasës politike në Kosovë? A ka të tillë që do të sillnin qasje të re në qeverisje dhe në zhvillimin e vendit?

HELMUT KRAMER: Për fat të keq, jam pesimist. Këtu ndikon së tepërmi dhe strategjia e Bashkimit Evropian, e cila për momentin është shumë kontradiktore. Misioni i EULEX-it po përpiqet të zhvillojë rendin dhe ligjin pa pranuar pavarësinë e vendit. Ka dhe shumë elemente të tjera që e bëjnë pamjen të zymtë.

REL: Sipas jush, a ka dëmtuar në ndonjë mënyrë prania ndërkombëtare mënyrën se si është zhvilluar demokracia në Kosovë pas vitit 1999?

HELMUT KRAMER: Nga një anë kemi të bëjmë me një rast të suksesshëm në kuptimin që janë ngritur institucionet politike të pranuara nga popullsia dhe zgjedhjet janë mbajtur rregullisht. Megjithatë, mungon një kulturë politike demokratike dhe aktive.

REL: Përmendët se Kosova është shtet i papërfunduar dhe i ndarë. Cilat janë gjasat që Kosova të shndërrohet në shtet unik?

HELMUT KRAMER: Mendoj se shpresat që të ndodhë një gjë e tillë janë në afat të mesëm apo të gjatë. Është shumë e rëndësishme që Qeveria serbe të pranojë procesin në Kosovë. Bashkimi Evropian ka mundësi që të ushtrojë presion mbi Beogradin, pasi Serbia është shumë e interesuar të anëtarësohet në BE. Kemi të bëjmë me një situatë të vështirë, ku nga një anë kemi pavarësinë e Kosovës dhe nga ana tjetër kemi humbjen e krenarisë serbe. Këtu duhet thënë se Beogradi ka pasur disa suksese në raport me Kosovën. Mbetet të shpresojmë se Beogradi do të zhvillojë një politikë më realiste dhe pragmatike në raport me Kosovën.

REL: A shihni ndonjë sinjal që BE-ja po zhvillon politikë kushtëzuese ndaj Serbisë në raport me qasjen e Beogradit ndaj Kosovës?

HELMUT KRAMER: Jo, nuk e kemi një politikë të tillë. Kjo nuk e ndihmon as Qeverinë në Prishtinë, e cila sheh se ka marrëveshje sekrete mes Beogradit dhe BE-së. Së fundi, kemi përpjekje për marrëveshje në fushën e policisë, çfarë ka rritur shqetësimin e Prishtinës, pasi nuk janë informuar apo këshilluar për një gjë të tillë. Në raportin tonë të para pak javëve themi se duhet të ketë një ribërje të strategjisë evropiane në Kosovë, si ajo e EULEX-it, por dhe strategjia e përgjithshme e BE-së.

REL: Përse nuk po ndodh një gjë e tillë? A është shumë naive politika evropiane, me gjithë faktin që prej dy dekadash është e përfshirë në terren? A nuk ka nxjerrë BE-ja mësime nga përvojat e shkuara, përfshirë dhe atë në Bosnje?

HELMUT KRAMER: Besoj se është e trishtueshme. Këtu do të kujtoja shprehjen se me sa pak mençuri qeveris buldozeri. Diplomatët dhe politikanët përgjegjës janë shumë të shkëputur nga realiteti në Kosovë. Ata, madje, ende besojnë se po e sjellin Ballkanin Perëndimor drejt lirisë dhe demokracisë. Problemi është se ata nuk kanë njohuri për kulturat vendore apo historinë e rajonit. BE-ja po dërgon në terren një klasë burokratësh, që janë në pozitë të privilegjuar atje, por që nuk e kuptojnë pse janë atje dhe nuk e dinë se çfarë po bëjnë.
Gazeta expres

Sulmohet mjeku në QKUK, MSH dënon sulmin

Ministria e Shëndetësisë dhe Qendra Klinike Universitare e Kosovës e kanë dënuar ashpër sulmin që ka ndodhur të mërkurën në Klinikën Interne të QKUK-së, ku internisti dr. Ibrahim Rrudhani, është sulmuar në orar të punës nga dy individë civilë, të cilët dyshohet se janë pjesëtarë të Policisë së Kosovës.

Rasti ka ndodhur të mërkurën në mëngjes dhe në kohën kur mjeku i sulmuar ka qenë në orar të punës, ndërsa QKUK i ka njoftuar për këtë sulm organet e rendit, të cilave u është kaluar rasti.

“Për Ministrinë e Shëndetësisë, janë të papranueshme rastet e kërcënimeve dhe sulmeve fizike ndaj personelit të QKUK-së dhe institucioneve të tjera shëndetësore në vend”, thuhet në reagim.

Ministria e Shëndetësisë ka kërkuar nga organet e rendit që të zbardhin këtë rast dhe rastet e tjera, të sulmeve ndaj mantelbardhëve, duke sjellë para drejtësisë sulmuesit, ndërkohë që nga qytetarët kërkohet që të kenë mirëkuptim dhe respekt për punën dhe dinjitetin e punëtorëve shëndetësor, të cilët brenda kushteve dhe mundësive që kanë po ofrojnë shërbime shëndetësore për të gjithë qytetarët e vendit pa dallim.
Telegrafi

Izraeli i tërbuar nga artikulli i gazetës Suedeze

Zyrtarë Izraelit dhe Suedez u përgjigjen me tërbim të mërkurën ndaj artikullit të gazetës Suedeze Aftonbladet ku thuhej se Izraelitët vrisnin Palestinezët dhe merrnin organet e tyre për trafikim.

Ky artikull i publikuar në të përditshmen më të shitur në Suedi paraqet lidhjen në mes të këtyre të akuzuarve dhe arrestimet e kohës së fundit në SHBA të rabinjëve çifut amerikan për trafikim ilegal të organeve.

Me titullin "Djemtë na u morën për organet e tyre," lajmi bëri bujë në Izrael, ku disa komentues krahasonin këto vrasje me ato për të cilat akuzohen çifutët e Mesjetës nga të Krishterët për vrasjen e fëmijëve të tyre nga ana e çifutëve për gjak.

Shkrimtari i këtij artikulli Donald Bostrom, u bazua në dëshminë e Palestinezëve në Bregun Përendimor dhe në Gazë të cilët i identifikonte vetëm me emrat e tyre të parë. Po ashtu citohet një zëdhënës ushtarak Izraelit i cili mohon akuzat duke thënë se Palestinezët e vrarë nga forcat Izraelite kalojnë nëpër autopsi të rregullta.

Bosrtom gjithashtu shkruan për mungesën e organeve për transplantim në Izrael dhe cekë fushatën e vitit 1992 nga qeveria për rekrutimin e donorëve të rinj.

"Dhe në të njëjtën kohë sa zgjaste kjo fushatë djem të rinj Palestinez zhdukeshin dhe ktheheshin pas disa ditëve në fshatrat e tyre të vdekur me trupat e tyre të prerë e të hapur," shkruan ai.

Zyra e jashtme Izraelite e quajti këtë artikull racist dhe se mund të nxiste krime urrejtjeje dhe se autoritetet duhej të kujdeseshin për këtë gjë.

Ndërsa ambasada Suedeze e quajti artikullin si shokues dhe të tmerrshëm si për Suedezët ashtu edhe për qytetarët izraelit." /forbes.com/
Mesazhi.com