[fadil]

FSK shënoi arritjen e kapaciteteve të para operative Forca e Sigurisë së Kosovës me një ceremoni zyrtare, sot, shënoi arritjen e kapaciteteve të para operative. Liderët më të lartë të shtetit e cilësuan këtë arritje sukses të madh për sigurinë e Kosovës. “Vlerësimi dhe vendimi i NATO-s për arritjen e kapaciteteve operacionale të FSK-së, është moment kulmor i vlerësimit të punës profesionale dhe të përbashkët të KFOR-it dhe FSK-së për më pak se 8 muaj” thanë përfaqësuesit e lartë shtetëror në ceremoninë e sotme. Presidenti Fatmir Sejdiu dhe komandanti i FSK-së gjeneral Sylejman Selimi, parakaluan para njësiteve elite të Forcës së Sigurisë së Kosovës, e cila sot festoi arritjen e kapaciteteve të para operacionale. Me 15 shtator, presidenti Fatmir Sejdiu kishte pritur komandantin e KFOR-it, gjenerallejtënant Markus Bentler, i cili ia dorëzoi vendimin e strukturave komanduese të NATO-s me vlerësimin se Forca e Sigurisë e Kosovës ka arritur Kapacitetet Fillestare Operacionale. Sejdiu e quajti këtë lajm të madh për Kosovën .

“ Padyshim, puna e deritanishme për ndërtimin e FSK është njëra ndër rrëfimet më të mira të suksesit të përgjithshëm që është arritur në Kosovën e pavarur. Republika e Kosovës është e vendosur që të ketë një forcë serioze të sigurisë e cila do t’i shërbejë si shembull respektimit të larmisë etnike. Me këtë qëllim fisnik le të udhëhiqemi përherë nga synimi dhe vizioni ynë për një të ardhme për vendin tonë dhe gjithë rajonin”, tha presidenti Sejdiu.

Kryeministri Hashim Thaçi, e vlerësoi poashtu ditën e sotme si një moment historik të zhvillimit të shtetit të ri. Ai, tha se qeveria e Kosovës është krenare për strukturat e ndërtuara të sigurisë në vend.

“ Forca e sigurisë së Kosovës është dhe do të jetë gjithmonë e hapur për tu pasuruar me pjesëtarë nga të gjitha komunitete kosovare. Besoj që uniforma e juaj do të jetë simbol krenarie dhe dinjiteti për të gjithë ata që do ta mbajnë, do të jetë garant i sigurisë së fëmijëve tanë dhe shtetit tonë”, tha kryeministri Thaçi.

Ministri i Forcës së Sigurisë, Fehmi Mujota tha se FSK –ja është një forcë shumetnike, pa dallim gjinie e religjioni, që ofron siguri për tërë territorin e Republikës së Kosovës, për të gjithë qytetarët e saj dhe e aftë për të marrë pjesë në misionet humanitare jashtë vendit.

“Vlerësimi dhe vendimi i NATO-s dhënë me 15 shtator për këtë arritje të FSK-së është një moment kulmor i vlerësimit të punës profesionale dhe të përbashkët të KFOR-it dhe FSK-së për më pak se 8 muaj. Kjo shënon hapin e parë dhe dëshmon suksesin e arritur në vitin e parë por jo vetëm kaq sepse arritja e kapaciteteve të para operacionale e garanton suksesin për objektivave të përcaktuara drejt arritjes së kapaciteteve të plota operacionale në dy vitet e ardhshme”, tha ministri Mujota.

Mujota e vlerësoi sukses rekrutimin e 400 prestarë të rinj të FSK-së. Ai, u shpreh i bindur se gjatë dy viteve të ardhshme do të arrihet numri prej 2500 pjesëtarë të FSK dhe 800 pjesëtarëve rezervë. Udhëheqësit e vendit thanë se përkundër këtij suksesi FSK-në e pret një punë e madhe për të dëshmuar se është forcë profesionale dhe moderne. Ata shprehen synimin që FSK shumë shpejtë do të arrijë të jetë pjesë e operacioneve të Aleancës Veriatlantike edhe jashtë vendit. Në ceremoni morën pjesë edhe përfaqësues të misioneve diplomatike në Kosovë, familjet Jashari, Rugova e qytetarë të tjerë.
mbrapa18 shtator 2009 - 14:50:17