[Llapjani_HH]

Mali i Zi futet në territorin e Kosovës

Dy tabela me mbishkrimet “Mirë se vini në Malin e Zi” dhe “Mirupafshim”, janë vendosur me urdhrin e Ministrisë së Punëve të Brendshme të Malit të Zi, thellë në territorin e Kosovës, pikërisht në vendin ku fillon brezi neutral kufitar gati tri kilometra brenda në pjesën e shtetit tonë.

Vendosja e këtyre dy tabelave, një ditë më parë nga shteti malazias, ka krijuar indinjatë te qytetarët e komunës së Pejës, që e kanë vërejtur atë derisa kanë kaluar andej, e të cilët menjëherë i kanë informuar krerët institucionalë të komunës së Pejës.

Për tu informuar më mirë për këtë veprim të fqinjëve malazias, kryetari i komunës së Pejës, Ali Berisha, i shoqëruar edhe nga komandanti i policisë rajonale të Pejës, koloneli Ahmet Hasi dhe drejtori i Policisë Kufitare për rajonin perëndim, majori Azem Mala, është takuar të enjten me kryeinspektorin e policisë kufitare të Malit të Zi, Predrag Kukaj.

Në takimin e zhvilluar në brezin kufitar, oficeri malazias është arsyetuar se policia malaziase ka pasur kompetencat e saj qe 10 vjet në këtë pjesë, ngase sipas tij, në vendin ku janë vendosur tash tabelat, kanë qenë më herët tabelat e UNMIK-ut dhe KFOR-it.

Derisa majori Azem Mala, përmbahej dhe hezitonte të fliste më tepër për këtë shkelje territoriale nga Mali i Zi, ndërsa kryetari i Pejës, Ali Berisha, ia tërhoqi vërejtjen majorit Mala, se Policia Kufitare e Kosovës nuk duhet të heshtë dhe të hezitojë të flasë se tabelat janë vendosur në territorin tonë.

Berisha u tha atyre se ajo tokë nuk është vetëm territor i Kosovës, por edhe territori i Komunës së Pejës, prandaj, siç iu tha ai, është drejtë e tij si kryetar që të informohet se çka po ndodh me territorin e komunës që ai drejton.
Gazeta Expres

Kufijtë e Kosovës janë të njohur ndërkombëtarësisht

“Kufijtë e Republikës së Kosovës janë të ditur dhe këta kufij janë të njohur ndërkombëtarësisht. Për ne është e papranueshme çdo qasje e kujtdo qoftë që në një formë apo formë tjetër ka intencën e lëvizjes së kufirit”, ka theksuar të premten presidenti Fatmir Sejdiu, gjatë një vizite në komunën e Pejës – duke komentuar vendosjen e tabelës me mbishkrimin “Mirë se vini në Malin e Zi” nga autoritetet malazeze thellë në territorin e Kosovës – në brezin kufitar të Kullës.

“Ne dëshirojmë që të kemi marrëdhëniet më të mira me Malin e Zi dhe ato janë dëshmuar në ecje praktike të deritashme”, tha presidenti Sejdiu, duke shtuar se organet kompetente që merren me çështjen e shënimit të kufijve ndërshtetërorë apo vendkalimeve të rëndësishme kufitare, që janë të nevojshme për komunikimin e qytetarëve dhe të mallrave, do ta bëjnë punën si duhet.

“Kosova i ka kufijtë e vet të qartë dhe nëse ka ndonjë ngatërresë të vogël në kuptimin e pretencës së dikujt, jashtë asaj që është normale në relacionet ndërshtetërore, sigurisht që do të ketë përgjigjen e vet”, vijoi Sejdiu.

“Për ne me rëndësi është që edhe Mali i Zi edhe Kosova kanë miqtë e përbashkët. Të dy vendet janë tepër të interesuara të lëvizin shpejt në proceset ne integrimeve euroatlantike dhe të dy vendet në bashkëpunimin rajonal kanë pjesën e bashkëpunimit të tyre”, tha ai.

Gjatë ditës së premte, presidenti Sejdiu, i shoqëruar nga ministri i Tregtisë dhe Industrisë, Lutfi Zharku, ka vizituar Komunën e Pejës, ku nga kryetari i komunës, Ali Berisha është njoftuar me zhvillimet në këtë komunë dhe me problemet e të arriturat e pushtetit lokal.
Telegrafi

Berisha u nderua me diplomë false

Universiteti që i ka dhënë gjithmonë frymëzim kryeministrit Sali Berisha e ka pajisur atë me një diplomë false.

Pikërisht, në ceremoninë e laureimit të tij me titullin "Doctor Honoris Causa", në të cilën deklaroi se Universiteti i Prishtinës është Harvardi, Sorbona dhe Kembrixhi i lirive të tij.

Siç bën të ditur e përditshmja "Koha Ditore", diploma që i është dhënë të martën, e që dëshmon këtë titull nderit të Universitetit, nuk është ajo që bartë vulën apostile dhe e cila është firmosur nga ish-rektori Enver Hasani, menjëherë pasi përbërja e vjetër e Senatit, më 22 janar të 2008-s, vendosi ta laureonte me këtë titull kryeministrin shqiptar,

Berishës, sipas kësaj të përditshmeje, i është dhënë një diplomë tjetër, që ndryshon në përmbajtje. Një që nuk ka vulë apostile, që ka një arsyeshmëri diçka më ndryshe se origjinalja dhe me një datë tjetër nga ajo kur është marrë vendimi.

Kjo mban firmën e rektorit të tanishëm, Mujë Rugova, të cilën e ka hedhur më 6 tetor. Në këtë diplomë nuk i është shkruar posti i Berishës, pos që shkruan mbi emër "Shkëlqesisë së Tij. Ndërkaq, në diplomën e parë shkruan "Kryeministër i Shqipërisë".

Ish-rektori Enver Hasani ka konfirmuar për KD se ai kishte firmosur diplomën e titullit të nderit "Doctor Honoris Causa", që më 22 janar të 2008-s Senati ia ka ndarë Berishës. Ai nuk ka dashur të komentojë ndërrimin e diplomës, pos që ka thënë se duhet të pyetet rektori i ri për këtë veprim. Ndërkaq, rektori i ri, Rugova, i është shmangur përgjigjes në këtë pyetje. /KohaDitore/Telegrafi/
Mesazhi.com