[Peja-Boy]

Krijimi i një gjyqësori të pavarur
Krijimi i një gjyqësori të pavarur do të jetë një ndër detyrat primare me të cilat do të merret Aleanca Kosova e Re.
AKR-ja angazhohet për ndërtimin e shtetit të së drejtës, ku të gjithë qytetarët do jenë të barabartë para ligjit. Dhe njëherësh, askush nuk do të dalë mbi ligjin.Aleanca Kosova e Re angazhohet për gjyqësor efikas dhe të pavarur.Ne do të bëjmë përpilimin e një strategjie për reformimin e sistemit gjyqësor dhe do të angazhohemi për sigurimin e gjyqtarëve dhe prokurorëve, duke iu krijuar atyre garanci materiale dhe fizike për punën që bëjnë.
Dialogu i brendshëm dhe kontrata shoqërore
Institucionet dhe qytetarët e Kosovës duhet të fillojnë dialogun e brendshëm dhe të lidhin kontratë shoqërore rreth të gjitha parimeve mbi të cilat do të udhëhiqet Kosova drejt integrimeve euro-atlantike. Kosova domosdoshmërish ka nevojë për një kontratë shoqërore, të pranuar nga të gjithë aktorët shoqërorë, qofshin ata individë apo përfaqësues të subjekteve juridiko-politike. Me anë të saj ndërtohet konsensusi shoqëror duke krijuar kohezionin shoqëror. Vetëm në këtë mënyrë do të përcaktohen obligimet dhe të drejtat e të gjithë pjesëmarrësve në shoqëri dhe Kosovës do t’i hapet rruga drejt integrimeve euro-atlantike.
Të drejtat e njeriut
Mbrojtja dhe kultivimi i të Drejtave të Njeriut është privilegj njerëzor. Shteti dhe ekonomia janë në shërbim të njeriut dhe të të drejtave të tij, e jo anasjelltas, andaj ne do t’i standardizojmë dhe garantojmë ato në bazë të konventave më të përparuara ndërkombëtare.
Vetëm aty ku garantohen dhe praktikohen të drejtat e lirisë, njerëzit mund të jetojnë si të lirë dhe të barabartë dhe të praktikojnë demokracinë. Vetëm aty ku aplikohen të drejtat sociale themelore, mund të jenë të pranueshme të drejtat e lirisë dhe të pjesëmarrjes politike. Të gjithë njerëzit kanë të drejtë për angazhim në dobi të vendit të tyre, komunitetit të tyre, popullit që i përkasin si dhe për kultivimin e gjuhës dhe kulturës së tyre. E drejta e kombeve e bazuar në Kartën e OKB-së është parim bazë i vizionit tonë për të drejtat e njeriut.
Kosova dhe UE-ja
Evropa e vitit 1945 ka hyrë në histori si Evropë e gërmadhave që la pas politika. Evropa e vizionarëve politikë e filluar me Marrëveshjen e Romës (1957) e deri te ajo e Amsterdamit ishte Evropa e shpresave.
Pas rënies së perdes së hekurt (1989), UE-ja rifilloi me projektin shtesë - bashkimin e plotë të kontinentit dhe zgjerimin e zonës së prosperitetit dhe stabilitetit edhe në vendet fqinjë. UE-ja si bashkim jo vetëm ekonomik, pas pranimit në gjirin e saj edhe të kësaj pjese të kontinentit, do të ishte një hap më afër realizimit të qëllimit të saj.
AKR-ja konform filozofisë politike mbi të cilën është ngritur UE-ja dhe vetë frymës së liberal-demokracisë, Kosovën në një të ardhme të afërt e sheh të integruar plotësisht në Unionin Evropian, si strukturë kjo garantuese e paqes dhe stabilitetit në kontinentin tonë.
Për AKR-në bashkëpunimi i shteteve anëtare të UE-së me shtetet tjera pretenduese për anëtarësim, paraqet një përparësi me shumë emërues të përbashkët dhe vazhdon të mbetet bazamenti real për ruajtjen dhe selitjen e paqes në Evropë.
Për AKR-në shteti mbetet subjekti parësor i Sistemit ndërkombëtar dhe garantues i qeverisjes funksionale.AKR-ja mbështet fuqishëm kursin e integrimeve në fushën e sigurisë dhe atë të politikës, që pashmangshëm do ta shpinte kontinentin drejt një bashkimi politik.