[Llapjani_HH]

Qeveria shqiptare me iniciativa konkrete për të ndihmuar komunitetin serb, tha Meta

Kryeministri Hashim Thaçi pas takimit me zëvendëskryeministrin dhe ministrin e Jashtëm të Shqipërisë Ilir Meta, theksoi se "Kosova e pavarur dhe Kosova evropiane, janë në interes jo vetëm të qytetarëve të Kosovës pa asnjë dallim etnik, por janë në interes edhe të të gjithë fqinjëve të Kosovës".

"Ky realitet është mirë të njihet nga të gjithë, sepse çdo qëndrim tjetër nuk i shërben momentit të ri përshpejtues të integrimit të Ballkanit Perëndimor në Bashkimin Evropian" tha pas takimit kryeministri Thaçi.

Ndërkaq duke folur për marrëdhëniet mrs dy vendeve Thaçi tha se është inkurajuese perspektiva euroatlantike për Kosovën si pjesë e NATO s dhe e Bashkimit Evropian në të ardhmen e afërt dhe perspektiva e integrimit në Bashkimin Evropian të Shqipërisë.
"Reformat do të vazhdojnë në të dy vendet, reforma demokratike edhe në legjislacion, edhe në politikë dhe ekonomi. Kontributi është për paqe, stabilitet, bashkëpunim rajonal dhe perspektivë evropiane e dy vendeve dhe dy qeverive tona", theksoi Thaçi.

Ndërkaq zëvendëskryeministri Ilir Meta theksoi se "një shumicë e padiskutueshme e vendeve të NATO s dhe Bashkimit Evropian e kanë njohur Kosovën", duke vlerësuar sidomos anëtarësimin e Kosovës në Fondin Monetar Ndërkombëtar dhe në Bankën Botërore, si "një ngjarje tepër premtuese, në mënyrë që Kosova shumë shpejt të arrijë edhe progresin e dëshiruar ekonomik dhe social dhe njëkohësisht edhe zhvillimet e tjera".
Po ashtu Meta vlerësoi në mënyrë të veçantë, siç tha, kurajën dhe vizionin e Qeverisë së Kosovës për të zgjidhur çështjen e kufirit me Maqedoninë, e cila solli edhe njohjen diplomatike. Kjo, shtoi ai, tregon se Kosova ka idenë e qartë për fqinjësi të mirë, që në themelet e veta ka integrimin evropian edhe të Kosovës dhe gjithë rajonit tonë.

Meta me këtë rast shprehu vlerësimin më të mirë për standardet e zgjedhjeve të fundit në Kosovë, duke thënë se "këto zgjedhje ishin një test i shkëlqyer i formimit të institucioneve në Kosovë dhe në mënyrë të veçantë vlerësoj rritjen e dukshme dhe premtuese të pjesëmarrjes së komunitetit serb në këto zgjedhje".

Po ashtu Meta shprehu angazhimet e Qeverisë shqiptare për të ndihmuar edhe për të kontribuuar në plotësimin e disa shërbimeve të komunitetit serb me iniciativa konkrete.

"Kosova e pavarur dhe Kosova evropiane, janë interes jo vetëm të qytetarëve të Kosovës pa asnjë dallim etnik, por janë në interes edhe të të gjithë fqinjëve të Kosovës", tha Meta. Gjatë kësaj vizite, zëvendëskryeministri dhe ministri i Jashtëm shqiptar, Ilir Meta dhe ministri i Jashtëm i Kosovës, Skënder Hyseni, kanë nënshkruar një protokoll bashkëpunimi, si shprehje e thellimit të partneritetit ndërmjet dy vendeve dhe në funksion të proceseve integruese.
QIK-u

Privatizimi, bllokohet nga politika

Zyrtarët e AKP-së thonë se kanë tërhequr nga tenderi disa ndërmarrje në Shtërpcë dhe në Brezovicë për të mos çrregulluar procesin e zgjedhjeve lokale dhe pjesëmarrjen e serbëve. Oliver Ivanoviq thotë se kjo s’ka lidhje me zgjedhjet, por me disponimin e Serbisë

Privatizimi i kompleksit në Brezovicë nuk po mund të nisë pa pëlqimin e politikës. Agjencia Kosovare e Privatizimit dy herë e ndryshoi agjendën e punës për të mos ua prishur qejfin serbëve lokalë të komunës së Shtërpcës. Ajo hoqi nga lista e shitjeve tri objekte të vogla, që do të shënonin fillimin e procesit të privatizimit në këtë anë.

Ngjashëm si paraardhësi i kësaj agjencie, AKM, që nuk mund të çonte në privatizim kompleksin pa pëlqimin e Beogradit, edhe AKP-ja ka ngecur për shkak të zgjedhjeve lokale. Së paku kjo është arsyeja publike, sipas anëtarëve të Bordit të AKP-së, përse “Kafeteria Shtërpcë”, “Restorant Kasollja Brezovicë” dhe “Kasollja e vogël me trungje Murzhicë-Brezovicë”, u hoqën së pari nga vala e 40, e më vonë edhe nga ajo e 41-të e privatizimit.
Megjithatë, e vërteta është ndryshe, sipas sekretarit për Kosovën në Qeverinë e Serbisë, Oliver Ivanoiviq, i cili thotë se AKP-ja nuk ka marrë pajtimin e komunitetit serb për të filluar privatizimi në Brezovicë.

Sipas tij, serbët e Shtërpcës e shprehin qëndrimin e Beogradit dhe kërkesa e tyre për shtyrjen të privatizimit nuk ka qenë e lidhur me zgjedhjet, por me faktin se kush duhet ta bëjë privatizimin e ndërmarrjeve në këtë anë.
“Ne nuk e kemi lidhur këtë çështje me zgjedhjet, por kemi menduar se Serbia ka investuar aty dhe duhet të pyetet kur dhe si të bëhet privatizimi”, pohon Ivanoviq për “Express”.

Megjithatë, ai thotë se Serbia nuk do të ndërhyjë në këtë proces dhe nuk do të mundohet t’i shesë objektet në këtë anë. Por, do ta kundërshtojë procesin, nëse duhet edhe në Gjykatën Ndërkombëtare të Drejtësisë.

“Unë mendoj se privatizimi do të ndodhë njëherë, por me këtë nuk duhet ngutur. Para se të nisë procesi, duhet të merret pajtimi i serbëve. Përndryshe, ai mund të provokojë ngjarje të shumta”, ka thënë Ivanoviq.

Burime të gazetës “Express” thonë se në adresë të Bordit të AKP-së ka ardhur një shkresë nga komuniteti serb i kësaj ane me kërkesë që të shtyhet privatizimi deri në përfundim të balotazhit për zgjedhjet lokale.

Megjithatë, zyrtarisht nga kjo agjenci nuk jepet arsyeja përse është bllokuar privatizimi, edhe pse kohë më parë për këtë ishte arritur marrëveshje mes udhëheqësve të Kuvendit Komunal të Shtërpcës, kompanisë “Inex” të Beogradit dhe AKP-së.

“Privatizimi në Brezovicë nis kah fundi i dhjetorit, ose më së largu deri kah mesi i janarit, pasi të kalojnë këto zhvillimet politike”, thotë një anëtar i Bordit.

Ndërkaq, zëdhënësja e AKP-së, Arta Gosalci vlerëson se i takon Bordit të vendosë çfarë të bëjë në këtë drejtim.

“Se çfarë do të ndodhë dhe kur do të privatizohen këto ndërmarrje, i mbetet Bordit të AKP-së të vendosë”, thekson Gosalci.

Edhe media ndërkombëtare shkruajnë se shumica e qytetarëve dhe udhëheqësit e Shtërpcës janë kundër privatizimit. Sipas radios “Deutche Welle”, arsyeja kryesore për këtë është se sipas serbëve, pronar i kompleksit është Qeveria e Serbisë dhe vetëm ajo ka të drejtë të vendosë për të ardhmen e tij.

"Kjo është grabitje e pronës shtetërore të Republikës së Serbisë. Unë shpresoj se me ndihmën e qeverisë serbe do të ketë sukses për të ndalur këtë proces të privatizimit", thotë Zvonko Mihajlloviq, lider i strukturave paralele në këtë komunë.

Në anën tjetër, zvarritja e procesit të privatizimit, sipas komunitetit të biznesit, është një mesazh i keq për investitorët. Berat Rukiqi, nga Oda Ekonomike e Kosovës, thotë se ndërhyrja e politikës në punët e AKP-së do të trembë investitorët që janë të interesuar t’i blejnë këto ndërmarrje shoqërore.

“Me këto sjellje ne dërgojmë sinjale tek investitorët e huaj se në Kosovë ka risk të lartë politik”, pohon Rukiqi.
Gazeta Expres

Çahet asfalti i rrugës "patriotike"

Pa kaluar as pesë muaj nga përfundimi i punimeve në një pjesë të rrugës, vihen re disa plasaritje në trotuarin e segmentit rrugor Kukës-Morinë. Mësohet se punimet në këtë pjesë janë ndërtuar kryesisht nga kompani shqiptare. Në pjesë të caktuara, shembjet e dheut të skrapatës dhe çarjet paraqesin rrezik për makinat dhe udhëtarët, por edhe për reputacionin e një vepre kaq të madhe siç është autostrada Durrës-Kukës-Morinë.

Ndërsa tuneli i Kalimashit, i cili me shembjen e galerisë jugore ende pa u vënë në punë shkaktoi shumë debate politike dhe profesionale, çarjet që vihen re në segmente të ndryshme të autostradës duket se po kalojnë pa zhurmë.

Çarja e parë vërehet në afërsi të godinës së ish-divizionit ushtarak të Kukësit, ku sot ndodhet një repart i forcave tokësore të ushtrisë.

Për shkak të strukturës së butë dhe lagështirës së tokës, në rreth 50 metra linearë, asfalti ka pësuar një çarje me thellësi gati disa metra. Çarjet e asfaltit, si dhe rrëshqitjet e mureve mbajtëse në këtë pjesë të autostradës, ndodhën vetëm pak muaj pas fillimit të funksionimit të aksit, ndonëse ende nuk është inauguruar si pjesë rruge.

Por plasaritjet e asfaltit nuk janë i vetmi problem që vihen re. Përgjatë këtij segmenti janë shfaqur rrëshqitje të dherave dhe rënie të gurëve në korsitë e kësaj autostrade. Në këtë pjesë të rrugës, ku shpejtësia e mjeteve shkon më shumë se 120 kilometra në orë, rënia e gurëve mund të shkaktojë aksidente tragjike për drejtuesit e automjeteve.

Specialistët tregojnë se shpejtësia minimale në këtë pjesë të autostradës është 80 km/orë, shpejtësi kjo mjaft e lartë për të shtuar probabilitetin e aksidenteve nëse në rrugë ndodhen gurë të rënë prej skrapatës.

Ndërkohë janë vërejtur shembje të trasesë në autostradë dhe në pjesë të tjera, por edhe rrëshqitja dhe dëmtimi i 20 metrave bankinë dhe korsi të emergjencës, që ndodhet rreth 2.4 km pranë pikës doganore të Morinit.

Sidoqoftë mësohet se vepra në fjalë ende nuk është dorëzuar nga ndërtuesit, ndërsa duket se edhe aftësia paguese e shtetit për punën e kryer nuk ka qenë shumë e mirë. Siç mësohet nga punëtorët e kompanive shqiptare, që kanë punuar në këto segmente, ende nuk janë paguar për katër muajt e fundit të punës.
Telegrafi