[Llapjani_HH]

Melihate Tërmkolli dha sot dorëheqjen nga Kryesia e LDK-së

Melihate Tërmkolli dha sot dorëheqje nga Kryesia e Lidhjes Demokratike të Kosovës.

Në një konferencë për shtyp, znj. Tërmkolli tha se dorëheqjen nga pozita e anëtares së Kryesisë së LDK-së e jep për shkak të "humbjes së thellë të LDK-së në dy palë zgjedhjet e fundit, si akt moral dhe pjesë e përgjegjësisë, duke qenë pjesë zyrtare e Kryesisë së LDK-së".

Më tej ajo thotë se që "nga Kuvendi VI zgjedhor i LDK, Kryesia e LDK është jofunksionale dhe tërësisht formale".

Sipas saj, vendimet të cilat merren në emër të kryesisë "janë të një rrethi të ngushtë të udhëheqjes së LDK", që nuk përfillin statutin e partisë.

Në tekstin e dorëheqjes, znj/.Tërmkolli pohon gjithashtu se "orientimi programor i LDK si parti e qendrës së djathtë është sakrifikuar dhe është cenuar rëndë për interesa individuale të udhëheqjes së LDK-së" dhe se ka "shkaktuar anarki dhe konfuzitet të plotë brenda LDK dhe në shoqërinë kosovare në përgjithësi".

Melihate Tërmkolli kërkon edhe dorëheqjen e Kryetarit të LDK-së, Fatmir Sejdiut, të anëtarëve të Kryesisë së LDK-së, siç tha, "për shkak të defaktorizimit të LDK-së, dëmtimin e interesave të vendit, në veçanti me koalicionin e panatyrshëm qeverisës".

Melihate Trëmkolli është kryetare e Forumit të Gruas së LDK-së.
QIK-u