[bert]

Lirohen 28 ushtarë të Afganistanit


TIRANE- Forcat e Armatosura lirojnë nga detyra 28 oficerë dhe nënoficerë të regjimentit Komando, pas kthimit nga bazat e Heratit dhe Shinadit. Ministria e Mbrojtjes, me një vendim të ngjashëm me periudhën e regjimit komunist, duket se ka gjetur grupin armiqësor brenda ushtrisë, dhe pikërisht brenda "regjimentit" që në 10 vjetët e fundit ka marrë vetëm medalje nderi në misionet në Bosnjë, Irak dhe Afganistan. Shkak është bërë një kërkesë e firmosur nga 86, prej 110 forcave komando që ndodheshin në mision në Herat dhjetorin e vitit të kaluar, ku denonconin shkeljen e kontratës së bërë nga shteti si dhe kërkonin heqjen e tatimit për pagesat e tyre dhe rritjen e rrogës. Kërkesa, në fakt erdhi pas skandalit që solli rënia e gripit të derrit tek një prej ushtarëve shqiptarë në Herat dhe dyshimi edhe për 3 të tjerë. Sëmundja zbuloi mungesën e kushteve minimale në çadrat e "shfryra" të lëna në dispozicion të kontingjentit shqiptar, kur forcat e tjera qëndronin në kontejnerë me aspirim e ajër të kondicionuar.
Burime të Gazetës shprehen se janë gati urdhrat e përjashtimit dhe uljes në gradë edhe për të paktën 7 oficerë të misionit, por veprimet janë duke u kryer gradualisht për të shmangur ndonjë rebelim të mundshëm nga ana e ushtarakëve. Gazeta ka siguruar kopjen e kërkesës së dërguar kryeministrit Sali Berisha, ministrit të Mbrojtjes, Arben Imami, shefit të Shtabit të Përgjithshëm të Ushtrisë, gjeneralit të brigadës Maksim Malaj dhe komandantit të Forcës së Bashkuar, Agim Lala. Në fakt, kërkesa e forcave Komando, të cilët kërkonin deri në zëvendësimin e tyre në rast se do merrej parasysh, është pasqyruar edhe në 'Gazetën Shqiptare', po në muajin dhjetor. Vetë nënshkruesit kanë deklaruar se ata e kanë bërë me vetëdije një kërkesë të përbashkët, akt të cilin e pranon edhe statusi i ushtarakut dhe nuk është peticion apo ultimatum për braktisje të misionit, siç duan ta konsiderojnë zyrtarët, të cilët sipas tyre me një të rënë të lapsit kanë vendosur cilit prej firmëtarëve t'u djegin karrierën ushtarake. Ushtarakëve të liruar nuk u është dhënë urdhri i zbardhur i lirimit, por veç një numër dhe një datë. Emrat e tyre janë shënuar tek porta e repartit si listë e personave të padëshiruar dhe që u ndalohet kategorikisht hyrja. Shkarkimet kanë nisur të mërkurën. 12 nënkomandantë skuadrash dhe nënoficerëve u është kërkuar të dorëzojnë pajimet dhe u është komunikuar urdhri i shkarkimit për veprime të pahijshme në shërbim në Afganistan. Gjithsesi, nuk u është dhënë urdhri i plotë. Dy ditë më pas janë thërritur 8 nënoficerë të tjerë, të cilëve u është komunikuar urdhri i lirimit në të njëjtën mënyrë. Në fillim të javësh ishin gati "fletëthirrjet" edhe për 7 oficerë, ndërsa të tjerë do të humbin gradat. Më parë, Forcat Tokësore u kishin dhënë lejet e vitit të kaluar krejt ushtarakëve të misionit dhe e gjithë meseleja e lirimeve dhe shkarkimeve erdhi pas kthimit nga leja. Gazeta publikon tekstin e plotë të kërkesës që mbante firmat e 86 ushtarakëve të Komandos, nga 110 që ishin gjithsej në bazën e Heratit dhe që daton më 7.12.2009.
"Në muajin gusht të vitit 2009 jemi bërë pjesë e kontingjentit të parë (shtesë) në misionin në Herat, Afganistan. Për realizimin me sukses të këtij misioni kemi nënshkruar disa kontrata në të cilat përfshihen të drejtat dhe detyrimet e të dyja palëve, dhe në pikën që i referohet trajtimit financiar nuk cilësohej ekzaktësisht masa me të cilën do të trajtohemi. Në bazë të udhëzimeve dhe premtimeve të drejtuesve të regjimentit Komando se ne do të trajtohemi me dietë të kënaqshme dhe të patatueshme, ne kemi marrë përsipër realizimin e këtij misioni. Pavarësisht vështirësive të shumta të hasura për shkak të mbështetjes së dobët logjistike, jemi munduar të realizojmë me saktësi dhe profesionalizëm detyrat e ngarkuara në bashkëpunim me aleatët e NATO-s, duke e konsideruar veten si të barabartë mes të barabartëve.
Tani kemi mësuar se trajtimi financiar i yni do të jetë 60 USD në ditë dhe se do të jetë i tatueshëm. Ne kemi të njëjtat detyra me vendet e tjera të koalicionit dhe pjesëtarë të NATO-s. Trajtimi financiar i mësipërm jo vetëm që nuk njësohet me asnjë vend anëtar të NATO-s, jo vetëm nuk justifikon punën që ne kryejmë, por edhe nuk mbulon nevojat e ushtarakëve shqiptarë. Si rrjedhojë ne kërkojmë: Trajtimi financiar të jetë i njësuar me ato të vendeve të tjera të NATO-s që kryejnë detyra të përbashkëta me ne; Trajtimi financiar të bëhet në monedhë europiane; Trajtimi financiar i konsideruar si dietë të mos tatohet; Të informohemi zyrtarisht për trajtimin financiar.
Në rast mosmarrje parasysh të kërkesave tona, kërkojmë ndërprerjen e menjëhershme të misionit dhe brenda datës 20.12.2009, kthimin e menjëhershëm në atdhe, sepse e konsiderojmë misionin të papërballueshëm".