[Arb]

Engel: Korrupsioni dëmton imazhin e Kosovës

Ligjvënësi demokrat nga New Yorku, Eliot Engel, bashkëkryetar i Grupit për Çështjet Shqiptare në Kongresin amerikan, duke komentuar zhvillimet e fundit në Kosovë, lidhur me korrupsionin, ka vlerësuar se çështja e imazhit është shumë e rëndësishme për Kosovën si një shtet i ri që përpiqet të sigurojë njohje“Korrupsioni është problem. Në Ballkan lufta ndaj tij duhet të vazhdojë. Unë kam folur me kryeministrin Hashim Thaçi dhe ai më ka thënë se e shikon me seriozitet problemin e korrupsionit dhe po e lufton atë. Korrupsioni është një problem me rrënjë të thella që nuk është e lehtë për ta çrrënjosur, është një problem i vazhdueshëm. Ne folëm për çështjen e imazhit dhe imazhi është i rëndësishëm për Kosovën si shtet i ri, që përpiqet të sigurojë njohje”, ka thënë Engel në një intervistë për Zërin e Amerikës.
“Nuk ka ditë në Washington, që nuk përpiqem për Kosovën. Përditë flas me ambasadorë, ministra të jashtëm kryeministra, presidentë, që t’i bind për të njohur Kosovën. Dhe pa dyshim që çdo gjë që dëmton imazhin e Kosovës nuk është e mirë”, ka thënë ai.
Gjerat në Kosovë, sipas Engelit, po shkojnë mirë, mirëpo korrupsionin gjithmonë duhet çrrënjosur. “Ne theksojmë vazhdimisht që me gjithë problemet, Kosova, populli i saj po punojnë shumë për të ndërtuar shtetin e ri. Por ka edhe një përqindje shumë të vogël njerëzish që bëjnë veprime të gabuara”, ka thënë Engel, duke shtuar se ai nuk dëshiron të dëgjojë që korrupsioni të jetë lajmi nga Kosova. “...unë dua që përparimi drejt së ardhmes të jetë lajmi nga Kosova”.
Duke folur ndërkaq, për zërat që potencojnë mundësinë e ndarjes së Kosovës, si një zgjidhje për marrëdhëniet e saj me Beogradin, Engel ka thënë se kjo është ide e keqe.
“Po të fillosh të shkëmbesh territore në Ballkan, kjo nuk do të ketë fund dhe mund të çojë në luftëra ose vështirësi më të mëdha. Kosova nuk duhet të ndahet. Serbët në Beograd po luajnë një lojë të rrezikshme, çdo hap që hedhin është i kalkuluar. Ata duan ndarje, duan të mbajnë veriun, Mitrovicën, Trepçën, por kjo është e rrezikshme. Edhe në Serbi ka shqiptarë, në Luginën e Preshevës, ata do të dëshironin të ishin pjesë e Kosovës. Në se fillon ndryshimi i kufijve, ku do të përfundojë”, ka thënë Engel. /Telegrafi/