[GjIlAnAsI_cSi]

Gjilan, 18 maj -Kryetari i Gjilanit, Qemajl Mustafa, pas dorëheqjes nga Kryesia e Degës së PDK-së në Gjilan, për shkak të presioneve dhe shantazheve, siç ka thënë ai, në imponimin e listës me emrat e kandidatëve për drejtorë departamentesh komunale, ka deklaruar se nuk e ka ndërmend të dorëzohet lehtë. Ai ka thënë se ka marrë 9 mijë vota më shumë se PDK-ja në zgjedhjet e fundit, nga 21 mijë vota sa kishte fituar si kandidat për kryetar të Gjilanit. Mirëpo, ka lënë të kuptohet se me lehtësi dhe publikisht do të tërhiqej nga funksioni i të parit të Komunës nëse i pamundësohet ushtrimi me dinjitet i funksionit të kryetarit. Mustafa ka paraqitur dy kushte që duhet t'ia plotësojë Kryesia e PDK-së pas gjithë asaj që ka ndodhur. E para, që ta korigjojë listën e drejtorëve dhe t'i largojë dy drejtorë nga ajo, atë të arsimit dhe të kadastrit. Ndërsa kushti i dytë që ai kërkon prej partisë, e që do të ishte mirë ta përmbushte, është kërkimfalja publike e Kryesisë së PDK-së ndaj Mustafës për telashet e krijuara. Ai ka shtuar se me shumë lehtësi do të jap dorëheqje nga funksioni i kryetarit të Komunës, edhe pse ai ka përgjegjëse para sovranit - votuesit dhe jo tekeve partiake dhe Kryesisë së partisë. Mustafa ka theksuar se ligji ia lejon që ai të punojë plotësisht i pavarur dhe të marr vendimet siç parasheh Ligji mbi Vetëqeverisjen Lokale, që drejtorët t'i emërojë dhe shkarkojë ai si kryetar dhe jo Kryesia e partisë, por ka dashtë që në konsultim dhe bashkëkordinim ta bënin qeverinë komunale. Mirëpo, sipas Mustafës, Kryesia 18 anëtarëshe e PDK-së e zgjedhur para 5 vjetësh, pasi prej atëherë nuk ka pasur zgjedhje në parti, e ka keqkuptuar gatishmërinë time për koordinim dhe bashkëpunim të veprimeve. Sipas kreut të Gjilanit, Kryesia e PDK-së në Gjilan e ka keqkuptuar rolin dhe funksionin e vet. Ai ka thënë s enë bazë të Ligjit mbi Vetëqeverisjen Lokale është kompetencë e tij të emërojë dhe shkarkojë drejtorët dhe jo Kryesia e partisë, dhe ky do të jetë një mësim i mirë për Kryesinë e PDK-së në Gjilan. Sipas Mustafës, për sukseset dhe dështimet në udhëheqje llogari jep kryetari dhe jo kryesia , dhe "unë i jap përgjegjësi sovranit dhe jo individëve apo kryesisë së partisë".
Kreu i Gjilanit shpreson ta çojë deri në fund këtë mandat qeverisës, por nuk e përjashton me çdo kusht mundësinë e tërheqjes nga funksioni i të partit të Gjilanit, nëse i pamundësohet ta kryej me dinjitet dhe si duhet detyrën e kryetarit. Lidhur me mundësinë e dorëheqjes, ai ka thënë se "edhe këtë hap mund ta bëjë, bile lehtësisht dhe në mënyrë publike, nëse pengohem në ushtrimin e funksionit të kryetarit të Gjilanit", ka thënë Mustafa.