[Guri i madh]

me siguri policia e ka gjt edhe THIKEN qe e ka lendue RASIM THAQIN CIMEN

---------------------------------------------------------------------------------------------

Prizren: Arrestohen pesë vehabi, konfiskohet armatim

Publikuar: E shtune, më 22 maj 2010

$(document).ready(function (){ $("a[rel^='img-icon-278[gallery_a_2781]']").prettyPhoto(); }); FOTO TË TJERA

• 
• 
• 

Prizren, 22 maj (E plotësuar)- Pesë persona, të cilët dyshohet se kanë lidhje me sektin fetar Vehabi, janë arrestuar, ndërsa një sasi armatimi, llojesh të ndryshme, është konfiskuar gjatë një operacioni policor të zhvilluar njëkohësisht në tetë lokacione, përfshirë edhe Prizrenin, në orët e vonat të mbrëmjes të premten, konfirmoi të shtunën Policia Rajonale në Prizren.
Personat e arrestuar sipas burimeve brenda policisë janë shtetas kosovarë, ku tre prej tyre i përkasin nacionalitetit boshnjak (Idriz Biljibani, Mustafa Ymeri dhe Ismajl Skenderi) dhe dy janë shqiptarë (Hadith Miftari dhe Armend Kalenderi) dhe besohet se ky grup ka lidhje me sektet islamike - vahabi, që veprojnë në komunën e Prizrenit.
“Policia ka kryer bastisjen me dyshimin se personat në fjalë janë në posedim ilegal të armëve. Në bazë të dhënave të inteligjencës ka pas dyshime të bazuara se ata mund të kenë qenë në përgatitje të veprave penale të shkaktimit të rrezikut të përgjithshëm”, ka thënë një zyrtar policor në kushte anonimiteti. Sipas tij urdhër bastisja është lëshuar nga Gjykata e Qarkut në Prizren, dhe në aksionin e kryer të premtën mbrëma kanë marrë pjesë mbi 100 zyrtarë policorë, të cilët kanë zbuluar sasi të konsiderueshme të armatimit.
“Informatat kanë rezultuar të jenë të sakta dhe gjatë bastisjeve në tetë lokacionet janë konfiskuar kallashnikovë me pesë karikatorë dhe 150 fishekë, pushkë gjysmë automatike me 89 fishekë, pistoletë TT me 8 fishekë, pistoletë CZ, pushkë automatike, pushkë gjuetie, pushkë ajrore, pesë palë dylbi, pranga, dy jelekë antiplumb, uniforma ushtarake dhe pesë kompjuterë laptop”, është shprehur burimi brenda policisë.
Drejtori i Policisë në nivel rajoni, major Nexhmi Krasniqi, tha se aksioni ka nisur pas një planifikimi disamujor të policisë për shkak të dyshimeve ndaj disa personave që mund të kenë lidhje me veprimet e kundërligjshme, ndërsa dyshohet se ata mund të kenë lidhje me sektin fetar Vehabi.
Ai tha se me këtë rast janë arrestuar pesë persona, të cilët ndodhen në paraburgim. Bastisja është kryer në gjashtë lokacione brenda Prizrenit dhe në dy të tjera në fshatin Lubizhdë, ndërsa është bastisur edhe selia e shoqatës humanitare “Sinqeriteti”, ku është marrë një sasi materiali kompjuterik, përfshirë CD, DVD etj, përderisa një person ka tentuar të rezistojë me revole.
Në anën tjetër, zëdhënësi i policisë, Hazir Berisha sqaroi se në këtë operacion janë angazhuar rreth 120 policë dhe eprorë të tyre, nga njësitet e ndryshme.
“Gjatë operacionit të koduar ‘Renea’, në cilësi të provave materiale janë konfiskuar armë të ndryshme, pastaj telefona celularë, dhjetë palë uniforma ushtarake, disa jelekë anti-plumb, dylbi, pranga etj..”, tha ai.
Togeri Berisha tha se në këtë operacion janë konfiskuar armë të tipit Kallashnikov, disa pushkë gjysmë-automatike, pistoleta si dhe disa lloj thikash. Sipas policisë pas këtyre arrestimeve do të hetohet edhe për rastin e sulmit fizik të një personi, punonjës i administratës tatimore, që ishte rrahur tri ditë më parë, në Prizren, ndërsa ai dyshonte se sulmi mund të ketë ardhur nga persona të sektit Vehabi, pasi ai tha se nuk ishte në marrëdhënie armiqësore me askënd, e herë pas here shpërndante vullnetarisht Biblën.
Një ditë pas aksionit policor në zyrat e shoqatës kulturore “Sinqeriteti” ka mbretëruar heshtja. Në hyrje të konviktit të meshkujve një poç kishte mbetur ende ndezur, ndërkohë që para derës së hyrjes ndodheshin një grumbull çelësash bashkë me pamjen e disa dyerve dhe dritareve të demoluara. Ndërsa në dritare ndodhej njoftimi për tribunën islame që parashihej të mbahej të shtunën në Shtëpinë e Kulturës, me mysafirin mr. Sadulla efendi Bajrami, hoxhë nga Kumanova.
Anëtarë të kësaj shoqate nuk kanë pranuar të japin deklaratë.
Edhe banorët e lagjes Kurillë nuk kanë dashur të komentojnë ngjarjen e të premtes mbrëma. Sipas tyre policia është përkujdesur që aksioni i tyre të mos përcillet vizualisht nga qytetarët përreth. Ndërkohë kanë shprehur dyshime për mundësinë e zhvillimit të aktiviteteve jashtëligjore në konviktin e shoqatës “Sinqeriteti”.
Në anën tjetër kryeimami i degës së Bashkësisë Islame të Kosovës në Prizren, Ali Vezaj ka pohuar se ky institucion është në dijeni për veprimtarinë e kësaj shoqate, porse me BIK-un nuk kanë zhvilluar kontakte zyrtare. “Ata nuk kanë vepruar nën hierarkinë e Bashkësisë Islame”, ka theksuar Vezaj.