[murrizi]

Malavi i organizoi pritje madhështore presidentit të Kosovës

Prishtinë, 17 qershor - Koha ditore
Republika e Malavit ka rikonfirmuar sot përkrahjen e fuqishme për popullin dhe institucionet e Republikës së Kosovës. Mbështetja e këtij vendi u dëshmua sërish të enjten me pritjen madhështore që ky vend i bëri presidentit Fatmir Sejdiu, i cili, me ftesë të presidentit Bingu Wa Mutharika ka nisur sot vizitën zyrtare në këtë vend, njofton Departamenti i Informacionit dhe Komunikimit me Publikun.

Sipas kësaj komunikate, me të arritur në Aeroportin Ndërkombëtar Kamuzu, ku në krye të delegacionit mikpritës ishte vetë presidenti Mutharika, Sejdiut iu bë një pritje e jashtëzakonshme nga institucionet më të larta shtetërore të Malavit, si dhe nga mijëra qytetarë të këtij vendi.

Pas intonimit të himneve të të dyja vendeve, të dy presidentët kanë parakaluar para Gardës së Nderit, si dhe kanë përshëndetur qytetarët e shumtë dhe grupet artistike, të cilat prezantuan gjithë begatinë e trashëgimisë dhe të koloritit kulturor të Malavit.

Po ashtu, duhet theksuar se i tërë kryeqyteti i këtij vendi, Lilongwe ishte stolisur me flamuj të Kosovës dhe të Malavit, si dhe me portretet e presidentit Sejdiu dhe presidentit Mutharika . Në këtë frymë solemniteti e miqësie ka kaluar edhe ceremonia e veçantë e organizuar nga Këshilli i Qytetit Lilongwe, në të cilën presidentit të Kosovës në mënyrë simbolike iu dorëzua çmimi “Qytetar Nderi”, si dhe iu dha “Çelësi i Qytetit”.

Duke pranuar këtë mirënjohje të veçantë, presidenti Sejdiu tha: “Për ne është e një rëndësie të veçantë kjo vizitë shtetërore që po bëj më ftesë të presidentit Mutharika në Malavi. Unë jam këtu për të përcjellë falënderimet e qytetarëve dhe të institucioneve të Republikës së Kosovës për vendimin e marrë nga Ju muaj më parë për ta njohur Republikën e Kosovës. Jam i impresionuar me pritjen e jashtëzakonshme që më keni bërë mua dhe përfaqësuesve të tjerë të vendit tim, që janë të pranishëm sot këtu. Po ashtu, është nder i veçantë për mua ky vendim që ka marrë qyteti juaj. Ju them se për ne do të mbetet në kujtesën tonë gjithmonë mbështetja që na keni dhënë dhe miqësia jonë, e cila po ndërtohet çdo ditë e më shumë”.

Presidenti Sejdiu, gjatë vizitës së tij të parë shtetërore në kontinentin afrikan, do të ketë një agjendë të ngjeshur aktivitetesh. Në orët e pasdites së sotme ai do të këtë një takim kokë më kokë me presidentin e Malavit, i cili, në orët e mbrëmjes, do të shtrojë darkë për mysafirët nga Kosova. Ndërsa, nesër presidenti Sejdiu do të paraqesë një fjalim në Asamblenë Kombëtare të Malavit, si dhe do të takohet me përfaqësues të tjerë të lartë të këtij vendi.

Sejdiun në këtë vizitë po e shoqërojnë edhe ministri i Punëve të Jashtme, Skënder Hyseni, dhe ambasadori i Kosovës në Mbretërinë e Bashkuar Muhamet Hamiti.