[panta_rhei]

Foto: Express. Ora 10 e 14 minuta
EULEX’i arreston Hashim Rexhepin, Guvernatorin e BQK’së
Express ishte në vendin e ngjarjes dhe pa se si Guvernatori Hashim Rexhepi, pasi është arrestuar, është futur në automjet të Policisë së EULEX-it.

Nga Jeton Musliu më 23.07.2010 në ora 10:24

(E Plotësuar)Policia e EULEX-it, rreth orës 10 të ditës së sotme, ka arrestuar Hashim Rexhepin, Guvernatorin e Bankës Qendrore të Kosovës.

Ai është arrestuar në zyrën e tij në ndërtesën e Bankës Qendrore të Kosovës e cila ndodhet në rrugën “Luan Haradinaj”në qendër të Prishtinës.

Express ishte në vendin e ngjarjes dhe pa se si Guvernatori Hashim Rexhepi, pasi është arrestuar, është futur në automjet të Policisë së EULEX-it.

Ndërkohë, në lidhje me këtë rast, EULEX’i, u ka shpërndarë medieve një komunikatë në të njëjtën kohë kur policët e tyre ndodheshin në BQK.

Në këtë njoftim komunikatë thuhet se nga ora 6 e mëngjesit, oficerët e Policisë së Kosovës që janë pjesë e Task Forcës Kundër Korrupsionit, kanë bastisur shtatë lokacione, përfshirë banesat private të katër të dyshuarve, ndër të cilat edhe ajo e Guvernatorit të Bankës Qendrore të Kosovës, zyrat e Bankës Qendrore të Kosovës si dhe një kompani private.

”Këto bastisje janë të ndërlidhura me një hetim financiar dhe për korrupsion ku dyshohet për keqpërdorim të detyrës apo pozitës zyrtare, marrje të ryshfetit, shmangie të tatimit, ushtrim të ndikimit dhe larje të parave”, thuhet në komunikatën e EULEX-it.

Sipas tyre, bastisjet janë autorizuar nga gjykatësi i procedurës paraprake i EULEX-it nga Gjykata e Qarkut në Prishtinë.

”Një prokuror kosovar nga Prokuroria Speciale e Kosovës (SPRK) si dhe monitoruesit policor to EULEX-it dhe një oficer ndërlidhës, ndodhen në Bankën Qendrore për mbikëqyrje dhe për të siguruar mbledhjen efektive të provave materiale si dhe për t’u dhënë shpjegimet e plota dhe të duhura personave që janë aty”, sqarohet në këtë komunikatë.