[Llapjani_HH]

Dëshmitë e bisedimeve sekrete publikohen të mërkurën

Aleanca për Ardhmërinë e Kosovës (AAK), ka paralajmëruar se të mërkurën e ardhshme do t’i bëjë publike dëshmitë për deklarimet e bëra ditë më parë për zhvillimin e bisedimeve sekrete mes zyrtarëve të Qeverisë së Kosovës dhe asaj të Serbisë.

Avni Arifi, anëtar i kryesisë së AAK-së, gjatë një konference me gazetar, tha të dielën se AAK-ja është shumë e vetëdijshëm për gjërat që ka thënë dhe shqetësimin e ngritur, se ka biseda të fshehta mes Kosovës dhe Serbisë. Sipas tij, kjo është bërë me qëllim që të tregohet së është Qeveria ajo që ka sekrete, e jo AAK-ja.

“Ne kemi dashtë të flasim për një sekret të Qeverisë me i dhënë hapësirë të mjaftueshme Qeverisë që të sqarojë se pse kanë ndodhur takime të tilla, dhe Qeveria e Kosovës e keni parë që në asnjë moment nuk e ka refuzuar vërtetësinë e takimeve, mirëpo kanë bërë tërheqje taktike, apo kanë folur se nuk do të bisedojnë kurrë për veriun apo të ngjashme”.

AAK-ja, sipas Arifit, e kundërshton fuqishëm ndryshimin e Pakos së Ahtisaarit dhe zgjedhjen e statusit të veriut të Kosovës përmes një statusi special, e cila është përfolur ditëve të fundit. Sepse sipas tij, pakoja e Ahtisaarit ka qenë kompromis i Kosovës dhe bashkësisë ndërkombëtare, dhe Aleanca kërkon implementimin e plotë të kësaj pakoje.

Shqetësim tjetër që ka shfaqur Arifi, ka qenë edhe privatizimi i PTK-së, çështje e cila sipas tij është bërë në kundërshtim me të gjitha zotimet e më hershme dhe për këtë ai ka kërkuar nga Qeveria e Kosovës, anulimin e tenderit, respektimin e procedurave dhe rishqyrtimin e strategjisë së privatizimit të PTK-së në Kuvendin e Kosovës.

Kryeministri Hashim Thaçi ka kërkuar një front unik të faktorit politik të Kosovës në prag të Asamblesë së Përgjithshme të Kombeve të Bashkuara, duke i injoruar deklaratat e AAK-së për kontakte të fshehta të zyrtarëve të kabinetit të tij më ata të Qeverisë së Serbisë.

Në fillim të javës që po lëmë pas, gjatë një konference për gazetarë, anëtari i Kryesisë së AAK-së, Ardian Gjini, tha se ka informacione që Qeveria e Kosovës po zhvillon bisedime të fshehta me Serbinë, pa dijeninë e popullit dhe pjesës tjetër të spektrit politik, mirëpo kryeministri Thaçi nuk ka thënë as “Po” as “Jo”, por e ka quajtur këtë si “deklaratë qesharake”.
Telegrafi

Pakoja e Ahtisaarit është përmbushur vetëm 52%

Vetëm pak më shumë se gjysma e kërkesave të shtruara në Pakon e Ahtisaarit kanë mundur të përmbushen tërësisht, thuhet në vlerësimin e Zyrës Civile Ndërkombëtare, ndërkohë që kryeministri Hashim Thaçi ka deklaruar se ky dokument, mbi bazën e të cilit është shpallur pavarësia e mbikëqyrur e Kosovës është implementuar rreth 90 për qind.

Në një vlerësim të fundit të zyrës Civile Ndërkombëtare (ICO), e mandatar për të garantuar zbatimin e Pakos së Ahtisaarit, thuhet se deri më 14 qershor të sivjetmë, janë 7 kërkesa për të cilat institucionet e Kosovës nuk kanë bërë gjë deri më tash për t’i përmbushur dhe 46 i kanë përmbushur pjesshëm. Ndërsa 58 kërkesa të tjera i kanë përmbushur plotësisht. Kalkuluar në përqindje, i bie që 51.78 për qind e Pakos është përmbushur plotësisht, por që shumica e këtyre kërkesave kanë të bëjnë me ligjet.

Bazuar në matricën 18 faqesh të monitorimit të Pakos së Ahtisaarit, të titulluar “Zbatimi i propozimit gjithpërfshirës për zgjidhjen e statusit – gjendja e zbatimit”, thuhet se disa nga këto kërkesa që paraqiten si standarde është dashur të bashkë-implementohen nga institucionet vendase dhe ndërkombëtare kurse të tjerat veç e veç.

Kësisoj Prishtina zyrtare ka përmbushur 50 kërkesa, 44 sosh i ka përmbushur pjesshëm, kurse 4 të tjera as që ka nisur t’i përmbushë. Më aktive në përmbushjen e tyre, sipas të dhënave të Kohës Ditore, janë treguar institucionet ndërkombëtare me mision në Kosovë, që kanë implementuar 33 standarde, 14 pjesërisht, ndërsa 3 nuk i kanë plotësuar fare.

Serbia ndërkaq është treguar fare pak e interesuar për t’i përmbushur kërkesat që dalin nga Pakoja e Ahtisaarit. Ajo nuk ka nisur të bëjë gjë në dy sosh, ndërkaq për dy të tjera ka ofruar bashkëpunim të pjesshëm. Ndërsa Maqedonia është treguar kooperative, i është dërguar një kërkesë – demarkacioni i kufirit midis saj dhe Kosovës – dhe ai është i përmbushur tashmë.
Telegrafi