[murrizi]

Pakti detar, Idrizi: Asnjë qeveri s’ka mandat të rinegociojëFIER- Partia Drejtësi dhe Unitet ka zhvilluar një takim në qytetin e Fierit në kuadër të turit “Një vit PDU”. Kryetari i kësaj partie, Shpëtim Idrizi, në fjalën e tij u premtoi simpatizantëve se rikthimi në Çamëri do të ndodhë.

“Ne do të kthehemi në Çamëri, ne do të nderojmë varret e të parëve tanë dhe ne sigurisht do të fitojmë të drejtat tona, sepse sot është ora jonë, sot është ora e shqiptarëve, sot është ora e Çamërisë” ka theksuar Idrizi.

Duke folur për aktivitetin parlamentar të PDU-së brenda një viti, Idrizi deklaroi se asnjë qeveri nuk ka mandatin të rinegociojë marrëveshjen e ujrave me Greqinë pas vendimit të Gjykatës Kushtetuese.

“Pa dyshim, ne kemi folur dhe mbajtur çështjen tonë lart në parlamentin shqiptar, ne kemi reaguar të parët duke kundërshtuar marrëveshjen e ujrave dhe asnjë qeveri pas vendimit të Gjykatës Kushtetuese nuk ka mandatin ta rinegociojë atë” tha Idrizi, i cili shoqërohej dhe nga deputeti tjetër i kësaj partie, Dashamir Tahiri.

Sipas deputetit Tahiri, Çamëria është një çështje që u përket gjithë shqiptarëve kudo që ata jetojnë dhe jo vetëm këtij komuniteti.

(e.n/news24/BalkanWeb)