[Guri i madh]

Një i dyshuar nga “Rasti Bllaca” të enjten në gjykatë

Publikuar: Sot, më 23 nëntor 2010





Faruk Gashi, i dyshimtë se në bashkëveprim me Nazim Bllacën, në cilësinë e pjesëtarëve të ish-SHIK-ut, kanë vrarë në vitin 1999 Salih Gashin në Lipjan, të enjten do të paraqitet në Gjykatën e Qarkut në Prishtinë, ku ndaj tij pritet konfirmimi aktakuzës, shkruan sot “Zëri”.
Ndonëse është thënë në akuzë se vrasjen e kanë kryer në bashkëpunim me Nazim Bllacën nga Ribari i Madh i Lipjanit, ky i fundit nuk është në mesin e të akuzuarve, ngase me një vendim gjyqësor ai është emëruar si “dëshmitar bashkëpunues” dhe si i tillë nuk është përfshirë si i akuzuar në aktakuzën ku gjendet Faruk Gashi, biznesmen nga Shtimja.

Por, Nazim Bllaca dhe rreth dhjetë të dyshuar të tjerë pritet që të jenë pjesë e një aktakuze tjetër, e cila është duke u përgatitur dhe e cila, siç konfirmohet, është drejt finalizimit. Si e tillë aktakuza pritet të ngrihet brenda dy javësh, shkruan sot “Zëri”.